Ũtethyo Kwondũ wa Ala Matonaa
Ũkunĩkĩli wonanĩtye kana ĩũlũ wa nthĩ yonthe, andũ milioni 43 mayonaa na angĩ milioni 295 methĩawa na mathĩna ma kwona.a Ũndũ wa kũmakya nĩ kana, aingĩ moo makuawa naĩ.
Ngai ethĩawa na woni mwaũ ĩũlũ wa andũ ala matonaa? Nĩ kyaũ Mbivilia ĩwetete ĩũlũ woo? Na Ngũsĩ sya Yeova imatetheeasya ata ũmũnthĩ?
Woni ũla Ngai wĩthĩawa nawʼo ĩũlũ wa andũ ala matonaa
Mbivilia nĩyonanĩtye kana Yeovab nũthĩnĩkĩaa mũno ala matonaa. Nĩwendaa makuwe nesa na maitetheka nĩ momanyĩsyo make. O na ĩngĩ, nũmanengete wĩkwatyo mũseo wa ĩvinda yũkĩte.
Ĩandĩko: “Nĩ mũumanĩe mũndũ ũla ũtumaa kĩlalinda kĩvĩtya nzĩa.”—Kũtũngĩlĩĩlwa kwa Mĩao 27:18.
Kĩla yonanasya: Ĩvindanĩ ya tene, Mwĩao ũsu nĩwasũvĩaa ala matoonaa maikakuwe naĩ.
Ĩandĩko: “Ngai nde kyende.”—Meko ma Atũmwa 10:34.
Kĩla yonanasya: Ngaĩ nĩwonaa andũ onthe me ma vata mũno.
Ĩandĩko: Yesũ “[nĩwanengie] andũ aingĩ ala maĩ ilalinda mũthĩnzĩo wa kwona.”—Lũka 7:21.
Kĩla yonanasya: Yĩla Yesũ wasalukilye metho ma ala matonaa yĩla waĩ vaa ĩũlũ wa nthĩ, oonanisye kĩla Ũsumbĩ wa Ngai ũkeanĩsya ĩvindanĩ yũkĩte.
Ĩandĩko: “Metho ma ilalinda makasalukwʼa.”—Ĩsaĩa 35:5.
Kĩla yonanasya: Yeova athanĩte kana o mĩtũkĩ, yĩla Ũsumbĩ wa Ngai ũkasumbĩka ĩũlũ wa nthĩ, ala matonaa makoona.
Ũndũ Ngũsĩ sya Yeova itetheesye
Ithyĩ Ngũsĩ sya Yeova, nĩtũtavasya ala matonaa ĩũlũ wa nthĩ yonthe ũvoo wa wĩkwatyo kuma kwa Ngai. Twĩanĩasya ata ũndũ ũsu?
Nĩtumĩthasya Mbivilia o vamwe na mavuku ma kwĩmanyĩsya Mbivilia na vitio kwondũ wa ala matonaa na ala methĩawa na thĩna wa kwona, mũandĩko wa ala matonaa, mũandĩko mũnene kwa ala methĩawa na thĩna wa kwona na wasya ũlekotiĩtwe.
Nĩtwĩthĩawa na maũmbano ma Kĩklĩsto kĩla kyumwa, na tũthokasya andũ onthe o na ala matonaa.
Nĩtwĩthĩawa na mũvango wa kwĩmanyĩasya Mbivilia na mũndũ ũmwe ũmwe twenene.c
Vai kĩndũ ũĩvaa nĩ kana ũtetheke nĩ maũndũ asu. Nĩkĩ? Nũndũ Yesũ atwĩaĩie atĩĩ: “Mwanengiwe mana, nenganai mana.”—Mathayo 10:8.
Ngũsĩ sya Yeova nithĩnĩkĩaa kuma ngoonĩ ala matonaa. Ala mekwenda kũmũthaitha Ngai vamwe naitũ nĩmakwataa anyanya aseo ala mamatetheeasya. Soma ngewa sya amwe ma Ngũsĩ sya Yeova matonaa.
Mwĩĩtu-a-asa wĩtawa Talita Alnashi, kuma Sweden, asyaiwe e na thĩna wa kwona. Soma wone ũndũ asyai make mamũmanyĩisye Mbivilia, na ũndũ we na mũsyĩ wake mendetwe na matetheeawʼa nĩ anyanya moo.
Mwana-a-asa James Ryan kuma Amelika, asyaiwe ate kwĩwʼa na ĩtina aeka kwona. Soma wone nĩ kyaũ kĩtumaa ekala e mũtanu na e mwĩanĩe.
Mwĩĩtu-a-asa Cynthia Pablo, kuma Philippines, ndonaa na ndewʼaa. Athaithi ala angĩ mamũtetheeisye ata ĩvindanĩ ya ũwau wa COVID-19? Soma kĩlungu kĩna kyongo “Kutaniko Lamsaidia Dada Ambaye Ni Kiziwi na Kipofu Wakati wa Ugonjwa wa Corona.”
Nĩ syĩndũ syĩva tũtũmĩaa kũmanyĩsya Mbivilia?
Mavuku ma mũandĩko wa ala matonaa. Nĩtũtumbĩthasya Mbivilia ya mũandĩko wa ala matonaa yĩ nima kana ĩte nima, kwa ithyomo siana ũna. (Sisya ithyomo imwe nthĩnĩ wa ĩsandũkũ “Mbivilia ya Ũalyũlo wa Nthĩ Nzaũ ya Mũandĩko wa Ala Matonaa.”) O na ĩngĩ, nĩtumĩthasya mavuku maeleetye Mbivilia ma mũandĩko wa ala matonaa. Kwa ala matonya kwenda kwĩmanyĩsya mũandĩko wa ala matonaa, nĩtumĩthasya kavuku ketawa Learn to Read Braille. Kaseũvĩtwʼe katetheesye mũndũ ũla ũtonaa emanyĩsye kũsoma atetheewʼe nĩ mũndũ wonaa.
No ũkwate mavuku ma mũandĩko wa ala matonaa kwa kũneena na ũmwe wa Ngũsĩ sya Yeova kana ũkũlye ũthokewe.
Umya files ũtonya kũtũmĩa kamasinĩnĩ ka kũũtetheesya kũandĩka maũndũ ala ma vata nthĩnĩ wa jw.org.d
Mavuku ma mũandĩko mũnene na ũvoo wĩ kĩsesenĩ wĩ na namba nene. Mavuku maingĩ maitũ ma mũandĩko mũnene nĩmakwatĩkanaa kwondũ wa ala methĩawa na thĩna wa kwona. Kĩsese kitũ kya jw.org kĩseũvĩtwʼe ũkethĩa o na mũndũ aninĩvya ndeto, no ethĩwe atonya kwona kĩla kĩndũ nesa. O na ĩngĩ, wĩthĩawa ũtonya kũnenevya kana kũninĩvya ndeto sya mavuku nthĩnĩ wa JW Library.
Nĩ kana ũkwate mavuku ma mũandĩko mũnene neena na ũmwe wa Ngũsĩ sya Yeova kana ũkũlye ũthokewe.
Umya mavuku ma mũandĩko mũnene kĩsesenĩ kya jw.org, mavwʼanene na ala matumbĩthye.
Mavuku malekotiĩtwe. Mbivilia ya Ũalyũlo wa Nthĩ Nzaũ nĩlekotiĩtwe kwa ithyomo mbee wa 200. O na ĩngĩ, nĩtwĩthĩawa na mavuku ma kũmanyĩsya Mbivilia malekotiĩtwe. Mavinda maingĩ syĩndũ isu ilekotiĩtwe nĩsyĩthĩawa na maelesyo ma visa.
Thaũka ĩmwe kwa ĩmwe syĩndũ ila ilekotiĩtwe kana umye wasya ũla ũlekotiĩtwe kĩsesenĩ kya jw.org na JW Library.
Umya syĩndũ sya kũũsomea kĩndũ kĩla kĩandĩkĩtwe ta ila syĩtawa screen reader na digital talking book player kĩsesenĩ kya jw.org.e
Vitio syĩ na maelesyo.f Ngũsĩ sya Yeova nĩsyumĩthasya vitio ieleetye Mbivilia syĩ na maelesyo kwa ithyomo mbee wa 100. Vitio isu nitetheeasya andũ kũelewa na kũtũmĩa ũtao ũla wĩ Mbivilianĩ.
No wĩthukĩĩsye ngelekanyʼo ya vitio syĩ na maelesyo nthĩnĩ wa vitio iatĩanĩe syĩ na syongo ii iatĩĩe:
Maũmbano. Nĩtwĩthĩawa na ikundi ĩũlũ wa nthĩ yonthe na tũmbanaa kĩla kyumwa nĩ kana tũthaithe na tũyĩmanyĩsya Mbivilia. O na ĩngĩ, nĩtwĩthĩawa na maũmbano manene kĩla mwaka nĩ kana tũmanyĩwʼe Mbivilia. Maũmbanonĩ manene ala methĩawa na vitio, nĩtũtataa ũndũ tũtonya nĩ kana vitio isu syĩthĩwe na maelesyo. Na vatonyeka, nĩvethĩawa na mũndũ wa kũalyũlĩla ala matonaa na matewʼaa maũmbanonĩ ma kĩkundi na maũmbanonĩ manene. Inywʼonthe mwĩ athokye na tũivathũlaa mũndũ o na wĩva.
Mantha vala vekĩawa maũmbano ma kĩkundi.
Ĩmanyĩsye ĩũlũ wa maũmbano maitũ manene ala twĩkaa kĩla mwaka.
Ũka Ũmbanonĩ wa Kũlilikana Kĩkwʼũ kya Yesũ, ũla nĩwʼo ũmbano wa vata vyũ twĩkaa kĩla mwaka.
Mwana-a-asa José Luis Ayala ekalaa Mexico. Asyaiwe ate kwona na aeka kwĩwʼa e na myaka 29. Ĩmanyĩsye wone ũndũ maũmbano maitũ ne ma vata kwake, na ũndũ watetheeiwʼe kũtwʼĩka mũmanyĩsya mũseo wa Mbivilia.
a Mũndũ ũla wĩthĩawa na “mathĩna ma kwona nesa” ethĩawa na thĩna ũtatonya kũvowʼa na kĩu kĩtumaa ateka maũndũ make ma kĩla mũthenya nesa. Kĩlungunĩ kĩĩ, ndeto “kũlea kwona” syĩonanyʼa mũndũ ũla ũtonaa kana wĩthĩawa na thĩna wa metho.
b Yeova nĩyo ĩsyĩtwa ya Ngai. (Savulĩ 83:18) Sisya kĩlungu kĩ na kyongo, “We Yeova Nũũ?”
c No ũkũlye ũmanyĩwʼe Mbivilia vate ndĩvi.
d Kamasinĩ ka kũandĩka maũndũ kethĩawa katonya kũkuwa na kethĩawa na nthoo iandĩkĩtwe na mũandĩko wa ala matonaa o vamwe na ũtonyi wa kũweta ndeto na wasya. Nĩ kana kamasinĩ kau kaandĩke ndeto na mũandĩko wa ala matonaa, kethĩawa na syĩndũ ũtonya kũtina na syaa ikatheea kana ikambata nĩ kana ũandĩke ndeto. Ethĩwa mũndũ e na kamasinĩ kaũ ndethĩawa na vata wa mathangũ matumbĩthye ma mũandĩko wa ala matonaa.
e Screen reader na digital talking book player isomaa na wasya kĩla kĩandĩkĩtwe kĩoonĩ kana wasya ũla ũlekotiĩtwe. Syĩndũ isu itetheeasya ala mekũitũmĩa kũkwata kĩlungu kĩla mekwenda ĩvukunĩ yĩla meũsoma.
f Maelesyo ma vitio methĩawa ne ndeto ieleetye kĩla kĩendeee kĩoonĩ.