VALŨA WA MBEE WA YOANA

1 Twĩmũandĩkĩa ĩũlũ wa kĩla kyaĩ vo kuma mwambĩlĩlyonĩ, kĩla tweewie, kĩla twoonie na metho maitũ, kĩla twasyaisye nesa na twakiita na moko maitũ, nakyo kĩkonetye ndeto ya thayũ, 2 (ĩĩ, thayũ nĩwoonaniwʼe na nĩtwonete na nĩtumasya ũkũsĩ na kũmũtavya ĩũlũ wa thayũ ũsu wa tene na tene ũla wumĩte kwa Asa na nĩwoonaniwʼe kwitũ), 3 kĩla twonete na kwĩwʼa nĩtũũmũtavya, nĩ kana o nenyu mwĩthĩwe na ngwatanĩo vamwe naitũ. Ngwatanĩonĩ ĩsu twĩthĩawa vamwe na Asa na Mwana wake Yesũ Klĩsto. 4 Na twĩandĩka maũndũ aa nĩ kana ũtanu witũ wusũe.

5 Ũũ nĩwʼo ũvoo ũla tweewie kuma kwake na tũũmũtavya: Ngai nĩ kyeni, na nthĩnĩ wake vaiĩ kĩvindu nongi. 6 Ethĩwa twĩasya, “Twĩ ngwatanĩo vamwe nake,” na tũendaa kĩvindunĩ, nĩtũũkengana na tũyĩkaa kwosana na ũla wʼo. 7 Ĩndĩ, ethĩwa tũendaa kyeninĩ o tondũ Ngai mwene wĩ kyeninĩ, twĩ ngwatanĩo ithyĩ kwa ithyĩ, na nthakame ya Yesũ, Mwana wake, nĩtũtheasya naĩ syonthe.

8 Ethĩwa twĩasya, “Tũi na naĩ,” nĩtũkwĩkenga, na ũla wʼo ndwĩ nthĩnĩ witũ. 9 Ethĩwa nĩtũkumbũla naĩ sitũ, we nĩ mũĩkĩĩku na nĩ mũlũngalu na kwoou akatũekea naĩ sitũ na kũtũthesya kĩla ũndũ ũte ũlũngalu. 10 Ethĩwa twĩasya, “Tũyĩkĩte naĩ,” twĩmũtwʼa mũkengani, na ndeto yake ndĩ nthĩnĩ witũ.

2 Inywʼĩ syana syakwa nini, nĩmũandĩkĩa maũndũ aa nĩ kana mũikeke naĩ. Ĩndĩ ethĩwa mũndũ nĩweeka naĩ, twĩ na mũtetheesya * ũla wĩ vamwe na Asa, nake nĩ Yesũ Klĩsto, na nĩ mũlũngalu. 2 Na nĩwe nthembo ya wĩwʼanĩthyo kwondũ wa naĩ sitũ, na ti kwondũ wa naĩ sitũ twĩ ithyoka ĩndĩ kwondũ wa naĩ sya nthĩ yonthe. 3 Na nũndũ wa ũu, nĩtwĩsĩ kana nĩtũmũmanyĩte, na ũu nĩ kwasya, ethĩwa nĩtũkũendeea kũkwata mĩao yake. 4 Ũla waasya, “Nyie nĩnĩmwĩsĩ,” ĩndĩ ndaatĩĩaa mĩao yake nĩ mũkengani, na ũla wʼo ndwĩ nthĩnĩ wa mũndũ ũsu. 5 Ĩndĩ ũla ũkwataa ndeto yake, vate nzika wendo wa Ngai nĩwĩanĩĩtwʼe nthĩnĩ wa mũndũ ũsu. Kwa nzĩa ĩsu nĩtwĩsĩ kana twĩ ngwatanĩo vamwe nake. 6 Ũla waasya kana e ngwatanĩo vamwe nake no nginya we mwene aendae o ũndũ ũsu waendaa.

7 Endwa, ndiũmũandĩkĩa ĩũlũ wa mwĩao mweũ, ĩndĩ nĩmũandĩkĩa ĩũlũ wa mwĩao wa tene ũla mwaĩ nawʼo kuma mwambĩlĩlyonĩ. Mwĩao ũsu wa tene nĩ ndeto ĩla mweewie. 8 O na ĩngĩ, nĩmũandĩkĩa ĩũlũ wa mwĩao mweũ ũla we mwene waatĩĩie o nenyu mũatĩĩaa, nũndũ kĩvindu nĩkĩvĩtĩte na kyeni kya wʼo nĩkĩmulĩkĩte.

9 Ũla waasya e kyeninĩ ĩndĩ nũmenaa mwana-a-asa wake e kĩvindunĩ o na yu. 10 Ũla wendete mwana-a-asa wake ekalaa kyeninĩ, na nthĩnĩ wake vaiĩ kĩndũ kya kũlulutĩkya. 11 Ĩndĩ ũla ũmenete mwana-a-asa wake e kĩvindunĩ na aendelaa kĩvindunĩ, na ndesĩ kũla ũendete nũndũ kĩvindu nĩkĩmũtwʼĩte kĩlalinda.

12 Inywʼĩ syana nini, nĩmũandĩkĩa nũndũ nĩmũekeetwe naĩ syenyu kwondũ wa ĩsyĩtwa yake. 13 Inywʼĩ aa-ĩthe, nĩmũandĩkĩa nũndũ nĩmũmũmanyĩte ũla wa kuma mwambĩlĩlyonĩ. Inywʼĩ anake, nĩmũandĩkĩa nũndũ nĩmũmũsindĩte ũla mũthũku. Inywʼĩ syana nini, nĩmũandĩkĩa nũndũ nĩmũmũmanyĩte Asa. 14 Inywʼĩ aa-ĩthe, nĩmũandĩkĩa nũndũ nĩmũmũmanyĩte ũla wa kuma mwambĩlĩlyonĩ. Inywʼĩ anake, nĩmũandĩkĩa nũndũ mwĩ na vinya na ndeto ya Ngai yĩkalaa nthĩnĩ wenyu na nĩmũsindĩte ũla mũthũku.

15 Mũikende nthĩ kana syĩndũ ila syĩ ĩũlũ wa nthĩ. Ethĩwa mũndũ o na wĩva nũmyendete nthĩ, wendo wa Asa ndwĩ nthĩnĩ wake; 16 nĩkwĩthĩwa syĩndũ syonthe ila syĩ ĩũlũ wa nthĩ—wendi wa mwĩĩ na wendi wa metho na mũndũ kwonanyʼa syĩndũ ila wĩ nasyo *—iyumanĩte na Asa, ĩndĩ syumanĩte na nthĩ. 17 O na ĩngĩ, nthĩ nĩkũvĩta vamwe na mawendi mayo, ĩndĩ ũla wĩkaa kwenda kwa Ngai ekalaa tene na tene.

18 Inywʼĩ syana nini, nĩ saa wa mũthya, na o tondũ mwĩwʼĩte kana nthũ ya Klĩsto nĩyũkĩte, o na yu kwĩ nthũ mbingĩ sya Klĩsto, na nũndũ wa ũu nĩtwĩsĩ kana nĩ saa wa mũthya. 19 Nĩmaumie kwitũ, ĩndĩ mayaĩ ma mũthemba witũ; nũndũ ta kethĩwa maĩ ma mũthemba witũ methĩwa mekalile vamwe naitũ. Ĩndĩ maumie kwitũ nĩ kana vamanyĩke nesa kana ti onthe maĩ ma mũthemba witũ. 20 Na nĩmwĩtĩkĩwʼe mauta nĩ ũla mũtheu, na inywʼonthe mwĩ na ũmanyi. 21 Ndiũmũandĩkĩa nĩkwĩthĩwa mũyĩsĩ ũla wʼo, ĩndĩ nĩmũandĩkĩa nũndũ nĩmũwĩsĩ, na nũndũ vaiĩ ũvũngũ wumanaa na ũla wʼo.

22 Ũla mũkengani nũũ ate o ũla ũkaĩaa kana Yesũ nĩwe Klĩsto? Ũsu nĩwe nthũ ya Klĩsto, ĩĩ, ũla ũkaĩaa Asa na Mwana. 23 Kĩla mũndũ ũmũkaĩaa Mwana ndetĩkĩlĩtwe nĩ Asa. Ĩndĩ mũndũ o na wĩva ũla ũmwĩtĩkĩlaa Mwana nĩwĩtĩkĩlawa nĩ Asa o nake. 24 O nenyu, no nginya kĩla mweewie kuma mwambĩlĩlyonĩ kĩkalae nthĩnĩ wenyu. Ethĩwa kĩla mweewie kuma mwambĩlĩlyonĩ kĩkalaa nthĩnĩ wenyu, o nenyu mũkekalaa nthĩnĩ wa ngwatanĩo vamwe na Mwana na vamwe na Asa. 25 O na ĩngĩ, kĩĩ nĩkyo we mwene watwathie, nakyo nĩ thayũ wa tene na tene.

26 Nĩmũandĩkĩa maũndũ aa ĩũlũ wa ala mekwenda kũmwasya. 27 Ĩndĩ inywʼĩ, kwĩtĩkĩwʼa mauta kũla wamwĩtĩkĩisye kwĩkalaa nthĩnĩ wenyu, na mũi na vata wa mũndũ o na wĩva kũmũmanyĩsya; ĩndĩ kwĩtĩkĩwʼa mauta kũla wamwĩtĩkĩisye nĩkũmũmanyĩasya ĩũlũ wa maũndũ onthe, na ũu nĩ wʼo na ti ũvũngũ. Na o tondũ kũmũmanyĩĩtye, ĩkalai mwĩ ngwatanĩo vamwe nake. 28 Kwoou yu, inywʼĩ syana nini, ĩkalai mwĩ ngwatanĩo vamwe nake, nĩ kana yĩla ũkaumĩlwʼa twĩthĩwe na ũthasyo wa kũneena na tũikaume vala ũĩ nũndũ wa nthoni ĩvindanĩ ya kwĩthĩwa vo kwake. 29 Ethĩwa nĩmwĩsĩ kana nĩ mũlũngalu, nĩmwĩsĩ kana kĩla mũndũ wĩkaa ũlũngalu nũtwʼĩkĩte mwana wake.

3 Sũanĩai ũndũ Asa ũtwendete, o na nĩtwĩtawa syana sya Ngai! Na ithyĩ twĩ syana syake. Kĩu nĩkyo kĩtumi nthĩ ĩtatwĩsĩ, nũndũ ndĩmwĩsĩ. 2 Endwa, yu twĩ syana sya Ngai, ĩndĩ vainamba kwonanwʼa ũndũ tũkethĩwa tũilye. Ithyĩ nĩtwĩsĩ kana yĩla ũkaumĩlwʼa tũkeethĩwa tũilye take, nĩkwĩthĩwa tũkamwona o ũndũ we ũilye. 3 Na kĩla mũndũ wĩ na wĩkwatyo nthĩnĩ wake nĩwĩtheasya mwene, o tondũ ũsu ne mũtheu.

4 Kĩla mũndũ wĩkaa naĩ nũtũlaa mĩao o nayo, na naĩ nĩ ũtũli wa mĩao. 5 O na nĩmwĩsĩ kana nĩwaumĩlilwʼe nĩ kana avetange naĩ sitũ, na nthĩnĩ wake vaiĩ naĩ. 6 Kĩla mũndũ wĩkalaa ngwatanĩonĩ vamwe nake ndaendeeaa kwĩka naĩ; na vaiĩ mũndũ ũendeeaa kwĩka naĩ ũmwonete kana ũmwĩsĩ. 7 Inywʼĩ syana nini, mũndũ o na wĩva ndakamwasye; ũla ũendeeaa kwĩka ũlũngalu nĩ mũlũngalu, o tondũ we ne mũlũngalu. 8 Mũndũ ũla ũendeeaa kwĩka naĩ aumanĩte na Ndevili, nũndũ Ndevili ethĩĩtwe ayĩka naĩ kuma mwambĩlĩlyonĩ. Na nũndũ wa kĩtumi kĩu Mwana wa Ngai nĩwaumĩlilwʼe nĩ kana anange mawĩa ma Ndevili.

9 Kĩla mũndũ ũtwʼĩkĩte mwana wa Ngai ndaendeeaa kwĩka naĩ, nũndũ veva * wa Ngai wĩ nthĩnĩ wake, na ndatonya kũendeea kwĩka naĩ, nũndũ nũtwʼĩkĩte mwana wa Ngai. 10 Syana sya Ngai na syana sya Ndevili nimanyĩkaa nũndũ wa ũndũ ũũ: Mũndũ o na wĩva ũla ũtaendeeaa kwĩka ũlũngalu ndaumanĩte na Ngai, o na ũla ũtamwendete mwana-a-asa wake. 11 Nĩkwĩthĩwa ũvoo ũũ nĩwʼo mweewie kuma mwambĩlĩlyonĩ, kana nĩtwaĩle kwendana; 12 na tũikethĩwe tũilye ta Kaini, ũla waumanie na ũla mũthũku na amũaa mwana-a-inyia. Na amũaie nũndũ wa kyaũ? Amũaie nũndũ meko make mwene maĩ mathũku, ĩndĩ ma mwana-a-inyia maĩ malũngalu.

13 Mũikasengʼe, ana-a-asa, nĩkwĩthĩwa nthĩ nĩmũmenete. 14 Nĩtwĩsĩ kana nĩtumĩte kĩkwʼũnĩ tũkalika thayũnĩ, nũndũ nĩtwendete ana-a-asa. Ĩndĩ ũla ũtamendaa ana-a-asa ekalaa kĩkwʼũnĩ. 15 Kĩla mũndũ ũmũmenaa mwana-a-asa wake nĩ mũaani, na nĩmwĩsĩ kana kũiĩ mũaani wĩ na thayũ wa tene na tene. 16 Na nũndũ wa ũu nĩtũmanyĩte wendo, nũndũ ũsu nĩweeyumisye akwʼa kwondũ witũ, naitũ nĩtwaĩlĩte kwĩyumya tũkwʼe kwondũ wa ana-a-asa maitũ. 17 Ĩndĩ mũndũ o na wĩva ũla wĩ na syĩndũ sya nthĩ ĩno na ayona mwana-a-asa wake e na vata ĩndĩ ailea kũmwĩwʼĩa ĩnee, wendo wa Ngai wĩ nthĩnĩ wa mũndũ ũsu ata? 18 Inywʼĩ syana nini, twaĩle kwendana, na ti kwa ndeto kana ũĩmĩ, ĩndĩ kwa meko na wʼo.

19 Na nũndũ twĩ na wendo ũsu nĩtwĩsĩ kana tumanĩte na ũla wʼo, na tũkaĩkĩĩthya ngoo sitũ mbee wake 20 ĩũlũ wa ũndũ o na wĩva ũla ngoo sitũ itonya kũtũsilĩla, nũndũ Ngai nĩ mũnene kwĩ ngoo sitũ na nĩwĩsĩ maũndũ onthe. 21 Endwa, ethĩwa ngoo sitũ iiũtũsilĩla, twĩ na ũthasyo wa kũneena na Ngai; 22 na kĩndũ o na kĩva kĩla twamũvoya nũtũnengae, nũndũ nĩtũkwataa mĩao yake na nĩtwĩkaa maũndũ ala mendeeasya methonĩ make. 23 Na ũũ nĩwʼo mwĩao wake: kana twĩthĩwe na mũĩkĩĩo nthĩnĩ wa ĩsyĩtwa ya Mwana wake Yesũ Klĩsto na tũyendana, o tondũ watwĩaĩe. 24 O na ĩngĩ, ũla ũkwataa mĩao ya Ngai ekalaa ngwatanĩonĩ vamwe nake, na Ngai ekalaa ngwatanĩonĩ vamwe na mũndũ ũsu. Na nũndũ wa veva ũla watũnengie, nĩtwĩsĩ kana nĩwĩkalaa ngwatanĩonĩ vamwe naitũ.

4 Endwa, mũikaĩkĩĩe kĩla ndeto mbeveee, ĩndĩ ĩkĩĩthyai kana kĩla ndeto yumanĩte na Ngai, nũndũ athani aingĩ ma ũvũngũ nĩmaumĩlĩte ĩũlũ wa nthĩ.

2 Ũũ nĩwʼo mũtonya kũmanya kana ndeto mbeveee yumĩte kwa Ngai: Kĩla ndeto mbeveee yĩtĩkĩlaa kana Yesũ Klĩsto ookie e na mwĩĩ yumanĩte na Ngai. 3 Ĩndĩ kĩla ndeto mbeveee ĩtamwĩtĩkĩlaa Yesũ ndyumanĩte na Ngai. O na ĩngĩ, ĩsu nĩ ndeto mbeveee ya nthũ ya Klĩsto ĩla mweewie nĩyũkĩte, na yu yĩ ĩũlũ wa nthĩ.

4 Inywʼĩ syana nini, mumanĩte na Ngai, na nĩmũmakĩlĩtye vinya, nĩkwĩthĩwa ũla wĩ nthĩnĩ wa ngwatanĩo vamwe nenyu nĩ mũnene kwĩ ũla wĩ nthĩnĩ wa ngwatanĩo vamwe na nthĩ. 5 Asu maumanĩte na nthĩ; na nĩkyo kĩtumi maneenaa maũndũ maumanĩte na nthĩ na nthĩ nĩmethukĩĩasya. 6 Ithyĩ tumanĩte na Ngai. Mũndũ o na wĩva ũla ũmũmanyĩte Ngai nũtwĩthukĩĩasya; mũndũ o na wĩva ũla ũtaumanĩte na Ngai ndatwĩthukĩĩasya. Na kwa nzĩa ĩsu nĩtũvathũkanasya ndeto mbeveee ya wʼo na ndeto mbeveee ya ũvũngũ.

7 Endwa, ekai tũendeee kwendana, nũndũ wendo wumaa kwa Ngai, na kĩla mũndũ wĩthĩawa na wendo nĩ mwana wa Ngai na nũmwĩsĩ Ngai. 8 Na mũndũ o na wĩva ũla ũtethĩawa na wendo ndamwĩsĩ Ngai, nũndũ Ngai nĩ wendo. 9 Kwa nzĩa ĩno wendo wa Ngai nĩwavuaniwʼe kwitũ, kana Ngai nĩwatũmie Mwana wake e ũmwe ĩũlũ wa nthĩ nĩ kana tũtonye kũkwata thayũ kwĩsĩla kwake. 10 Wendo ũsu nĩwʼo ũũ: ti atĩ nithyĩ twamwendie Ngai, ĩndĩ Ngai nĩwe watwendie na atũma Mwana wake ethĩwe nthembo ya wĩwʼanĩthyo kwondũ wa naĩ sitũ.

11 Endwa, ethĩwa ũu nĩwʼo Ngai watwendie, o naitũ no nginya twendane. 12 Vaiĩ mũndũ waamwona Ngai o na ĩndĩĩ. Ethĩwa nĩtũkũendeea kwendana, Ngai eendeea kwĩthĩwa vamwe naitũ na wendo wake nũkwĩanĩwʼa nthĩnĩ witũ. 13 Na kwa nzĩa ĩno nĩtwĩsĩ kana twĩ nthĩnĩ wa ngwatanĩo vamwe nake na we mwene e nthĩnĩ wa ngwatanĩo vamwe naitũ, nĩkwĩthĩwa nũtũnengete veva wake. 14 O na ĩngĩ, ithyĩ ene nĩtwonete na nĩtumasya ũkũsĩ kana Asa nũtũmĩte Mwana wake ethĩwe mũtangĩĩi wa nthĩ. 15 Mũndũ o na wĩva ũla wĩtĩkĩlaa kana Yesũ nĩ Mwana wa Ngai, Ngai ekalaa ngwatanĩonĩ vamwe na mũndũ ũsu, nake ekalaa ngwatanĩonĩ vamwe na Ngai. 16 Na nĩtũmanyĩte na kũĩkĩĩa kana Ngai nũtwendete.

Ngai nĩ wendo, na ũla wĩkalaa wendonĩ ekalaa ngwatanĩonĩ vamwe na Ngai, nake Ngai ekalaa ngwatanĩonĩ vamwe nake. 17 Na kwa nzĩa ĩsu wendo nĩwĩanĩĩtwʼe nthĩnĩ witũ, nĩ kana twĩthĩwe na ũthasyo wa kũneena mũthenyanĩ wa sila, nĩkwĩthĩwa o tondũ ũsu ũilye, nowʼo o naitũ tũilye twĩ ĩũlũ wa nthĩ ĩno. 18 Vaiĩ wia nthĩnĩ wa wendo, ĩndĩ wendo mwĩanĩu nũvetaa wia, nũndũ wia nũtũsiĩĩaa. Vate nzika, mũndũ ũla wĩthĩawa na wia ndethĩawa na wendo mwĩanĩu nthĩnĩ wake. 19 Ithyĩ twĩthĩawa na wendo, nĩkwĩthĩwa we nĩwe watwendie mbee.

20 Ethĩwa mũndũ o na wĩva easya, “Nĩnĩmwendete Ngai,” ĩndĩ nũmũmenete mwana-a-asa wake, nĩ mũkengani. Nũndũ ũla ũtamwendete mwana-a-asa wake, ũla ũmwonete, ndatonya kũmwenda Ngai, ũla ũtaamwona. 21 Na twĩ na mwĩao ũũ kuma kwake, kana mũndũ o na wĩva ũla ũmwendaa Ngai no nginya amwende mwana-a-asa wake.

5 Kĩla mũndũ ũĩkĩĩaa kana Yesũ nĩwe Klĩsto nũtwʼĩkĩte mwana wa Ngai, na kĩla mũndũ wendete Ngai nĩwendete syana sya Ngai. 2 Na nũndũ wa ũndũ ũũ, nĩtwĩsĩ kana nĩtwendete syana sya Ngai, ethĩwa nĩtũmwendete Ngai na nĩtũatĩĩaa mĩao yake. 3 Nũndũ kũũ nĩkwʼo kũmwenda Ngai: tũkwatae mĩao yake; na mĩao yake ti mũio mũito, 4 nĩkwĩthĩwa kĩla mũndũ ũtwʼĩkĩte mwana wa Ngai nũkĩlĩtye nthĩ vinya. Na nũndũ wa mũĩkĩĩo witũ nĩtũkĩlĩtye nthĩ vinya.

5 Nũũ ũla ũtonya kũkĩlya nthĩ vinya? Tyo ũla ũĩkĩĩaa kana Yesũ nĩ Mwana wa Ngai? 6 Yesũ Klĩsto nĩwe wookie kwĩsĩla kĩwʼũ na nthakame; ndaaũka kwĩsĩla kĩwʼũ kyoka, ĩndĩ kwĩsĩla kĩwʼũ na nthakame. Na veva nũkũsĩĩaa, nĩkwĩthĩwa veva nĩwʼo ũla wʼo. 7 Nũndũ kwĩ syĩndũ itatũ syumasya ũkũsĩ, nasyo nĩ: 8 veva na kĩwʼũ na nthakame; na syonthe ikũsĩĩaa ũndũ ũmwe.

9 Ethĩwa nĩtũkwĩtĩkĩla ũkũsĩ wa andũ, ũkũsĩ ũla wumĩte kwa Ngai nĩ mũnene. Nĩkwĩthĩwa ũũ nĩwʼo ũkũsĩ ũla Ngai wumasya, ĩĩ, ũkũsĩ ũla wumĩtye ĩũlũ wa Mwana wake. 10 Mũndũ ũla ũmũĩkĩĩaa Mwana wa Ngai e na ũkũsĩ nthĩnĩ wake. Mũndũ ũla ũtamũĩkĩĩaa Ngai, nũmũtwʼĩte Ngai mũkengani, nũndũ ndaĩkĩĩaa ũkũsĩ ũla wumĩtwʼe nĩ Ngai ĩũlũ wa Mwana wake. 11 Na ũũ nĩwʼo ũkũsĩ, kana Ngai nĩwatũnengie thayũ wa tene na tene, na thayũ ũsu wĩ nthĩnĩ wa Mwana wake. 12 Ũla wĩtĩkĩlĩtwe nĩ Mwana e na thayũ ũsu; na ũla ũtetĩkĩlĩtwe nĩ Mwana wa Ngai nde na thayũ ũsu.

13 Nĩmũandĩkĩa maũndũ aa nĩ kana mũmanye kana mwĩ na thayũ wa tene na tene, inywʼĩ ala mwĩthĩawa na mũĩkĩĩo nthĩnĩ wa ĩsyĩtwa ya Mwana wa Ngai. 14 Na ũũ nĩwʼo mũĩkĩĩo ũla twĩ nawʼo nthĩnĩ wake, kana twavoya kĩndũ o na kĩva kwosana na kwenda kwake, nũtwĩthukĩĩasya. 15 Na ethĩwa nĩtwĩsĩ kana nũtwĩthukĩĩasya twavoya kĩndũ o na kĩva, nĩtwĩsĩ kana tũkakwata syĩndũ ila twavoya, nũndũ nĩwe tũmũvoyete syĩndũ isu.

16 Ethĩwa mũndũ o na wĩva nĩwoona mwana-a-asa wake ayĩka naĩ ĩtaetae kĩkwʼũ, navoye, na Ngai akamũnenga mwana-a-asa ũsu thayũ, ĩĩ, ala matekaa naĩ ĩetae kĩkwʼũ. Ve naĩ ĩetae kĩkwʼũ. Na nyie ndiũmwĩa avoye ĩũlũ wa naĩ ta ĩsu. 17 Maũndũ onthe mate malũngalu nĩ naĩ, ĩndĩ ve naĩ ĩtaetae kĩkwʼũ.

18 Nĩtwĩsĩ kana kĩla mũndũ ũtwʼĩkĩte mwana wa Ngai ndaendeea kwĩka naĩ, ĩndĩ Mwana wa Ngai nũmũsũvĩaa, na ũla mũthũku ndatonya kũmwĩka ũndũ. 19 Nĩtwĩsĩ kana tumanĩte na Ngai, ĩndĩ nthĩ yonthe yĩ ungu wa vinya wa ũla mũthũku. 20 Ĩndĩ nĩtwĩsĩ kana Mwana wa Ngai nĩwookie, na nũtũnengete ũĩ nĩ kana twĩthĩwe tũtonya kũkwata ũmanyi ĩũlũ wa ũla wa wʼo. Na twĩ ngwatanĩo vamwe na ũla wa wʼo, kwĩsĩla Mwana wake Yesũ Klĩsto. Ũsu nĩwe Ngai wa wʼo na thayũ wa tene na tene. 21 Inywʼĩ syana nini, ĩvathanei na mĩvwʼanano.