VALŨA KWA AKOLOSAI

1 Nyie Vaulo, mũtũmwa wa Klĩsto Yesũ kwondũ wa kwenda kwa Ngai, na Timotheo mwana-a-asa waitũ, 2 kwa atheu na ana-a-asa aĩkĩĩku ma Kolosai ala me ngwatanĩo vamwe na Klĩsto:

Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ.

3 Mavinda onthe yĩla tũũvoya kwondũ wenyu, nĩtũmũtũngĩaa Ngai mũvea, Ĩthe wa Mwĩaĩi waitũ Yesũ Klĩsto, 4 nĩkwĩthĩwa nĩtweewie ĩũlũ wa mũĩkĩĩo wenyu nthĩnĩ wa Klĩsto Yesũ na ũndũ mũmendete atheu onthe 5 nũndũ wa wĩkwatyo ũla mwiĩwe ĩtunĩ. Nĩmweewie ĩũlũ wa wĩkwatyo ũsu kwĩsĩla ũwʼo ũla mwataviwʼe ĩũlũ wa ũvoo mũseo 6 ũla wamũvikĩie. O tondũ ũvoo mũseo ũendeee na kũsyaa ũsyao na kwongeleka nthĩ yonthe, nowʼo ũendeee kũsyaa ũsyao katĩ wenyu kuma mũthenya ũla mweewie, na mwamanya nesa ũseo mwingĩ wa Ngai kwosana na ũla wʼo. 7 Maũndũ asu nĩmo mweemanyĩisye kuma kwa Evavila, mwana-a-asa waitũ mwendwa na mũĩkĩĩku na ngombo ya Klĩsto kwondũ witũ. 8 Na nĩwatũtavisye ĩũlũ wa wendo wenyu wa kĩ-veva. *

9 Kĩu nĩkyo kĩtumi kuma mũthenya ũla tweewie ĩũlũ wa ũndũ ũsu, tũtaaeka nongi kũvoya kwondũ wenyu tũyenda mwĩthĩwe na ũmanyi wa wʼo ĩũlũ wa kwenda kwake na ũĩ wʼonthe na ũmanyi ũla veva mũtheu wa Ngai ũnenganae, 10 nĩ kana mwĩkale kwosana na ũndũ Yeova ũkwenda nĩ kenda mũmwendeesye vyũ o mũendeee kũsyaa ũsyao nthĩnĩ wa kĩla wĩa mũseo na kwongeleela ũmanyi wa wʼo ĩũlũ wa Ngai; 11 na ĩthĩwai mwĩ alũmu na mwĩ na vinya wʼonthe ũla wumanaa na ũtonyi wake mwingĩ, nĩ kana mwĩthĩwe mũtonya kũmĩĩsya na kweteela na ũtanu, 12 mũimũtũngĩa mũvea Asa, ũla watumie mwĩthĩwa mwaĩle kũkwata ũtiĩwa ũla ũkanengwa atheu ala me kyeninĩ.

13 Nake nĩwatũvonokisye kuma ũkũmũnĩ wa kĩvindu na atũlikya ũsumbĩnĩ wa Mwana wake mwendwa, 14 ũla kwĩsĩla kwake tũthaĩtwʼe kwĩsĩla wovosyo na tũkakwata ũekeo wa naĩ. 15 We nĩ mũvwʼano wa Ngai ũtonekaa, na nĩwe wa mbee katĩ * wa syĩndũ syonthe ila syoombiwe; 16 nũndũ kwĩsĩla kwake syĩndũ ila ingĩ syonthe nĩsyoombiwe ĩtunĩ na kũũ nthĩ, syĩndũ ila syonekaa na ila itonekaa, syĩthĩwe nĩ ivĩla sya ũsumbĩ kana mosumbĩ kana monene kana mokũmũ. Na syĩndũ ila ingĩ syonthe syoombiwe kwĩsĩla kwake na kwondũ wake. 17 O na ĩngĩ, aĩ kwʼo mbee wa syĩndũ ila ingĩ syonthe, na kwĩsĩla kwake syĩndũ ila ingĩ syonthe nĩsyoombiwe, 18 na nĩwe mũtwe wa mwĩĩ, nawʼo nĩ kĩkundi. Nĩwe mwambĩlĩlyo wa syĩndũ syonthe, mũsyawa wa mbee ũla waĩ wa mbee kũthayũũkwʼa, nĩ kana ethĩwe e wa mbee katĩ wa syĩndũ syonthe; 19 na nĩkyo kĩtumi Ngai wendie Mwana wake ethĩwe e mwĩanĩu maũndũnĩ onthe, 20 nĩ kana kwĩsĩla kwake, Ngai ewʼanĩthye syĩndũ ila ingĩ syonthe kwake mwene kwa kũtuma vethĩwa na mũuo kwĩsĩla nthakame ĩla Mwana wake wetĩkisye e mũtĩnĩ wa mathĩna, * syĩthĩwe nĩ syĩndũ ila syĩ kũũ nthĩ kana ila syĩ ĩtunĩ.

21 Ve ĩvinda inywʼĩ mwaĩ vaasa na Ngai na mwaĩ amaitha make nũndũ mwasũanĩaa maũndũ mathũku, 22 ĩndĩ nĩwamwĩwʼanĩthisye kwĩsĩla kĩkwʼũ kya ũla waumisye mwĩĩ wake wĩthĩwe nthembo, nĩ kana amũnengane inywʼĩ mwĩ atheu na mũte na ũndũ ũtaĩle na mũtaweteka ũthũku mbee wake— 23 ethĩwa nĩmũkũendeea kwĩthĩwa na mũĩkĩĩo, na kwakwa ĩũlũ wa ũla mũsingi na mũyĩthĩwa mwĩ alũmu na mũtathingithĩka kuma wĩkwatyonĩ ũla mwakwatie nũndũ wa ũvoo mũseo, ũla wataviwʼe syũmbe syonthe ungu wa ĩtu. Nyie, Vaulo, nĩnatwʼĩkie mũthũkũmi wa ũvoo ũsu mũseo.

24 Yu nĩngũtana o na kau nĩngũthĩna kwondũ wenyu, na nĩendeea kũthĩna o ũndũ Klĩsto wathĩnie, na no nginya nĩendeee kũthĩna nũndũ kũthĩna kũu kũkatethya mwĩĩ wa Klĩsto, nawʼo nĩ kĩkundi. 25 Nĩnatwʼĩkie mũthũkũmi wa kĩkundi kĩĩ, kwosana na ũthũkũmi ũla nanengiwe nĩ Ngai kwondũ wenyu nĩ kana nĩtavanyʼe ndeto ya Ngai na ngoo yonthe, 26 kĩmbithĩ kĩtheu kĩla kyavithĩtwe kuma tene na kyavithĩtwe nzyawa syonthe sya tene. Ĩndĩ yu nĩkĩvuanĩwʼe atheu make, 27 ala Ngai wendeeiwʼe nĩ kũmamanyĩthya ũthwii wa kĩmbithĩ kyake kĩtheu kĩla andũ ma mbaĩ ingĩ mamanyĩthiwʼe, nakyo nĩ Klĩsto e ngwatanĩo vamwe nenyu, ũu nĩ kwasya kana mwĩ na wĩkwatyo wa kũkumwʼa vamwe nake. 28 Ũsu nĩwe tũtavanasya na kũkanyʼa andũ onthe na kũmamanyĩsya ũĩ wʼonthe, nĩ kana tũnengane kĩla mũndũ e mwĩanĩu nthĩnĩ wa Klĩsto. 29 Kũvikĩa vau, nĩendeee kwĩkĩa kĩthito na kwĩthingʼĩĩsya nĩtũmĩĩte vinya wake ũla ũtethasya wĩa nthĩnĩ wakwa.

2 Nũndũ nĩenda mũmanye kĩthito kĩla nĩ nakyo kwondũ wenyu na kwondũ wa ala me Laotisia na kwondũ wa ala mataambona nyie mwene. 2 Nĩ kana makwate ũkiakisyo na mayĩthĩwa makwatanĩtwʼe nesa vamwe nthĩnĩ wa wendo, na mayĩthĩwa na ũthwii wʼonthe ũla wumanaa na kwĩthĩwa maĩkĩĩthĩtwʼe nesa na me na ũmanyi wa wʼo ĩũlũ wa kĩmbithĩ kĩtheu kya Ngai, nakyo nĩ Klĩsto. 3 Na nthĩnĩ wake ũthwii wʼonthe na ũĩ na ũmanyi nivithĩtwe nesa. 4 Nĩneena ũu nĩ kana mũndũ o na wĩva ndakamũkenge na ndeto sya maũĩ. 5 O na kau ndi vau mũĩ, nĩ vamwe nenyu nthĩnĩ wa veva, na nĩngũtana kwona ũndũ mwĩkaa maũndũ na mũvango, na ũndũ mwĩ na mũĩkĩĩo ũlũmĩte nthĩnĩ wa Klĩsto.

6 Kwoou o ũndũ mwamwĩtĩkĩlile Mwĩaĩi, Klĩsto Yesũ, endeeai kwĩkala mwĩ ngwatanĩo vamwe nake, 7 mwĩ na mĩi mĩlũmu na mũkakwa nthĩnĩ wake, na kũlũlũmĩĩlwʼa mũĩkĩĩonĩ, o tondũ mwamanyĩiwʼe, na tũngaai mũvea kĩla ĩvinda.

8 Ĩsũvĩei mũndũ o na wĩva ndakamũtave na ũĩ wa nthĩ na ũvũngũ mũthei wosanĩte na kĩthĩo kya andũ na maũndũ ma mũsingi ma nthĩ ĩno, ĩndĩ ti kwosana na Klĩsto; 9 nũndũ ndaĩa syonthe sya Ngai itwĩe nthĩnĩ wake. 10 Na kwĩsĩla kwake vaiĩ kĩndũ o na kĩmwe tũte nakyo, nake nĩwe wĩ ĩũlũ * wa silikalĩ syonthe na mokũmũ. 11 Nũndũ wa ngwatanĩo yenyu vamwe nake, inywʼĩ mũyaĩkĩtwe nzaĩko ya moko ĩla ya kumya mwĩĩ wa nyama, ĩndĩ mwaĩkĩtwe nzaĩko ĩla ya Klĩsto. 12 Nũndũ mwathikiwe nake ũvatisonĩ wake, na nũndũ wa ngwatanĩo yenyu vamwe nake nĩmwathayũũkiwʼe vamwe nake kwĩsĩla mũĩkĩĩo wenyu nthĩnĩ wa maũndũ ala meanĩiwʼe kwa vinya wa Ngai, nake nĩwe wamũthayũũkisye.

13 O na ĩngĩ, o na kau mwaĩ akwʼũ nũndũ wa mavĩtyo menyu na kwĩthĩwa mũte aĩke nthĩnĩ wa mwĩĩ, Ngai nĩwatumie mwĩthĩwa thayũ vamwe na Yesũ. Na nũndũ wa ũseo Wake, nĩwatũekeie mavĩtyo maitũ onthe 14 na nĩwavutie ĩla mĩao yaandĩkĩtwe na kwʼoko na yaĩ na motwʼĩo, ĩla yoonanasya mavĩtyo maitũ ũtheinĩ. Na nĩwamĩvetie kwa kũmĩathĩĩa mũtĩnĩ wa mathĩna. * 15 Na kwĩsĩla mũtĩ ũsu wa mathĩna, * nĩwasindie silikalĩ na mokũmũ onthe na amatava na amekĩĩthya nthoni ũtheinĩ, na oonanyʼa kana nũkwatĩte ũsindi ĩũlũ woo onthe.

16 Kwoou mũikaeke mũndũ o na wĩva amũsilĩle ĩũlũ wa kĩla mũũya na kũnywʼa, kana ĩũlũ wa kũkwata mũthenya wa mboka kana kũtisa kwa mwei, kana kũkwata savato. 17 Maũndũ asu maĩ kyuu kya maũndũ ala makoka, ĩndĩ kĩla kya wʼo nĩ Klĩsto. 18 Ĩsũvĩanei na mũndũ o na wĩva ũla wĩthĩawa na wĩnyivyo ũte wa wʼo na ũla ũthaithaa alaĩka * nũndũ nũtonya kũtuma mũtakwata mũthĩnzĩo wenyu. Mũndũ ta ũsu alũmanasya vyũ na kĩla wene na ekathĩaa na mosũanĩo make matatethya, 19 na ndalũmanasya na ũla ũnengae mwĩĩ wʼonthe kĩla wĩ na vata nakyo, nake nĩwe mũtwe, na nĩwe ũtumaa mwĩĩ ũkwatanwʼa nesa kwĩsĩla maleenyũ na malangũ mawʼo, na ũyĩana kwosana na ũndũ Ngai ũwĩanasya.

20 Ethĩwa nĩmwakwie vamwe na Klĩsto maũndũnĩ ma mũsingi ma nthĩ ĩno, nĩkĩ mwĩkalaa ta mwĩ o ma nthĩ kwa kũendeea kũatĩĩa mĩao ĩno: 21 “Ndũkakwate, ndũkasame, na ndũkakiite”? 22 Nũndũ mĩao ĩsu ĩvatanĩte syĩndũ ila syanangĩkaa syamina kũtũmĩwa oou, na ĩsu nĩ mĩao na momanyĩsyo ma andũ. 23 O na kau maũndũ asu monekaa ta ma ũĩ, yĩla mũndũ ũkũthaitha kwosana na ũndũ we ũkwenda na e na wĩnyivyo ũte wa wʼo, o vamwe na kũthĩnyʼa mwĩĩ, maitonya kũtetheesya mũndũ o na vanini kũkitana na mawendi ma mwĩĩ.

3 Ĩndĩ ethĩwa mwathayũũkiwʼe vamwe na Klĩsto, endeeai kũmantha maũndũ ala me ĩũlũ, vala Klĩsto wĩkalĩte nthĩ kwʼokonĩ kwa aũme kwa Ngai. 2 Endeeai kũsũanĩa maũndũ ala me ĩũlũ, na ti maũndũ ala me kũũ nthĩ. 3 Nũndũ nĩmwakwie, na thayũ wenyu wĩ mokonĩ ma Klĩsto kwosana na kwenda kwa Ngai. 4 Yĩla Klĩsto ũkaumĩlwʼa, nake nĩwe thayũ witũ, o nenyu mũkaumĩlwʼa vamwe nake ũtheunĩ wake mũtisu.

5 Kwoou ũaai mamutha menyu maũndũnĩ makonetye ũlaalai, * ũvuku, mĩmeo ĩtasiĩĩka ya kũmanyana kĩ-mwĩĩ, wendi mũthũku, na ĩtomo, yĩla nĩ ũthaithi wa mĩvwʼanano. 6 Nũndũ wa maũndũ asu, ũthilĩku wa Ngai nĩwũkĩte. 7 Na ũu nowʼo mwĩkalĩle wenyu waĩlye tene. 8 Ĩndĩ yu vetai maũndũ aa onthe kuma vala mũĩ: ũthilĩku, ũthatu, ũthũku, kũumana, na mũiveta ndeto nthũku kanywʼanĩ wenyu. 9 Mũikakengane ene kwa ene. Umyai mwĩkalĩle wa tene na meko mawʼo, 10 na ĩvwʼĩkei mwĩkalĩle mweũ, ũla kwĩsĩla ũmanyi wa wʼo ũtwʼĩkĩthawʼa mweũ kwosana na mũvwʼano wa Ũla wawũmbie, 11 na vaiĩ Mũkiliki kana Mũyuti, nzaĩko kana kũlea kwaĩkwa, na vaiĩ mũeni, Mũsithiani, ngombo, kana mũndũ mũthasye; ĩndĩ Klĩsto nĩ syĩndũ syonthe kwa onthe.

12 O ta ũu, nũndũ inywʼĩ mwĩ anyuve ma Ngai, atheu na mendetwe, ĩvwʼĩkei ĩnee na wendo mwingĩ, ũseo, wĩnyivyo, ũuu, na wũmĩĩsyo. 13 Endeeai kũmĩanĩsya na kũekeanĩa na ngenda ethĩwa mũndũ o na wĩva e na ũndũ na ũngĩ. Na o tondũ Yeova wamũekeie inywʼĩ na ngenda, o nenyu no nginya mwĩke oou. 14 Ĩndĩ o vamwe na maũndũ asu onthe, ĩvwʼĩkei wendo, nũndũ nĩwʼo ũkwatanasya andũ vyũ makethĩwa na ngwatanĩo ndũmu.

15 O na ĩngĩ, ekai mũuo wa Klĩsto ũsumbĩke ngoonĩ syenyu, * nũndũ mweetĩiwe mũuo ũsu nthĩnĩ wa mwĩĩ ũmwe. Na ĩthĩwai mũitũnga mũvea. 16 Ekai ndeto ya Klĩsto yusũe vyũ nthĩnĩ wenyu na ĩituma mwĩthĩwa na ũĩ wʼonthe. Endeeai kũmanyĩanyʼa na kũthangaanyʼa na savuli, mbathi sya kũmũkumya Ngai, mbathi sya kĩ-veva, mũyina kwa nzĩa ĩkwonanyʼa mwĩ na mũvea, na mũimwinĩa Yeova kuma ngoonĩ. 17 Ũndũ o na wĩva ũla mũũneena kana kwĩka, ĩkai maũndũ onthe ĩsyĩtwanĩ ya Mwĩaĩi Yesũ, na kwĩsĩla kwake mũimũtũngĩa Ngai mũvea, ũla nĩwe Asa.

18 Inywʼĩ iveti, ĩnyivĩsyei aũme menyu, o tondũ vaĩle nthĩnĩ wa Mwĩaĩi. 19 Inywʼĩ aũme, endeeai kũsyenda iveti syenyu na mũikaithatĩe. 20 Inywʼĩ syana, mewʼei asyai menyu maũndũnĩ onthe, nũndũ ũu nũmwendeeasya Mwĩaĩi mũno. 21 Inywʼĩ aa-ĩthe, mũikathatye syana syenyu, nĩ kana iikakwʼe ngoo. 22 Inywʼĩ ngombo, mewʼei mavwana menyu ala me kũũ nthĩ maũndũnĩ onthe, na ti o yĩla mamũsyaĩĩsye, ta mũkwendeesya andũ, ĩndĩ ĩkai ũu mwĩ na ngoo ntheu, mũimũkĩa Yeova. 23 Ũndũ o na wĩva ũla mũkwĩka, wĩkei na thayũ wenyu wʼonthe ta mũkũmũthũkũma Yeova, na ti andũ, 24 nũndũ nĩmwĩsĩ kana kuma kwa Yeova mũkakwata ũtiĩwa tawʼo ĩtuvi. Mũthũkũmei Vwana wenyu, Klĩsto. 25 Vate nzika, mũndũ ũla wĩkaa ĩvĩtyo akaĩvwa nũndũ wa ĩvĩtyo yĩla wĩkĩte, nĩkwĩthĩwa Ngai nde kyende.

4 Inywʼĩ mavwana, ĩkalanyʼai na ngombo syenyu nesa na kwa ũlũngalu, mũkĩmanya kana o nenyu mwĩ na Vwana wenyu ĩtunĩ.

2 Voyai na kĩthingʼĩĩsyo, na yĩla mũkwĩka ũu, endeeai kwĩthĩwa mwĩ metho na mũitũnga mũvea. 3 Na o vamwe na ũu, mũitũvoyea nĩ kana Ngai avingũe mũomo kwondũ wa ĩla ndeto, nĩ kenda twĩthĩwe tũtonya kũtavanyʼa kĩmbithĩ kĩtheu ĩũlũ wa Klĩsto, kĩla nyie novetwe nũndũ wakyo, 4 na nĩ kana nĩtavanyʼe ĩũlũ wa kĩmbithĩ kĩu ũndũ vaĩle.

5 Endeeai kwĩkalanyʼa na ũĩ na ala me nza na mũitũmĩa ĩvinda yenyu nesa vyũ. 6 Ndeto syenyu syĩthĩwe syĩ nzeo na syĩ na mũnyũ, nĩ kana mũmanye ũndũ mũtonya kũsũngĩa kĩla mũndũ.

7 Tikiko, mwana-a-asa mwendwa na mũthũkũmi mũĩkĩĩku na ngombo vamwe nakwa nthĩnĩ wa Mwĩaĩi, akamũtavya maũndũ onthe ĩũlũ wakwa. 8 Nĩngũmũtũma kũla mũĩ nĩ kana mũmanye ũndũ tũendeee na aikiakisya ngoo syenyu. 9 Eũka vamwe na Onesimo, mwana-a-asa mwendwa na mũĩkĩĩku, nake nĩ ũmwe wenyu, na makamũtavya maũndũ onthe ala maendeee kũũ.

10 Alisitaliko, mwovwa vamwe nakwa, nĩwamũkethya, na Maliko, mũndũ wa mũsyĩ ũmwe na Valanava, o nake nĩwamũkethya (ũla mũneeaĩwe mũmũthokye ethĩwa nũkũka kwenyu), 11 na Yesũ ũla wĩtawa Yusito, namo nĩ amwe ma ala aĩke. Asu me oka nĩmo atethya ma wĩa vamwe nakwa kwondũ wa Ũsumbĩ wa Ngai, na methĩĩtwe maingiakisya * mũno. 12 Evavila, ngombo ya Klĩsto Yesũ ũla nĩ ũmwe wenyu, nĩwamũkethya. Kĩla ĩvinda ethĩawa na kĩthito kingĩ mboyanĩ syake kwondũ wenyu, nĩ kana mwĩũngama mwĩ alũmu, * mũte na nzika nongi kwendanĩ kwʼonthe kwa Ngai. 13 Nũndũ nĩngũkũsĩĩa kana nĩwĩkĩĩte kĩthito kingĩ kwondũ wenyu na ala me Laotisia na Ielavoli.

14 Luka, ũla mũiiti mwendwa, nĩwamũkethya, o nake Ndema nĩwamũkethya. 15 Ngethesyei ana-a-asa ala me Laotisia na mũingethesya Nimba na kĩkundi kĩla kyũmbanĩaa nyũmba kwake. 16 Na mwamina kũsomewa valũa ũũ, ĩkai mĩvango nĩ kana ũkasomwe kĩkundinĩ kĩla kĩ Laotisia, nenyu mũisoma valũa ũla nĩnatũmie Laotisia. 17 O na ĩngĩ, mwĩei Alikivo atĩĩ: “Sũvĩa mũno ũthũkũmi ũla weetĩkĩlile nthĩnĩ wa Mwĩaĩi nĩ kana ũwĩanĩsye.”

18 Nyie Vaulo nĩnamũkethya nĩandĩkĩte na kwʼoko kwakwa mwene. Endeeai kũlilikana kyovo kyakwa. Ũseo mwingĩ nĩwĩthĩwe nenyu.