Теубыдагъэ тхэлъу гугъуехьхэм дыпэщІэтыну дапхуэдэу Иеговэ къызэрыддэІэпыкъур?

1. Теубыдагъэ дыщІыхуэныкъуэр сыт икІи хэт дэ абыкІэ къыддэІэпыкъунур? (1 Петр 5:10).

МЫ ИУЖЬРЕЙ махуэ гугъухэм Иеговэ и лэжьакІуэхэр теубыдагъэ хуэныкъуэщ. Дэ тщыщ языныкъуэхэр хэти уз гъэтІылъам пэщІэтщ, хэти фІыуэ илъагъур лІэныгъэм зэрыІэщІихам щхьэкІэ мэгуІэ, хэти и унагъуэм щыщхэр е тепщэныгъэ зиІэхэр къыпэщІоувэ (Мт. 10:18, 36, 37). Иджыпсту уэ гугъуехь гуэрым упэщІэт? Шэч къытумыхьэ Иеговэ уэ къызэрыбдэІэпыкъуным теубыдагъэ уиІэу сыт хуэдэ гугъуехьми упэщІэтыну. (Къеджэ 1 Петр 5:10.)

2. Теубыдагъэ дгъэлъэгъуэну хэт къыддэІэпыкъур?

² Теубыдагъэ бгъэлъэгъуэным къикІыр сыт? Абы къокІ Иеговэ хуэпэжу укъэнэну икІи укъызэрырахуэкІымрэ гъэунэхуапІэхэр узэриІэмрэ емылъытауэ, гуфІэгъуэ уиІэу абы ухуэлэжьэну. Теубыдагъэ зиІэ цІыхум псори тэмэм зэрыхъужынум теухуауэ гугъэр зыфІигъэкІуэдкъым. Иеговэ къыддэмыІэпыкъуу щытамэ, дэ зыми гугъуехьхэр тхуэшэчынутэкъым. Аращ дэ «лъэкІыныгъэшхуэ» къыдэзытыр (2 Кор. 4:7). Мы статьям дэ щызэпкърытхынущ теубыдагъэ диІэну Иеговэ къызэрыддэІэпыкъу ІэмалиплІ. Абы нэмыщІ дытепсэлъыхьынущ Иеговэ къыддэІэпыкъун щхьэкІэ дэ сыт тщІэ хъунуми.

ТХЬЭЛЪЭІУР

3. ТхьэлъэІур ди дежкІэ тыгъэ лъапІэу жыпІэ щІэхъунур сыт?

³ Теубыдагъэ дгъэлъэгъуэну къыддэІэпыкъун щхьэкІэ Иеговэ тхьэлъэІур тыгъэу къыдитащ. Дэ гуэныхьлыуэ дызэрыщытым емылъытауэ, Иеговэ депсэлъэну Іэмал диІэщ (Евр. 4:16). Егупсысыт: дэ сыт хуэдэ зэманми, сыт хуэдэ темэми теухуауэ икІи сыт хуэдэ бзэкІи Иеговэ депсэлъэфынущ. Абы дэ дызэхех дэнэ дыщымыІами, тутнакъым дисми, ди закъуэ дыдэми (Иона 2:1, 2; Апост. 16:25, 26). Дызэрыгузавэм къыхэкІкІэ, псалъэ къыщытхудэмышейм дежи Иеговэ жетІэну дызыхуейр къыгуроІуэ (Рим 8:26, 27). Пэжщ, тхьэлъэІур ди дежкІэ тыгъэ лъапІэщ!

4. Теубыдагъэ диІэну Иеговэ дызэрелъэІур абы и Іэмырым техуэу жыпІэ щІэхъунур сыт?

⁴ Библием щыжыІащ: «Тхьэр зэрыхуейм тету Іуэхугъуэ гуэркІэ делъэІумэ, дызэрызэхихынур дощІэ» (1 Ин. 5:14). НтІэ, теубыдагъэ диІэу гугъуехьхэм дыпэщІэтын щхьэкІэ Иеговэ къыддэІэпыкъуну делъэІу хъуну пІэрэ? Хъунущ, ар абы и Іэмырым тохуэ. Сыт апхуэдэу жыпІэ щІэхъунур? Иеговэ хуэпэжу дыкъыщынэм деж абы ШейтІаным иритын жэуап иІэщ (Прит. 27:11). Абы нэмыщІ Библием щыжыІащ «зи гур етауэ хуэлажьэхэм дэІэпыкъуну» Иеговэ зэрыхуейр (2 Лет. 16:9). Дэ шэч лъэпкъ къытедмыхьэми хъунущ теубыдагъэ диІэн щхьэкІэ къыддэІэпыкъуну къаруи гукъыдэжи Иеговэ зэриІэм (Ис. 30:18; 41:10; Лк 11:13).

5. Ди гум мамырыгъэ илъыну тхьэлъэІур дапхуэдэу къызэрыддэІэпыкъур? (Исайя 26:3).

⁵ Дызыгъэгузавэм щхьэкІэ Алыхьым тхьэлъэІукІэ зыщыхуэдгъазэм деж абы «къыбгъэдэкІ гузэгъэгъуэу цІыхухэм къагурыІуэфынум нэхърэ куэдкІэ нэхъ иным» ди гури ди гупсысэхэри къехъумэ (Флп. 4:7). Иеговэ хуэмылажьэ цІыхухэри гугъуехь куэдым пэщІохуэ. Абыхэм мамырыгъэ зрагъэгъуэтыжын щхьэкІэ Іэмал куэд къагъэсэбэп, псалъэм папщІэ, медитацие жыхуаІэр. Апхуэдэу абыхэм псори зыщагъэгъупщэну хущІокъу, зыгъэгузавэ гупсысэхэри абы хэту. Ауэ абы шынагъуэ пылъщ, сыт щхьэкІэ жыпІэмэ апхуэдэ цІыхур жин бзаджэхэм я къэпхъэным ихуэфынущ. (Евгъапщэ Маттэ 12:43—45.) Аращи, Иеговэ къыуит мамырыгъэм хуэдэ зы медитациеми къыуитыфынукъым. Дэ Иеговэ тхьэлъэІукІэ зыщыхуэдгъазэм деж абы нэгъэсауэ дызэрыщыгугъыр елъагъури «мамырыгъэ мыухыж» къыдет. (Къеджэ Исайя 26:3.). Псалъэм папщІэ, ар къыддоІэпыкъу Библием ит гупсэхугъуэ къозыт пычыгъуэхэр дигу къэдгъэкІыжыну. Абы и фІыгъэкІэ, Иеговэ фІыуэ дыкъызэрилъагъур икІи и нэІэ къызэрыттригъэтыр дэ зыхыдощІэ. Апхуэдэу ди гури ди акъылри мамырыгъэкІэ гъэнщІа мэхъу (Пс. 62:1, 2).

6. Сыт уи тхьэлъэІум хэбгъэхьэ хъунур? (Сурэтми феплъ.)

⁶ ПщІэ хъунур. Гугъуехь гуэр упэщІэхуамэ «уи хьэлъэр Иеговэ ІэщІэлъхьи», мамырыгъэ къыуитыну елъэІу (Пс. 55:22). Абы нэмыщІ гугъуехьым упэлъэщын щхьэкІэ Іущагъ къыуитыну Алыхьым елъэІу (Прит. 2:10, 11). Иджыри абы фІыщІэ хуэпщІыну зыщомыгъэгъупщэ (Флп. 4:6). ГъэунэхуапІэхэм ущихуэм деж ар къызэрыбдэІэпыкъум гу лъытэ икІи абы щхьэкІэ фІыщІэ хуэщІ. Иджыпсту уиІэ фІыгъуэхэр уи гугъуехьхэм пщагъэгъупщэну хуит умыщІ (Пс. 16:5, 6).

АЛЫХЬЫМ И ПСАЛЪЭР

7. Библиер куууэ зэрыдджыр теубыдагъэ тхэлъыну дапхуэдэу къызэрыддэІэпыкъур?

⁷ Теубыдагъэ тхэлъыну Иеговэ къыддэІэпыкъун щхьэкІэ и Псалъэр къыдитащ. Ар къызэрыддэІэпыкъур ди фІэщ зыщІ едзыгъуэ куэд Библием итщ. Абыхэм щыщ зы щапхъэ деплъынщ. Маттэ 6:8, ДЩІ щыжыІащ: «фи Адэ лъапІэм фемылъэІу щІыкІэ фызыхуэныкъуэр ещІэ». Мы псалъэхэр жызыІа Хьисэ нэхърэ нэхъыфІу Иеговэ зыми ицІыхукъым. Аращи, сыт хуэдэ гугъуехь дыпэщІэмыхуами, шэч къытедмыхьэми хъунущ дызыхуэныкъуэр Иеговэ зэрищІэм икІи Іэмал имыІэу къызэрыддэІэпыкъунум. Теубыдагъэ зыхэдгъэлъыну къыддэІэпыкъун гупсысэ куэд Библием иджыри итщ (Пс. 94:19).

8. 1) Гугъуехь дызыпэщІэхуэхэм дыпэлъэщыну Библием ит принципхэр къызэрыддэІэпыкъум теухуауэ щапхъэ къэфхь 2) Библием ит принципхэр дыщыхуэныкъуэм деж къэтщІэжыну сыт къыддэІэпыкъунур?

⁸ Библием ит принципхэр къыддоІэпыкъу теубыдагъэ тхэлъу гугъуехь дызыпэщІэхуэхэм дыпэлъэщыну. Абы ит чэнджэщхэм я фІыгъэкІэ дэ Іущагъ зыхэлъ унафэхэр дощІыф (Прит. 2:6, 7). Псалъэм папщІэ, Библием дыхуегъэуш пщэдейрей махуэм щхьэкІэ дымыгузавэу, махуэ къэс Иеговэ дыщыгугъыну (Мт. 6:34; ДЩІ). Дэ махуэ къэс Библием деджэу, дызэджам куууэ дегупсысу хьэл тхуэхъумэ, ди дежкІэ нэхъ тынш хъунущ дызыхуей принципхэр дыщыхуей зэманым къэтщІэжыну.

9. Иеговэ и лэжьакІуэхэм зэрадэІэпыкъум теухуауэ Библием ит хъыбархэм дапхуэдэу ди фІэщхъуныгъэр нэхъ быдэ зэращІыр?

⁹ Библием пэж дыдэу псэуа цІыхухэм я щапхъэхэр итщ. Ахэри дэ тхуэдэу Иеговэ щыгугът икІи ар абыхэм къадэІэпыкъут (Евр. 11:32—34; Екъуб 5:17). Иеговэ абыхэм дэІэпыкъуэгъу зэрахуэхъуам дыщегупсысым деж дэри ар къызэрыддэІэпыкъунур быдэу ди фІэщ мэхъу. Сыт щхьэкІэ жыпІэмэ, «Алыхьыр ди хъумапІэщ икІи ди къарущ, гузэвэгъуэ зэманым щІэхыу дгъуэт ДэІэпыкъуэгъущ» (Пс. 46:1). Ижь зэманым Иеговэ и лэжьакІуэхэр хуэпэжу къызэрынам теухуауэ дыщеджэм деж абыхэм я фІэщхъуныгъэмрэ я теубыдагъэмрэ щапхъэ тетхыну гукъыдэж диІэ мэхъу (Екъуб 5:10, 11).

10. Дапхуэдэу уэ Алыхьым и Псалъэр къызэрыбдэІэпыкъуфынур?

¹⁰ ПщІэ хъунур. Махуэ къэс Алыхьым и Псалъэм еджэ икІи псом хуэмыдэу узыгъэгушхуэ Библием ит едзыгъуэхэр гъунэгъуу зигъэІэ. Куэдым ягу ирохь «Исследуем Писание» жыхуиІэ брошюрэмкІэ я махуэр щІадзэну. Пщэдджыжьым абы ит едзыгъуэмрэ комментариемрэ уеджэмэ, махуэм и кІуэцІым абы уегупсысыну Іэмал уиІэнущ. Ди шыпхъу Мари́a и гъащІэм къыщыхъуам деплъынщ. Абы и адэми и анэми лышх уз къеузу къахутат. Мари абыхэм кІэлъыплъыжыну сыт къыдэІэпыкъуар? Ар къыддогуашэ: «Сэ махуэ къэс „Исследуем Писание каждый день“ жыхуиІэ брошюрэм седжэт икІи куууэ зэпкърысхт. Ар сэ къыздэІэпыкъут Библием ит гупсысэхэмкІэ си акъылыр сыт щыгъуи гъэнщІауэ щытыну. Апхуэдэу си щхьэмрэ си гугъуехьхэмрэ куэдыІуэу семыгупсысу, Иеговэрэ абы къыдит гугъапІэ дахэмрэ сегупсысыфт» (Пс. 61:2).

КЪУЭШ, ШЫПХЪУХЭР

11. Теубыдагъэ яхэлъу гугъуехьхэм пхырыкІ ди къуэш, ди шыпхъухэм ущегупсысым деж сыт уэ зыхэпщІэр?

¹¹ Дэ гугъуехьхэм дыпэлъэщыфынущ Иеговэ тыгъэу къыдита къуэш, шыпхъухэм я фІыгъэкІэ. Дэ дощІэ дызэримызакъуэр, сыт щхьэкІэ жыпІэмэ апхуэдэ гугъуехьхэм дуней псом тет ди къуэш, ди шыпхъухэр пэщІохуэ (1 Пет. 5:9). Ди Іуэхур дапхуэдэу гугъуу щымытами, нэгъуэщІ къуэш, шыпхъухэр апхуэдэ гугъуехьхэм зэрыпхырыкІам икІи Иеговэ хуэпэжу къызэрынам быдэу ди фІэщ ещІ дэри ар зэрытхузэфІэкІынур (Апост. 14:22).

12. Къуэш, шыпхъухэр дапхуэдэу къызэрыддэІэпыкъур икІи дэри абыхэм щхьэкІэ сыт тщІэ хъунур? (2 Коринф 1:3, 4).

¹² Зэман гугъухэм деж къуэш, шыпхъухэр дэІэпыкъуэгъу къытхуэхъуфынущ. Апостол Паул и щапхъэм дегупсысынщ. Ар унэм къыщІэкІыну хуитыныгъэ щимыІам щыгъуэ, къуэш, шыпхъухэр абы и деж къакІуэурэ ягъэгушхуэт, зыхуэныкъуэмкІи дэІэпыкъут. Паул и письмохэмкІэ абыхэм я цІэр къриІуэурэ фІыщІэ яхуищІт (Флп. 2:25, 29, 30; Кол. 4:10, 11). Ноби апхуэдэ дыдэущ зэрыщытыр. Гугъуехь дыщыпэщІэхуэм деж къуэш, шыпхъухэр занщІэу къыддэІэпыкъуну хьэзырщ. Езыхэри гугъуехь щыпэщІэхуэм деж дэри абыхэм дадэІэпыкъуну дыхьэзырщ. (Къеджэ 2 Коринф 1:3, 4.)

13. Майя зыпэщІэхуа гугъуехьым пэлъэщыну сыт къыдэІэпыкъуар?

¹³ Урысейм щыщ ди шыпхъу Майя къуэш, шыпхъухэр къызэрыдэІэпыкъуам теухуауэ деплъынщ. 2020 гъэм абы и унэр полицейскэхэм щІащыкІат. ИужькІэ ар и фІэщхъуныгъэм теухуауэ нэгъуэщІхэм зэрыдэгуашэм щхьэкІэ хьэкумыщІэм и пащхьэ иуващ. Майя жеІэ: «А зэман гугъухэм къуэш, шыпхъухэм звонить къысхуащІт, письмохэр къысхуатхт икІи фІыуэ сызэралъагъур къызжаІэт. Сэ сыт щыгъуи сщІэт лъагъуныгъэшхуэ зыхэлъ унагъуэ сызэриІэр, ауэ 2020 гъэм ар, псом хуэмыдэу, зыхэсщІащ».

14. Къуэш, шыпхъухэр зыдэдгъэІэпыкъун щхьэкІэ сыт тщІэ хъунур? (Сурэтми феплъ.)

¹⁴ ПщІэ хъунур. Уэ иджыпсту гугъуехь гуэрхэр уиІэмэ, къуэш, шыпхъухэм я гъусэу уи зэманыр бгъэкІуэным мыхьэнэшхуэ иІэщ. Зэхуэсым и нэхъыжьхэми захуэбгъэзэну умыукІытэ. Ахэр уэ «жьапщэм ущызыхъумэ егъэзыпІэ, уэлбанэм укъезыгъэл хъумапІэ» пхуэхъуфынущ (Ис. 32:2). Зыщомыгъэгъупщэ къуэш, шыпхъухэри апхуэдэ гъэунэхуапІэхэм зэрыпэщІэхуэр. Гугъуехь пэщІэхуахэм фІы гуэр зэрахуэпщІэным иужь уитмэ, ар уэ къыбдэІэпыкъунущ уи гугъуехьхэм упэлъэщыну, гуфІэгъуэри пфІэмыкІуэдыну (Апост. 20:35).

ДИ ГУГЪАПІЭР

15. ГугъапІэр Хьисэ дапхуэдэу къызэрыдэІэпыкъуар икІи дэри ар нобэ дапхуэдэу къызэрыддэІэпыкъур? (Еврейхэм 12:2).

¹⁵ Теубыдагъэ тхэлъыну къыддэІэпыкъун щхьэкІэ Иеговэ гугъапІэр тыгъэу къыдитащ (Рим 15:13). Дигу къэдгъэкІыжынщ Хьисэ псом нэхърэ нэхъ гъэунэхуапІэ хьэлъэ щыпэщІэхуам и гугъапІэр къызэрыдэІэпыкъуар. (Къеджэ Еврейхэм 12:2.) Хьисэ ищІэт Иеговэ хуэпэжу къыхуэнэмэ, абы и цІэр зэригъэлъэпІэнур. Иджыри ар пэплъэт и Адэм и деж игъэзэжу, пащтыхь хъууэ дунейм и тепщэу щыщытыну зэманым. Апхуэдэ дыдэу, дэри гъащІэ мыухыжым епхауэ диІэ гугъэр къыддоІэпыкъу ШейтІаным и дунейм дызыпэщІэхуэ гъэунэхуапІэхэм дыпэлъэщыну.

16. Ди зы шыпхъум гугъапІэр дапхуэдэу къызэрыдэІэпыкъуар икІи абы и псалъэхэм сытым дыхуагъасэрэ?

¹⁶ Урысейм щыщ Аллэ Пащтыхьыгъуэм теухуауэ иІэ гугъэр къызэрыдэІэпыкъуам деплъынщ. Абы и щхьэгъусэр яубыдри, «следственный изолятор» жыхуаІэм ирагъэтІысхьат. Аллэ и лъэр щІэмыхуну сыт къыдэІэпыкъуми жеІэ: «Псом хуэмыдэу сэ тхьэлъэІумрэ гугъапІэмрэ къыздоІэпыкъу. Абы нэмыщІ сигу къызогъэкІыж гъащІэр абдеж зэрыщимыухыр. Иегови абы и лэжьакІуэхэми Іэмал имыІэу текІуэныгъэр къэтхьынущ».

17. Иеговэ гугъэ дахэ къыдитам щхьэкІэ фІыщІэ зэрыхуэтщІыр дапхуэдэу зэредгъэлъэгъуфынур? (Сурэтми феплъ.)

¹⁷ ПщІэ хъунур. Иеговэ пхуигъэхьэзыра гъащІэ дахэм уегупсысын щхьэкІэ зэман хухэх. Уи нэгу къыщІэгъэхьэ дунеищІэм насыпыфІэу узэрыщыпсэунур. Абы елъытауэ иджыпсту диІэ гугъуехьхэр «гузэвэгъуэ мащІэу икІи кІэщІу» жыпІэ хъунущ. (2 Кор. 4:17). Абы нэмыщІ хъыбарыфІымкІэ нэгъуэщІхэм уадэгуэшэн щхьэкІэ, Іэмалу уиІэр къэгъэсэбэп. Иеговэ хуэмылажьэ цІыхухэм егупсыс. Абыхэми гугъуехь куэд яІэщ, ауэ Иеговэ къыдит гугъэ дахэм теухуауэ абыхэм ящІэкъым. Аращи, хъыбарыфІым теухуауэ цІыхум кІэщІу фІэкІа уемыпсэлъэфми, абы ар хуигъэушыфынущ Алыхьым и Пащтыхьыгъуэм теухуауэ нэхъыбэ къищІэну.

18. Иеговэ дыкъызэригъэгугъа псалъэхэм сыт дзыхь хуэтщІ щІэхъунур?

¹⁸ Іэиуб гъэунэхуапІэ куэдым пэщІэхуат. Теубыдагъэ хэлъу а гугъуехьхэм пхырыкІа иужь абы Иеговэ мыпхуэдэу жриІащ: «Иджы сэ сощІэ уэ псори зэрыпхузэфІэкІыр икІи пхуэмыгъэзэщІэн мурад зэрыщымыІэр» (Иов 42:2). Іэиуб къыгурыІуащ Иеговэ жиІа псалъэхэр игъэзэщІэжыну зыри зэран зэрыхуэмыхъуфынур. А гупсысэм дэри къару къыдитыфынущ гугъуехьхэм дыщыпэщІэхуэм деж. Зы щапхъэ къэтхьынщ. Уи нэгу къыщІэгъэхьэт, зы цІыхубз гуэр зэман куэд хъуауэ уз хьэлъэ къеузу. Абы и лъэр щІэхупащ, сыт щхьэкІэ жыпІэмэ дохутыр куэдым захуигъэзати, зыри сэбэп къыхуэхъуфакъым. ИужькІэ зи ІэщІагъэм фІыуэ хэзыщІыкІ дохутыр абы къигъуэтри, и лажьэ дыдэр икІи ар зэригъэхъужыну щІыкІэр къыжриІащ. ЦІыхубзыр иджыри мыхъужами, дохутырым и псалъэхэм ар нэхъыфІ къищІыжащ. А гугъэм абы къару къритащ и Іэр иримыхьэхыну, сыт щхьэкІэ жыпІэмэ цІыхубзым къыгурыІуащ Іэмал имыІэу зэрыхъужынур. Дэри ди гугъуехьу хъуам дыпэлъэщыфынущ, сыт щхьэкІэ жыпІэмэ Иеговэ дыкъызэригъэгугъа жэнэтыр зэрыщыІэнум шэч лъэпкъ къытетхьэкъым.

19. Ди гугъуехьхэм теубыдагъэ тхэлъу дыпхырыкІыну сыт къыддэІэпыкъунур?

¹⁹ Мы статьям дэ щызэпкърытхащ ди гугъуехьхэм теубыдагъэ тхэлъу дыпхырыкІын щхьэкІэ Иеговэ дапхуэдэу къыддэІэпыкъуми. Абы тхьэлъэІур, Библиер, къуэш, шыпхъухэр, абы нэмыщІ гугъапІэр тыгъэу къыдитащ. Иеговэ зыдэдгъэІэпыкъумэ, ди гъащІэм сыт хуэдэ гугъуехь дыпэщІэмыхуами, абы дызэрыпэлъэщын къару къыдитынущ (Флп. 4:13). Абы нэмыщІ ШейтІаным и дунейм зыри къыщыхэмынэжыну зэманри ди нэкІэ тлъэгъунущ.