УнафэщІ гупым къыбгъэдэкІ псалъэ
Еврейхэм 5:12 (ДЩІ) щыжыІащ: «Фэ егъэджакІуэу фыщытын хуейщ». Дауэ къыпщыхъурэ, Иеговэ нэхърэ нэхъ егъэджакІуэфІ зыри щыІэкъым икІи дэ абы дзыхь къытхуищІащ нэгъуэщІ цІыхухэр едгъэджэну! Унагъуэм, зэхуэсым е хъыбарыфІыр щыбгъэІукІэ цІыхухэр Иеговэ теухуа пэжым хуебгъэджэным пщІэшхуэ пылъщ икІи ар мыхьэнэшхуэ зиІэ къалэнщ.
А къалэныр дауэ фІыуэ дгъэзэщІа хъунуми Паул Тимофей жриІа псалъэхэм къыщыдощІэ: «Тхьэм и псалъэ тхахэм цІыхухэм я пащхьэм уакъызэрыщыхуеджэнми, цІыхухэм зэрагурыбгъэІуэнми, зэребгъэщІэнми хэт». АдэкІэ Паул пищащ: «Апхуэдэу пщІэмэ, къодаІуэ цІыхухэр мыкІуэду къебгъэлынущ, уэ уи щхьэри мыкІуэду къебгъэлынущ» (1 Тим. 4:13, 16). Дэ цІыхухэм дазэрыдэгуашэ хъыбарым я гъащІэр къригъэлыфынущ. Абы къыхэкІкІэ дэ дызэреджэмрэ нэгъуэщІхэр зэредгъаджэмрэ едгъэфІэкІуэным мыхьэнэшхуэ иІэщ. Апхуэдэу зэребгъэфІэкІуэнумкІэ мы брошюрэр къыбдэІэпыкъунущ, икІи ар зэрызэхэлъ щІыкІэм деплъынщ.
НапэкІуэцІ къэс къыщыхьа Библием щыщ пычыгъуэр — ар дджы урокым хэт гупсысэ нэхъыщхьэр къыхэзыгъэщ принципщ, е ар къызэрыбгъэсэбэп хъунум и щапхъэщ.
Иеговэ — «УщиякІуэшхуэщ» (Ис. 30:20). Мы брошюрэр уэ къыбдэІэпыкъунущ узэреджэри нэгъуэщІхэр зэребгъаджэри ебгъэфІэкІуэну. Ауэ цІыхухэр зыбгъэдэзышэр езы Иеговэу зэрыщытыр икІи мы хъыбарыр абы къызэрыбгъэдэкІыр зыщомыгъэгъупщэ (Ин. 6:44). Абы къыхэкІкІэ Иеговэ и къару лъапІэр къыуитыну нэхъыбэрэ елъэІу. ЩІэх-щІэхыурэ и Псалъэ Библиер къэгъэсэбэп. Уи щхьэм гулъытэ хуомыгъэщІу, Иеговэ гу зэрылъебгъэтэным иужь ит. КъодаІуэхэм Алыхьым лъагъуныгъэ быдэ хуащІыну ядэІэпыкъу.
ЦІыхубэм зэхаха хъыбархэм ящыщу нэхъ мыхьэнэшхуэ зиІэ хъыбарыр бгъэІуну уэ дзыхь къыпхуащІащ. Дэ шэч къытетхьэкъым Алыхьым къыдит къарум ущыгугъыу щытмэ, ехъулІэныгъэ уиІэу а Іуэхур зэрыбгъэзэщІэнум! (1 Пет. 4:11).
Уэ пхуэдэу хъыбарыфІыр зыгъэІу,
Иеговэ и Щыхьэтхэм я УнафэщІ гуп