ЦІыхум епт хъуну упщІэ тыншыр

Мариерэa абы и щхьэгъусэ Джонрэ щыпсэу къэралым Филиппины къикІыу цІыху куэд щылэжьэну къокІуэ. Абыхэм щыщ куэдыр хъыбарыфІым яфІэгъэщІэгъуэну йодаІуэ. COVID-19 пандемие зэманым Марие щІыпІэ зэмылІэужьыгъуэхэм щыпсэу цІыху зыбжанэ Библием иригъаджэу щІидзащ. Дапхуэдэу абы ар къызэрехъулІар?

Марие Библием иригъаджэхэм мыпхуэдэу еупщІт: «Иджыри Библием еджэну хуей гуэр умыцІыхуу пІэрэ?» ЯцІыхуу жаІэмэ, абы мыпхуэдэу пищэт: «Ахэр сомыгъэцІыхуфыну пІэрэ?» Апхуэдэ упщІэ тыншхэм ехъулІэныгъэ къыпэкІуэфынущ, сыт щхьэкІэ жыпІэмэ Алыхьым и Псалъэр лъапІэу зылъытэхэм абы ит пэжыр я благъэхэми я ныбжьэгъухэми кърагъэщІэну хуейщ. НтІэ, Марие а упщІэр зэритам сыт хуэдэ фІыгъуэхэр къыпэкІуа?

Марие иригъаджэхэм Жасмин и цІэу зы цІыхубз яхэтт. Жасмин и ныбжьэгъуиплІым Библиер яджыну хуейти, ахэр Марие иригъэцІыхуащ. А плІым щыщу Кристинэ зи цІэ цІыхубзым Библие джыныр апхуэдизкІэ игу ирихьати, ар Марие къелъэІуащ тхьэмахуэм тІэу иригъэджэну. Ди шыпхъум а упщІэ дыдэр Кристини щритам, абы жиІащ Библиер зыфІэгъэщІэгъуэн хъун ныбжьэгъухэр зэриІэр. Тхьэмахуэ зыбжанэ дэкІа иужь Кристинэ и ныбжьэгъухэр Марие иригъэцІыхуащ — япэщІыкІэ цІыхуиплІ, иужькІэ иджыри зыбжанэ. Абыхэм щыщ гуэрхэми Марие къыжраІащ Библием итыр къэзыщІэну хуей ныбжьэгъу зэраІэр.

Кристинэ хуейт Филиппины щыІэ и унагъуэм щыщхэми Библиер яджын щІадзэну. Арати, ар ипхъу Адриа́нэ епсэлъащ. Япэ щІыкІэ Адрианэ и гугъэт Иеговэ и Щыхьэтхэр сектэ гуэру, Хьисэ я фІэщ мыхъуу икІи Инджылыр къамыгъэсэбэпу. Ауэ Библиер иджын зэрыщІидзэу абы къыгурыІуащ ар апхуэдэу зэрыщымытыр. Библие джыгъуэ къэс Адрианэ щІэ гуэр къищІэт икІи мыпхуэдэу жиІэт: «Библием апхуэдэу щиткІэ, ар пэжщ!»

Куэд дэмыкІыу Адрианэ и ныбжьэгъуитІымрэ къыдэлажьэ зы цІыхубзымрэ Марие иригъэцІыхуащ икІи абыхэми Библиер яджу щІадзащ. Абы нэмыщІ Адрианэ Анже́лэ и цІэу адэшыпхъу иІэт, абы и нэм илъагъуртэкъым. Адрианэ Библием щрагъаджэкІэ Анжелэ и гъусэу щІэст икІи ар Марие ищІэххэтэкъым. Анжелэ Марие и гъусэу Библиер иджыну хуейти, ар Адрианэ елъэІуащ Марие иригъэцІыхуну. Анжелэ къищІэр хуабжьу игу ирихьт. Абы Библием щыщ едзыгъуэ куэд гукІэ зригъэщІат икІи ар Марие елъэІуащ тхьэмахуэм плІэ иригъэджэну. Адрианэ зыдигъэІэпыкъуурэ ар зэІущІэхэм видеосвязькІэ къыхыхьэу щІидзащ.

Кристинэ Библием щрагъаджэкІэ жаІэхэр абы и щхьэгъусэ Джо́шуа зэхихт. Ар Марие къыщищІам Джошуа жриІащ ари къэтІысыну, ауэ Джошуа жиІащ: «Сэ ауэ седэІуэну аращ, упщІэ лъэпкъ къызэвмыт, фыкъызэупщІу щІэвдзэмэ, занщІэу сыІукІыжынущ». Ауэ къызэрытІысрэ дакъикъитху нэхъ дэмыкІыу Кристинэ нэхърэ нэхъыбэу абы упщІэ иту щІидзащ икІи Библиер иджыну гукъыдэж иІэ хъуащ.

А упщІэ тыншым и фІыгъэкІэ Марие Библиер зыджыну хуей куэд къигъуэтыфащ. ИужькІэ абы иригъаджэхэм щыщ цІыху зыбжанэ нэгъуэщІ къуэш, шыпхъухэм иритыжащ. Псори зэхэту Марие къэралиплІым щыщу цІыху 28 Библием иригъаджэу щІидзащ.

Марие япэу иригъэджа Жасмин 2021 гъэм, апрелым псым зыщІигъэуащ. Абы иужь Кристинэ 2022 гъэм, майм псым зыщІигъауэри, и унагъуэм деж Филиппины игъэзэжащ. Мазэ зыбжанэ дэкІа иужь Анжели псым зыщІигъэуащ икІи иджыпсту ар общэ пионеру мэлажьэ. Кристинэ Марие иригъэцІыхуа цІыхубзитІми псым зыщІагъэуащ. Кристинэ и щхьэгъусэ Джошуэ, абыхэм япхъу Адрианэ, абы нэмыщІ нэгъуэщІхэми Библиер адэкІэ ядж икІи Иеговэ нэхъ гъунэгъу хуэхъун щхьэкІэ лъэбакъуэхэр яч.

Япэ лІэщІыгъуэм цІыхухэр хъыбарыфІымкІэ я благъэхэмрэ я ныбжьэгъухэмрэ зэрыдэгуашэм и фІыгъэкІэ пэжым псынщІэу зиубгъут (Ин. 1:41, 42, япэ Іыхьэр; Апост. 10:24, 27, 48; 16:25—33). Фэри Библием евгъаджэхэмрэ хъыбарыфІыр зыфІэгъэщІэгъуэнхэмрэ мыпхуэдэу феупщІ хъунущ: «Иджыри Библием еджэну хуей гуэр умыцІыхуу пІэрэ?» Хэт ищІэрэ, а упщІэ тыншым и фІыгъэкІэ фэри Библием еджэну хуей куэд къэвгъуэтынкІэ хъунущ.