ПщІэуэ пІэрэ?

Израил лъэпкъыр Мысырым гъэру щыІауэ Библием итщ. ЩІэныгъэлІхэм къахута сыт хуэдэ Іуэхугъуэхэр абы щыхьэт техъуэрэ?

Библием зэрыжиІэмкІэ, мадиан цІыхухэм Исуф Мысырым яша иужь, и адэ Екъуб Ханаан щІыналъэм къикІри и унагъуэр и гъусэу абы Іэпхъуащ. Ахэр Гощэн (Гесем) щІыналъэм итІысхьащ, Нил псым и дельтэм деж (Нил псыр зэхэкІыу, Средиземнэ Хым щыхэлъадэ щІыпІэшхуэм Нилым и дельтэкІэ йоджэ) (ЩІэдз. 47:1, 6). Израил цІыхухэм я бжыгъэр псынщІэу хэхъуэт икІи «ахэр кІуэтэхукІэ нэхъ къарууфІэ хъут». Апхуэдэу зэрыхъум мысыр цІыхухэр игъэгузавэти, израил цІыхухэр ягъэпщылІу щІадзащ (Исх. 1:7—14).

Языныкъуэ цІыхухэм абы теухуауэ Библием итыр я фІэщ хъукъым икІи ар шыпсэу жаІэ. Ауэ пасэрей зэманым щыгъуэ Мысырым пщылІу щыІа цІыхухэм семитхэрa хэту зэрыщытам щыхьэт техъуэ Іуэхугъуэхэр щыІэщ.

Псалъэм папщІэ, археологхэм къагъуэтащ Мысырым и ищхъэрэ лъэныкъуэмкІэ цІыхухэр щыпсэуа щІыпІэхэр. Библием елэжь Джон Би́мсон зэрыжиІэмкІэ, семитхэр щыпсэуауэ нэхъ мащІэ дыдэу щІыпІэ 20 къагъуэтащ. Мысырым и тхыдэм елэжь Джеймс Хоффма́йер жеІэ: «Ди эрэм ипэ, 1800 гъэм щыщІэдзауэ, 1540-нэ гъэм нэсыху КъухьэпІэ Азием къикІыурэ (Екъуб и унагъуэр къыздикІам) семит лъэпкъхэр Мысырым щІэх-щІэхыурэ Іэпхъуэт... А зэманыр Ибрэхьим, Исхьэкъ икІи Екъуб сымэ щыпсэуа зэманыращ, абы къыхэкІкІэ а зэманыр тохуэ ЩІэдзапІэ тхылъыр зытепсэлъыхь зэманымрэ зи гугъу ищІ Іуэхугъуэхэмрэ».

Библием итыр зэрыпэжым щыхьэт техъуэ нэгъуэщІ Іуэхугъуи щыІэщ — Мысырым ипщэ лъэныкъуэмкІэ папирус къыщагъуэтащ. Ар «период Среднего царства» жыхуаІэ зэманым ятхауэ ябж (хуэгъэфэщауэ ди эрэм ипэ 2000 гъэм щыщІэдзауэ 1600 гъэм нэс). Мысырым ипщэ лъэныкъуэмкІэ щыІа зы цІыху гуэрым и щІапІэм щылажьэу щыта пщылІхэм я цІэхэр абы итщ. А цІэхэм ящыщу 40-р семит цІэщ. А пщылІхэр пщафІэт, щэкІ ящІт икІи нэгъуэщІ лэжьыгъэ хьэлъэхэр ягъэзащІэт. Джеймс Хоффмайер мыпхуэдэ гупсысэм къыхуэкІуащ: «Фиваи́дэ [Мысырым ипщэ лъэныкъуэмкІэ] щыІа зы щІапІэ закъуэм семиту 40-м щІигъу щылэжьакІэ, къэрал псом апхуэдэ пщылІхэр куэду щыІэу къыщІэкІынт, псом хуэмыдэу Нилым и дельтэмкІэ».

Археолог Дэвид Рол итхащ: «Языныкъуэ пщылІхэм я цІэхэр Библием къихам хуэдэщ». Псалъэм папщІэ, Библием ит Иссашхар, Ащэр икІи Шифрэ цІэхэм ещхь цІэхэм папирусым ущрохьэлІэ (Исх. 1:3, 4, 15). «Ар щыхьэт тохъуэ израил цІыхухэр Мысырым пщылІу зэрыщыІам»,— жеІэ Дэвид Рол.

Джон Бимсон жеІэ: «Израил цІыхухэр Мысырым щыІауэ икІи абы къикІыжауэ Библием ит псалъэхэм тхыдэм тегъэщІа лъабжьэ быдэ яІэщ».