Алыхьымрэ цІыхухэмрэ худиІэ лъагъуныгъэр дапхуэдэу зэрыхэдгъэхъуэфынур?

Хьисэ и лъэужь ирикІуэхэр Мусэ и Хабзэм щІэмытыжми, абы и унафэ нэхъыщхьитІыр къыддоІэпыкъу Иеговэ сыткІэ къытщыгугъми къыдгурыІуэну — ар Алыхьымрэ ди гъунэгъухэмрэ фІыуэ лъагъуныращ (Мт 22:37—39). Апхуэдэ лъагъуныгъэр езыр-езыру диІэ хъукъым. Ар дэ езым зыхэтлъхьэн хуейщ. Дапхуэдэу? Библием махуэ къэс деджэмэ, дэ ар зыхэтлъхьэфынущ. Тхыгъэ ЛъапІэм Алыхьым и хьэл-щэн дахэхэр къыщытхузэІуихым деж дэ «Иеговэ и фІыгъуэр долъагъу» (Пс 27:4). Апхуэдэу Алыхьым лъагъуныгъэ худиІэр нэхъ ин мэхъу икІи ди гупсысэкІэр абы и гупсысэкІэм нэхъ ещхь мэхъу. Абы дыхуегъэуш Алыхьым и хабзэхэм дытетыну икІи нэгъуэщІхэр псэемыблэжу фІыуэ тлъагъуну (Ин 13:34, 35; 1Ин 5:3). Библиер дыдихьэхыу дджыну къыддэІэпыкъуну чэнджэщ зыбжанэ зэпкърытхынщ:

• Узэджэр уи нэгу къыщІэгъэхьэ. Іуэхугъуэр щекІуэкІ щІыпІэм ущыІэу къызыщыгъэхъу. Сытыт уэ плъэгъунур, зэхэпхынур икІи зыхэпщІэнур? А Іуэхугъуэм хэтахэм сытыт зыхащІауэ щытар?

  

• НэгъуэщІ бгъэдыхьэкІэхэм еплъ. Мис абыхэм ящыщ Іэмал зыбжанэ. МакъкІэ Библием къеджэ е аудиозапись уедаІуэу узэджэм кІэлъыплъ. Тхылъхэр зэрызэкІэлъыкІуэм хуэдэу уемыджэу цІыху гуэрым е пфІэгъэщІэгъуэн хъуа темэ гуэрым тепсэлъыхь псалъащхьэхэм хэчыхьауэ еджэ. Псалъэм папщІэ, Хьисэ теухуауэ нэхъыбэ къэпщІэну къыбдэІэпыкъунущ «Слово Бога в картах и схемах» жыхуиІэ брошюрэр (Приложение 4, 16). Махуэм хухаха едзыгъуэр зэрыт псалъащхьэм зэрыщыту къеджэ. Библием и тхылъхэр зэратхам хуэдэу къеджэ.

  

• Хэгупсысыхьауэ къеджэ. Махуэ къэс зы псалъащхьэ уеджэу, ар къыбгурыІуэу уегупсысмэ нэхъыфІщ, псалъащхьэ куэд укъеджэну ухущІэкъу нэхърэ. Контекстымрэ а зэманым къэхъуа Іуэхугъуэхэмрэ егупсыс. Зы еплъыгъуэкІэ гу зылъомытэ Іуэхухэми гу зэрылъыптэнум хущІэкъу. Картэхэр, сноскэхэр, перекрестнэ ссылкэхэр къэгъэсэбэп. КъыбгурымыІуа упщІэхэм ящыщу зы упщІэ нэхъ мыхъуми зэпкърых. ЗэрыпхузэфІэкІкІэ узэреджам хуэдизкІэ узэджам егупсысыж.