Дауэ зэрыщІэбдзэ хъуныр?

Библием удихьэхыу икІи сэбэпынагъ къыпхуихьу дауэ узэреджэфынур? Сэбэп къыпхуэхъуну чэнджэщитху зэпкърытхынщ.

Ущеджэну щІыпІэр гъэхьэзыр. Зыри зэран къыщыпхуэмыхъун щІыпІэ щэху къэгъуэт. Ущеджэ щІыпІэр нэхумэ, жьы къабзэ щыІэу щытмэ, узэджэм уи акъылыр тебухуэну нэхъ тынш хъунущ.

ЕплъыкІэ тэмэм уиІэу еджэ. Библиер гъащІэр къыдэзыта ди Адэ лъапІэм и тхыгъэу щытщи, абы дыщеджэкІэ сабийр фІыуэ къэзылъагъу и адэм жиІэм зэрыхущытым хуэдэу дэри абы итым дыхущытын хуейщ. Библием еплъыкІэ тэмэм ухуимыІэмэ е абы дэбгъуэн къэплъыхъуэу щытмэ, апхуэдэ гупсысэкІэр къызэрыбгъэнэным хущІэкъу, Алыхьым зыгуэрым ухуригъэсэфын щхьэкІэ (Псалом 25:4).

Уеджэн ипэ Алыхьым тхьэлъэІукІэ зыхуэгъазэ. Библием итыр Алыхьым и гупсысэхэращи, гъэщІэгъуэнкъым абы итыр къыбгурыІуэн щхьэкІэ ар къыбдэІэпыкъун зэрыхуейр. Алыхьым дыкъегъэгугъэ делъэІумэ и къару лъапІэр къыдитыну (Лука 11:13). Алыхьыр и къару лъапІэмкІэ къыддэІэпыкъунущ абы и гупсысэкІэр къэтщІэну. Зэман дэкІмэ, Алыхьым и Псалъэм итыр и къару лъапІэмкІэ куууэ къыбгуригъэІуэнущ (1 Коринф 2:10).

Узэджэм куууэ егупсыс. Нэхъыбэ седжэнщ жыпІэу умыпІащІэ. Узэджэм егупсыс. Мыпхуэдэ упщІэхэр зэтыж: «Сызэджа пычыгъуэм зи гугъу ищІ цІыхум сыт хуэдэ хьэл-щэнхэр хэлъу гу лъыста? Абы и щапхъэм сытым сыхуигъасэрэ?»

Мурад пыухыкІахэр гъэув. Библием ущеджэкІэ зэманыр лейуэ бгъакІуэу къыпщымыхъун щхьэкІэ, уи гъащІэр нэхъыфІ зыщІын гупсысэхэр абы къыщылъыхъуэ. Мыпхуэдэ мурадхэр зыхуэбгъэувыж хъунущ: Алыхьым теухуауэ нэхъыбэ къэпщІэну, уи щытыкІэмрэ, уи хьэл-щэнымрэ пхъуэжыну е щхьэгъусэфІ ухъуну. ИужькІэ а мурадхэр къохъулІэну къыбдэІэпыкъуну едзыгъуэхэр Библием къихa.

Мы чэнджэщитхур къыбдэІэпыкъунущ еджэн щІэбдзэну. Ауэ абы удихьэхыу уеджэну сыт къыбдэІэпыкъуныр? КъыкІэлъыкІуэ статьям абы дыщытепсэлъыхьынущ.