Хэт хъуну Алыхьыр?

Куэдым Алыхьыр я фІэщ мэхъу. Ауэ, «Хэт хъуну Алыхьыр?» жыпІэу абыхэм уеупщІмэ, жэуап зэмылІэужьыгъуэхэр зэхэпхынущ. Языныкъуэхэм я гугъэщ Алыхьыр ткІийуэ икІи цІыхухэм тезыр щІатрилъхьэн зэпымыууэ къилъыхъуэу. НэгъуэщІхэм зэрыжаІэмкІэ, абы псори фІыуэ елъагъу икІи псори игъэгъуну хьэзырщ. Алыхьым дыкъыфІэмыІуэхуу зылъытэхэри щыІэщ. ЦІыхухэм яІэ еплъыкІэхэр апхуэдизу зэрызэтемыхуэм къыхэкІыу куэдым я гугъэщ Алыхьым теухуа пэжыр къыпхуэмыщІэну.

А Іуэхур зэхэгъэкІын хуей? Хуейщ. Алыхьым теухуа пэжыр зэрыпщІэм уи гъащІэм купщІэ къыхилъхьэфынущ (Апостолхэм 17:26—28). Алыхьым нэхъ гъунэгъу ухуэхъуху, абы нэхъыфІу укъилъагъунущ икІи къызэрыбдэІэпыкъур зыхэпщІэнущ (Екъуб 4:8). Абы нэмыщІ Алыхьым теухуа пэжым гъащІэ мыухыж къыпхуихьыфынущ (Иуан 17:3).

Алыхьым теухуа пэжыр дауэ къэтщІа хъуну? Псалъэм папщІэ, уи ныбжьэгъур къапщтэмэ, дауэ фэ ныбжьэгъу фызэрызэхуэхъуар? Япэрауэ, абы и цІэр къыбжиІащ. Абы нэмыщІ сыт абы фІыуэ илъагъуми, сыт и ІэщІагъэми икІи сыт хуэдэ мурадхэр иІэми уэ къэпщІащ. НэхъыфІу фызэрыцІыхуащ икІи абы и фІыгъэкІэ фэ ныбжьэгъу фызэхуэхъуащ.

Алыхьыр нэхъ гъунэгъуу къэтцІыхун щхьэкІэ мыпхуэдэ упщІэхэм дыхэплъэнщ:

• ХЭТ АЛЫХЬЫМ И ЦІЭР?

• ХЭТ ХЪУНУ АЛЫХЬЫР?

• СЫТ АБЫ ИЩІЭР?

• ДЯПЭКІЭ СЫТ АБЫ ИЩІЭНУР?

• АЛЫХЬЫМ ТЕУХУА ЩІЭНЫГЪЭМ СЫТ ХУЭДЭ СЭБЭПЫНАГЪ КЪЫПХУИХЬЫНУР?

Мы упщІэхэм Тхыгъэ ЛъапІэ Библием ирит жэуапхэр мы журналым итщ. КъыкІэлъыкІуэ статьяхэм къыщыпщІэнущ Алыхьыр хэт хъунуми икІи абы ныбжьэгъу ухуэхъумэ абы къыпхуихьыну сэбэпынагъыр.