ФщІэуэ пІэрэ?
Сыт Даут и зауэлІхэм хамэ лъэпкъхэм щыщ щІыхэтар?
ДАУТ и зауэлІхэм нэгъуэщІ лъэпкъхэм щыщ цІыхухэри хэтт. Псалъэм папщІэ, абы и зауэлІхэм хэтт аммон лъэпкъым щыщу Целек, хетт лъэпкъым щыщу Урие, моав лъэпкъым щыщу Итма (1 Лет. 11:39, 41, 46)a. Абы нэмыщІ Даут и гъусэт «керетейхэр, пелетейхэр, гатянхэри» (2 Сам. 15:18). ЗэрабжымкІэ, керетейхэмрэ пелетейхэмрэ филистямлянхэм я благъэ гъунэгъу дыдэу щытт (Иез. 25:16). Гатянхэм я гугъу пщІымэ, ахэр филистим къалэ Гатым щыщт (Иис. Н. 13:2, 3; 1 Сам. 6:17, 18).
Сытыт Даут и зауэлІхэм хамэ лъэпкъхэм щыщ цІыхухэр щІыхигъэхьэр? Даут абыхэм апхуэдизкІэ дзыхь яхуищІти, шэч къытрихьэтэкъым Иегови зэрагъэпэжынум, езыри къызэрагъэпэжынум. Псалъэм папщІэ, Библием тепсэлъыхь зы справочник гуэрым керетейхэмрэ пелетейхэмрэ теухуауэ мыпхуэдэу итщ: «Даут и пащтыхьыгъуэм къыхуихуа зэман нэхъ гугъу дыдэхэм щыгъуэ ахэр абы къыдэІэпыкъуащ» (The New Interpreter’s Dictionary of the Bible). Дапхуэдэу? «Израил цІыхухэм псоми Даут къагъанэу» зыкъэзыІэта Шевэ гуэува иужь, керетейхэмрэ пелетейхэмрэ пащтыхьым дэІэпыкъуащ абыхэм ятекІуэну (2 Сам. 20:1, 2, 7). ИужькІэ Даут и къуэ Адоние пащтыхьыгъуэр иубыдыну мурад ищІат. Ауэ абы щыгъуи керетейхэмрэ пелетейхэмрэ Даут хуэпэжу къэнащ икІи пащтыхьыгъуэр Сэлмэн къыІэрыхьэну дэІэпыкъуащ, сыт щхьэкІэ жыпІэмэ Иеговэ пащтыхьу къыхихар арат (1 Цар. 1:24—27, 38, 39).
Абы нэмыщІ Гат щыщ Иттаи гурэ псэкІэ Даут хуэпэжу щытащ. Абырэ и зауэлІ 600-мрэ пащтыхьым и лъэныкъуэр яубыдауэ щытащ, Авессалом израил цІыхухэр къызэщІигъэсту и адэм щыпэщІэувэжам щыгъуэ. Иттай хамэ лъэпкъым щыщт икІи абы и къалэнтэкъым пащтыхьым и гъусэу зэуэну. Даут ар дыдэр Иттай жриІат. Ауэ абы мыпхуэдэ жэуап къритыжащ: «Алыхь пэж ИеговэкІэ тхьэ соІуэ икІи уи гъащІэмкІи тхьэ соІуэ, зиусхьэну си пащтыхь! УздэщыІэм уи пщылІри щыІэнщ, уеблэмэ уи гъусэу си псэр стыныуи сыхьэзырщ!» (2 Сам. 15:6, 18—21).
Иттай Иеговэ пащтыхьу къыхиха Даут хуэпэжу щытащ
Керетейхэр, пелетейхэр икІи гатянхэр израил лъэпкъым щыщу щымытами, абыхэм къагурыІуэт Иеговэ Алыхь пэжу зэрыщытыр икІи абы Даут пащтыхьу къызэрыхихар. ДауикІ, Даут фІыщІэ ищІт дзыхь зыхуэпщІ хъун цІыху куэд зэригъусэр!
a Второзаконие 23:3—6 зэритымкІэ, аммонитянхэри моавитянхэри хуиттэкъым Иеговэ и лъэпкъым щыщ хъуну. Абы къикІыу къыщІэкІынут Алыхьым и лъэпкъым иІэ хуитыныгъэ псори абыхэм зэрамыгъуэтынур. Ауэ ахэр хуитт израил лъэпкъым хэтыну икІи я гъусэу псэуну. Феплъ «Понимание Писания» жыхуаІэм, япэ томым, 80-нэ напэкІуэцІым.