ФщІэуэ пІэрэ?

Филипп хъыбарыфІыр зыхуиІуэта Ефиопием щыщ къулыкъущІэр сыт хуэдэ шыгу зэрысар?

ДУНЕИЩІЭКІЭ зэджэ Библием «колесница» жаІэу зэрадзэкІа алыджыбзэ псалъэмкІэ шыгу зэмылІэужьыгъуэхэм йоджэ (Апост. 8:28, 29, 38). Ефиопием щыщ къулыкъущІэр зэрыса шыгур нэхъ ину щытауэ къыщІэкІынущ, зауэм хуащІа е зэдэжэныгъэм къыщагъэсэбэпу щыта шыгухэм нэхърэ. Апхуэдэу дыщІегупсысым и щхьэусыгъуэ зыбжанэм деплъынщ.

Ефиопием щыщ къулыкъущІэм увыпІэ лъагэ иІэт икІи ар гъуэгуанэ кІыхь тетт. А лІыр Ефиопием и пащтыхь гуащэ Кандакие хуэлажьэ Іэтащхьэхэм ящыщт, къэрал мылъкури и ІэмыщІэ илът (Апост. 8:27). Пасэрей зэманым щыІа Ефиопием хыхьэт иджыпсту щыІэ Судан къэралым и щІыналъэмрэ Мысырым ипщэ лъэныкъуэмкІэ щыІэ щІыналъэмрэ. А лІыр гъуэгуанэ кІыхь тетыху, шыгу зэмылІэужьыгъуэ ихъуэжауэ, зыхуэныкъуэ хьэпшыпи иІыгъауэ къыщІэкІынщ. Ди эрэм и япэ лІэщІыгъуэм цІыхухэр кърашэкІын щхьэкІэ шэрхъиплІ зыщІэт, щхьэ зытелъ шыгухэри къагъэсэбэпу щытащ. Апостолхэм тхылъым тепсэлъыхь зы тхылъымa щыжыІащ: «Апхуэдэ шыгум Іэмал къыуитт хьэпшып нэхъыбэ къыздэпщтэну икІи гъуэгури нэхъ тынш ищІт. Абы и фІыгъэкІэ цІыхум гъуэгуанэ нэхъ кІыхь зэпичыфт».

Ефиопием щыщ къулыкъущІэр свитокым еджэт, Филипп абы къыщепсэлъам щыгъуэ. Библием зэрыжиІэмкІэ, Филипп «гум бгъурыхьэри, а лІыр [къулыкъущІэр] Ешайа бегъымбарым и тхылъым зэреджэр» зэхихащ (Апост. 8:30). Гъуэгуанэ кІыхь теувэ шыгухэр псынщІэу кІуэн хуэдэу ящІтэкъым. Абы къыдгурегъаІуэ къулыкъущІэр гъуэгу здытетым еджэфу щІыщытар икІи Филипп абы щІыкІэлъысыфар.

Ефиопием щыщ къулыкъущІэр Филипп елъэІуащ: «КъыдэкІуеи, къызбгъэдэтІысхьэ», — жиІэри (Апост. 8:31). Зэдэжэныгъэм хуащІа шыгухэм уисыфынутэкъым, абыхэм узэфІэту уитын хуейт. Ауэ гъуэгуанэ кІыхьым хуащІа шыгухэр Іэхуитлъэхуитти, аращ къулыкъущІэмрэ Филиппрэ абы хуиту щІисар.

Апостолхэм тхылъым и 8-нэ псалъащхьэмрэ тхыдэм къытхузэІуихымрэ ипкъ иткІэ, Ефиопием щыщ къулыкъущІэр зэрыса шыгур иужьрей зэманым дэ сурэтхэм къызэрыщыдгъэлъагъуэр нэгъуэщІущ. А шыгур зауэм хуащІахэмрэ зэдэжэныгъэм къыщагъэсэбэп шыгухэм нэхърэ нэхъ ину щытащ.