Kyaũya kya Wĩoo kya Mwĩaĩi​—Nĩ Ũlilikano Ũtaĩaa Ngai

AKLĨSTO nĩmeĩaĩwe methĩawe maililikana kĩkwʼũ kya Klĩsto. Ũlilikano ũsu nowʼo wĩtawa “kyaũya kya wĩoo kya Mwĩaĩi.” (1 Akolintho 11:​20, NW) Nĩkĩ kũlilikana kĩkwʼũ kya Yesũ nĩ kwa vata? Kĩkwʼũ kĩu kyaĩle kũlilikanawa ĩndĩĩ na kyaĩle kũlilikanawa ata?

Yesũ Klĩsto ambĩlĩĩilye Ũlilikano ũsu wĩoo wa Vasaka ya Ayuti mwaka wa 33 Ĩ.Y. Vasaka yeethĩawa kĩla mwaka mũthenya wa 14 wa mwei wa Ayuti wĩtawa Nisani. Mwei ũsu wambĩĩa yĩla mwai watisa ĩtina wa kyumwa kya mbee kya Mwei wa 3. Kuma mũthenya ũsu Ayuti matalaa mĩthenya 14 na mũthenya wa Vasaka ũivika. Vasaka yeethĩawa mũthenya ũsu wa 14 syũa yathũa.

Yesũ aĩye Vasaka na atũmwa make, na amina kũmwĩa Yutasi Isikaliote aumaale, ambĩlĩĩlya Kyaũya kya Wĩoo kya Mwĩaĩi. Kyaũya kĩu nĩkyo kyambĩĩie kũlilikanawa vandũ va Vasaka. Kwoou kyaĩle kũlilikanawa o ĩmwe kĩla mwaka.

Ĩvuku ya Ũvoo Mũseo ya Mathayo yaĩtyʼe ũũ: “Yesũ oosa kĩmũtũ, akĩathima, na akĩtilanga; na anenga amanyĩwʼa, na asya, Osai, mũye; kĩĩ nĩkyo mwĩĩ wakwa. Na oosa kĩkombe, na atũnga mũvea na amanenga, akyasya, Nywʼai inywʼonthe; nũndũ ĩno nĩyo nthakame yakwa ya ũtianĩo, ĩla ĩĩtĩkwʼa kwondũ wa aingĩ kwa ũekeo wa naĩ.”​—⁠Mathayo 26:​26-​28.

Andũ amwe maĩkĩĩaa Yesũ aalyũlile kĩmũtũ kyatwʼĩka nyama ya mwĩĩ wake na mbinyu yatwʼĩka nthakame yake mwene. Ĩndĩ mwĩĩ wa Yesũ waĩ o mũima yĩla wanenganae kĩmũtũ kĩu. Mo atũmwa ma Yesũ nĩmethĩwa maĩye nyama yake na kũnywʼa nthakame yake? Vaitonyeka nũndũ ũndũ ũsu wĩthĩwa wamatwie malyandũ na mĩao ya Ngai nĩvatanĩte kũya nyama sya mũndũ. (Mwambĩlĩlyo 9:​3,  4; Alivai 17:10) Kwĩanana na ĩandĩko ya Luka 22:20 Yesũ aisye: “Kĩkombe kĩĩ nĩ ũtianĩo mweũ ũla ũkwĩanĩwʼa na nthakame yakwa ĩla ĩkwĩtĩkwʼa kwondũ wenyu.” (The New Testament in Kĩkamba, NTK) Kĩkombe kĩu nĩkyo kyatwʼĩkie “ũtianĩo mweũ?” Vaitonyeka nũndũ ũtianĩo nĩ wĩwʼano, ti kĩndũ kĩtonya kwoneka.

Kwoou kĩmũtũ na mbinyu no ngelekanyʼo. Kĩmũtũ nĩ ngelekanyʼo ya mwĩĩ wa Yesũ mwĩanĩu. Yesũ atũmĩie kĩmũtũ kĩla kyatialĩte mamina kũya Vasaka. Kĩmũtũ kĩu kyaseũvĩtwʼe kĩte ĩlawa. (Kuma 12:⁠8) Mbivilia ĩtũmĩaa ĩlawa kũyĩelekanyʼa na naĩ kana wanangĩko. Kwoou kĩmũtũ nĩ ngelekanyʼo ya mwĩĩ mwĩanĩu wa Yesũ ũla waumisye ta nthembo. Mwĩĩ ũsu ndwaĩ na naĩ.​—⁠Mathayo 16:​11, 12; 1 Akolintho 5:​6, 7; 1 Vetelo 2:22; 1 Yoana 2:​1, 2.

Mbinyu ndune nĩ ngelekanyʼo ya nthakame ya Yesũ. Nthakame ĩsu nĩyo yĩtĩkĩlasya na kũlũlũmĩĩlya ũtianĩo mweũ. Yesũ aisye nthakame yake nĩyetĩkiwʼe “kwa ũekeo wa naĩ.” Nũndũ wa nthakame ĩsu andũ nĩmatonya kwĩthĩwa me atheu mbee wa metho ma Ngai na kũlika ũtianĩonĩ mweũ vamwe na Yeova. (Aevelania 9:​14; 10:​16, 17) Ũtianĩo ũsu, kana wĩwʼano, nĩwʼo ũtumaa Aklĩsto 144,000 mathi ĩtunĩ. Makeethĩwa me asumbĩ na athembi na maietee andũ moathimo.​—⁠Mwambĩlĩlyo 22:18; Yelemia 31:​31-​33; 1 Vetelo 2:9; Ũvuanʼyo 5:9, 10; 14:​1-3.

Naaũ maĩlĩte kũya kĩmũtũ na kũnywʼa mbinyu? Kwĩanana na ũndũ twoona no nginya methĩwe ne o ala me nthĩnĩ wa ũtianĩo mweũ na me na wĩkwatyo wa kũthi ĩtunĩ. Veva mũtheu wa Ngai nũmakũsĩaa kana nanyuve kwĩthĩwa me asumbĩ ĩtunĩ. (Alomi 8:​16) Na me nthĩnĩ wa ũtianĩo wa Ũsumbĩ vamwe na Yesũ.​—⁠Luka 22:29.

Ala mena wĩkwatyʼo wa kwĩkala Valatisonĩ kũũ nthĩ nĩmaĩle kũya kĩmũtũ na kũnywʼa mbinyu? Mo mayĩĩsaa kĩmũtũ kana kũnywʼa mbinyu, ĩndĩ nĩmewʼaa mwĩao wa Yesũ wa kwĩthĩwa vo ĩvinda ya kũlilikana Kyaũya kya Wĩoo kya Mwĩaĩi, namo nĩmekaa ũu kwa ndaĩa. Kĩla mwaka matukũ 14 mwei wa Nisani ĩtina wa syũa kũthũa, Ngũsĩ sya Yeova nililikanaa Kyaũya kya Wĩoo kya Mwĩaĩi. O na kau no andũ ngili nini kũũ nthĩ monanasya kana mena wĩkwatyo wa kũthi ĩtunĩ, kũlilikana kĩkwʼũ kya Yesũ nĩ ũndũ wa vata mũno kwa Aklĩsto onthe. Ĩvinda yĩu kĩla mũndũ nũtonya kũsũanĩa kwa ũito ĩũlũ wa wendo mwingĩ wa Yeova Ngai na Yesũ Klĩsto.​—⁠Yoana 3:​16.