Ũndũ Ũtonya Kũelewa Ngelekanyʼo Ila syĩ Mbivilianĩ

Mavinda maingĩ, Mbivilia ĩtũmĩaa ngelekanyʼo kũelesya ũndũ mũna. Ĩndĩ asomi aingĩ ma Mbivilia nĩmangʼangʼanaa kũsielewa. (Mt. 13:13) Nĩ kyaũ kĩtonya kũũtetheesya ũelewe nesa ngelekanyʼo ila itũmĩĩtwe Mbivilianĩ? Tata kwĩka maũndũ aa:

• Manya ũndũ ũla mũnene nĩ wĩva, na wĩumĩlya visa wĩva kĩlĩkonĩ. Ngelekanyʼo itetheeasya mũndũ kũkũna visa wa ũndũ ũla mũnene kĩlĩkonĩ. Kwa ngelekanyʼo, ĩandĩko ya Ũvuanyʼo 3:3 yĩelekanĩtye kũka kwa Yesũ (ũndũ ũla mũnene) na kũka kwa kĩngʼei (visa).

• Sũanĩa ũndũ visa na ũndũ ũla mũnene itutenyʼe. Tata kũsũanĩa nĩkĩ kĩndũ kĩna kĩelekanĩtwʼe na kĩngĩ na ũndũ itutenyʼe.

• Ĩkĩĩthya kana nĩwaelewa nesa kĩla ngelekanyʼo ĩsu ĩkũmanyĩsya. Mavinda amwe, mũndũ no aeme kũelewa nesa ngelekanyʼo ĩla ĩtũmĩĩtwe, na nũndũ wa ũu, aiema kũelewa ũndũ ũla mũnene. Nthĩnĩ wa ngelekanyʼo ĩsu twoona, Yesũ ndakoka kũngʼea kĩndũ. Vandũ va ũu, ndeto ila ingĩ mũsoanĩ ũsu syonanĩtye kana kũka kwake kũkeethĩwa kũilye ta kũla kwa kĩngʼei nũndũ akooka tũtataĩĩe.