Ĩthĩwa na Kĩkĩo kya Ngai, o ta Ovatia

Ovatia aĩ mũsyaĩĩsya wa nyũmba ya Mũsumbĩ waĩ mũthũku mũno weetawa Aavu, ũla waekie ũthaithi wa Mbaali usũe nthĩ ya Isilaeli. Ĩndĩ o na vailye ũu, Ovatia nĩweemanyĩĩtye kũmũkĩaa Yeova ‘kuma wananĩ wake.’ (1 Asu. 18:​1-13) Kwoou yĩla Yeseveli, ũla waĩ mũka wa mũsumbĩ, waumisye mwĩao athani onthe ma Yeova moawe, Ovatia nĩwamanyie kana nĩwaaĩle kwĩthĩwa na ũkũmbaũ nĩ kana amatetheesye. O na kũtwʼĩka kũvitha mwathani o ũmwe kwaĩ mũisyo mũnene, Ovatia nĩwavithie athani 100 na nĩwamatwaĩaa lĩu ĩvinda yĩla kwaĩ na yũa ĩnene! Kwasũanĩa ũndũ vaĩ vinya mũno wĩana kwĩka ũu evithĩte ndakoneke nĩ athani ma ũvũngũ maana maingĩ ala mathũkũmaa mũsumbĩ na kĩveti kyake.—1 Asu. 18:19.

Ngewa ĩĩ ĩtonya kũtũmanyĩsya kyaũ? O na kũtwʼĩka Ovatia nĩwamũkĩaa Aavu, we amũkĩĩte Ngai mũnango. Kĩu nĩkyatumie ethĩwa na ũkũmbaũ wa kũlikya thayũ wake mũisyonĩ nĩ kana asũvĩe ana-a-asa make. O naitũ no twĩthĩwe na kĩkĩo kya Ngai ethĩwa ũthaithi wa wʼo nũkũnĩtwe maluvuku kũla twĩkalaa. Nguma ĩno ĩkatũtetheeasya kũtwʼĩĩka ana-a-asa na eĩtu-a-asa ala makwatĩtwe nĩ mawetu.