WATHI WA SOLOMONI
1 Ũũ nĩ wathi wa mbathi,* ũla nĩ wa Solomoni:
2 “Nĩ amumunye na kanywʼa wake.
Nĩkwĩthĩwa mawonany’o maku ma wendo me kavaa kwĩ mbinyu.
3 Mũuke wa mauta maku nĩ wa kwendeesya.
Ĩsyĩtwa yaku yĩilye ta mauta me mũuke mũseo ala monoawʼa o kavola.
Nĩkyo kĩtumi aka ma mũika makwendete.
4 Mbose tũendanyʼe;* nĩtũsembe.
Mũsumbĩ nĩwambete lumunĩ syake sya nthĩnĩ!
Nĩtwĩwʼe mũyo na tũitana vamwe naku.
Nĩtũtaĩe* mawonany’o maku ma wendo mũno kwĩ mbinyu.
Ti ũsengyʼo kwona makwendete.*
5 Nyie nĩ mũtuku,* ĩndĩ nĩ mũmbe nesa, inywʼĩ eĩtu ma Yelusalemu,
Ta maeema ma Ketali, ta itambaa sya ĩeema ya Solomoni.
6 Mũikangeteee nũndũ nĩ mwiũ,
Nĩkwĩthĩwa sua nĩyĩmbĩvĩtye.
Ana ma inyia wakwa nĩmanthatĩie;
Nĩmandwʼĩkĩthisye mũsũvĩi wa mĩũnda ya mĩsavivũ,
Ĩndĩ mũũnda wakwa mwene wa mĩsavivũ ndyaasũvĩa.
7 Ndavye mwa, we ũla nendete* mũno vyũ,
Ndavye vala ũĩthasya ndĩthya yaku,
Vala ũmĩtwaaa ĩkathũmũe mũthenya katĩ.
Ve vata mwaũ nĩthĩwe nĩilye ta mũndũ mũka wĩvwʼĩkĩte suka mũvũthũ*
Katĩ wa ndĩthya sya anyanyau?”
8 “Ethĩwa ndwĩsĩ, we mũndũ mũka ũla mwanake vyũ katĩ wa aka,
Enda ũatĩĩe tũsĩla twa ndĩthya yaku
Na ũyĩĩthya tũvũli twaku vakuvĩ na maeema ma aĩthi.”
9 “We mwendwa wakwa, nĩkũelekanyʼa na mbalasi nga* katĩ wa makasya ma Valao.
10 Matau maku manakavĩtwʼe nĩ syĩndũ sya kwĩyanakavya,*
Na ngingo yaku ĩkanakavwʼa nĩ masoa.
11 Tũkaũseũvĩsya syĩndũ sya kwĩyanakavya sya thaavu*
Syanakavĩtwʼe na vetha.”
12 “Yĩla mũsumbĩ ũilyĩ mesanĩ yake ya kĩlinge,
Mauta makwa manyungaa nesa maumasya* mũuke wamo mũseo.
13 Mwendwa wakwa ailye kwakwa ta mũvuko ũnyungaa nesa wa manemane
Ũla ũkomaa ũtukũ wʼonthe katĩ wa nondo syakwa.
14 Nonaa mwendwa wakwa ailye kwakwa ta kĩkata kya ina
Katĩ wa mĩũnda ya mĩsavivũ ya Eni-ngeti.”
15 “Sisya! Wĩ mwanake, we mwendwa wakwa.
Sisya! Wĩ mwanake. Metho maku nĩ ma mavũĩ.”
16 “Sisya! Wĩ mwanake,* we mwendwa wakwa, na wĩ wa kwendeesya.
Kĩtanda kitũ kĩ matũnĩ meũ.
2 “O ta ĩlaa ya lili yĩ mĩwʼanĩ
Nowʼo mwendwa wakwa ũilye e katĩ wa eĩtu.”
3 “O ta mũevo wĩ katĩ wa mĩtĩ ya kĩthekanĩ,
Nowʼo mwendwa wakwa ũilye e katĩ wa ana.
Nĩenda mũno kwĩkala muunyĩnĩ wake,
Na nĩwʼaa mũsamo wa ĩtunda yake wĩ mũyo.
4 Nĩwandetie nyũmbanĩ ya mboka,*
Na kĩvevelo kyake kĩla kyaĩ ĩũlũ wakwa kyaĩ wendo.
5 Mbuũkye na tũmĩkate twa nzavivũ mbũmĩthye;
Nenge maevo nĩye nĩkwate vinya,
Nĩkwĩthĩwa nĩnĩwaĩtwʼe nĩ wendo.
6 Kwʼoko kwake kwa aka kwĩ ungu wa mũtwe wakwa,
Na kwʼoko kwake kwa aũme nĩkũngumbatĩe.
7 Nĩngũmũavĩthya, inywʼĩ eĩtu ma Yelusalemu,
Na ilongʼa na ndaatai nga sya kĩthekanĩ:
Mũikatate kũamũkya kana kũkĩlya wendo nthĩnĩ wakwa nginya wĩyĩamũkye newʼo.
8 Wasya wa mwendwa wakwa nũsu!
Sisya! Nũya okĩte,
Ambatĩte iĩmanĩ, atũlĩlangĩte tũlĩmanĩ.
9 Mwendwa wakwa nĩ ta kĩlongʼa, nĩ ta ndaatai nũme ya mũika.
Nũya vaya, aũngye ĩtina wa ũkũta witũ,
Aketeelete ndĩlĩsyanĩ,
Akunĩkĩle tũmyanyanĩ twa mĩkonzo ya ndĩlĩsya.
10 Mwendwa wakwa nũkũneena, embĩa atĩĩ:
‘Ũkĩla, mwendwa wakwa,
We mwendwa wakwa mwanake, ũka tũthi.
11 Sisya! Ĩvinda ya mbevo mbingĩ* nĩ ĩvĩtu.
Mbua nĩthelete na ĩkathi.
12 Malaa nĩmalaũkĩte ĩũlũ wa nthĩ,
Ĩvinda ya kũsea nĩ ĩviku,
Na wasya wa ndumbũ nũkwĩw’ĩka nthĩ yitũ.
13 Mũkũyũ nĩwĩwʼĩthĩtye makũyũ mawʼo ma mbee;
Mĩsavivũ nĩlaũkĩte na yĩnyunga nesa.
Ũkĩla, we mwendwa wakwa, wũke.
We mwendwa wakwa mwanake, ũka tũthi.
14 We ĩvũĩ yakwa, wĩ myatũkanĩ ya ĩvia yĩ ngũka,
Wĩ kũndũ kwĩvithanĩtye ũvainĩ,
Eka ngwone na ndyĩwʼa wasya waku,
Nĩkwĩthĩwa wasya waku nĩ wa kwendeesya na wĩ mũmbe nesa.ʼ”
15 “Tũkwatĩei mbĩwa,
Mbĩwa nini ila syanangaa mĩũnda ya mĩsavivũ,
Nĩkwĩthĩwa mĩũnda yitũ ya mĩsavivũ nĩlaũkĩte.”
16 “Mwendwa wakwa nĩ wakwa, nakwa nĩ wake.
Eĩthya malaanĩ ma lili.
17 Nginya sua yĩusye* na syuu iithela,
Syoka mĩtũkĩ, we mwendwa wakwa,
Kĩlanĩlya iĩma ila itũtaananĩtye,* ta kĩlongʼa kana ndaatai nũme ya mũika.
3 “Ũtukũ nĩ kĩtandanĩ kyakwa,
Nĩnamanthie ũla nendete.*
Nĩnamũmanthie, ĩndĩ ndyaamwona.
Nĩnamũmanthie, ĩndĩ ndyaamwona.
3 Nĩnakomanie na asyaĩĩsya ala mathiũũkangaa ndũanĩ.
Namakũlilye, ‘Nĩmwoona ũla nendete?’*
4 Yĩla namavĩtũkie oou
Nĩnoonie ũla nendete.*
Nĩnamũkwatie namũlũmya, ndyaĩ nĩtĩkĩla athi
Nginya namũtwaa nyũmbanĩ ya inyia wakwa,
Lumunĩ ya nthĩnĩ ya ũla wanzyaie.
5 Nĩngũmũavĩthya, inywʼĩ eĩtu ma Yelusalemu,
Na ilongʼa na ndaatai nga sya kĩthekanĩ:
Mũikatate kũamũkya kana kũkĩlya wendo nthĩnĩ wakwa nginya wĩyĩamũkye newʼo.”
6 “Kĩĩ nĩ kyaũ kyumĩte weũnĩ kĩilye ta matu ma syũki,
Kĩ na mũuke mũseo wa manemane na ũvani,
Vamwe na mĩtutu yonthe yĩ mũuke mũseo ĩla ĩthooawʼa nĩ atandĩthya?”
7 “Sisya! Nĩ kĩvĩla kya Solomoni.
Kĩthyũlũlũkĩtwe nĩ aũme 60 me ũtonyi,
Katĩ wa aũme ala me ũtonyi ma Isilaeli,
8 Onthe me na mbyũ,
Onthe nĩ amanyĩsye kaũ,
Kĩla ũmwe e na ũvyũ nthũnũnĩ yake
Nĩ kana masiĩĩe maũndũ ma kũtĩsya ala matonya kumĩla ũtukũ.”
9 “Nĩ kĩvĩla* kya kĩ-ũsumbĩ kya Mũsumbĩ Solomoni
Kĩla weeseũvĩisye na mĩtĩ ya Levanoni.
10 Aseũvisye ituĩ syakyo na vetha,
Syĩndũ syakyo sya kũtwʼĩĩka na thaavu.
Vandũ vakyo va kwĩkalĩla nĩ va w’ĩa wa langi wa nzambalaũ;
Ngalĩko yakyo ya nthĩnĩ yaanakaviwʼe na wendo
Nĩ eĩtu ma Yelusalemu.”
11 Umaalai, inywʼĩ eĩtu ma Saioni,
Keteeai Mũsumbĩ Solomoni
Ekĩĩte ngovia yake ya mũtwaano* ĩla inyia wake wamũseũvĩisye
Mũthenya ũla watwaanie.
Mũthenya ũla watumie ngoo yake ĩtana.”
4 “Sisya! Wĩ mwanake, we mwendwa wakwa.
Sisya! Wĩ mwanake.
Metho maku, me sukanĩ mũvũthũ ũla ũvwʼĩkĩte ũthyũ waku, nĩ ma mavũĩ.
Nzwʼĩĩ yaku ĩilye ta ndĩthya ya mbũi
Ĩtheeete iĩmanĩ sya Ngileati.
2 Maeo maku nĩ ta ndĩthya ya malondu o ĩndĩ matilwa wʼĩa
Ala mauma kũthambwʼa,
Kĩla yĩmwe na ĩvatha yayo,
Na vai o na yĩmwe yĩnaasya katena kayo.
3 Ilomo syaku iilye ta ũlii mũtune mũno,
Na ũneeni waku nĩ wa kwendeesya.
O ta kĩlungu kya ĩkũngũmanga
Nowʼo matau maku mailye me* sukanĩ mũvũthũ ũla ũvwʼĩkĩte ũthyũ waku.
4 Ngingo yaku ĩilye ta mwako mũtũlu wa Ndaviti,
Wakĩtwe na lainĩ sya mavia
Ũla ũsũawʼa ngao ngili,
Ngao syonthe sya kĩlinge sya aũme me ũtonyi.
5 Nondo syaku ilĩ iilye ta ilongʼa ilĩ sya mũika,
Mavatha ma kĩlongʼa,
Ala maĩsaa malaanĩ ma lili.”
7 “Wĩ mwanake vyũ, mwendwa wakwa,
Ndwĩ ĩlanga o na yĩmwe.
8 Ũka tumanyʼe Levanoni, mũtwawa wakwa,
Ũka tumanyʼe Levanoni.
Tũtheee tume mũthyanĩ wa Amana,*
Tume mũthyanĩ wa Senili, mũthyanĩ wa Elimoni,
Tume isumonĩ sya* mĩnyambũ, tume iĩmanĩ sya ngo.
9 Nũkwatĩtye ngoo yakwa, we mwĩĩtu-a-ia, mũtwawa wakwa,
Nũkwatĩtye ngoo yakwa na ĩsisya o yĩmwe ya metho maku,
Na kaindo o kamwe kanake ka ĩsoa yaku.
10 Mawonany’o maku ma wendo maseũvĩte mũno wĩana ata, we mwĩĩtu-a-ia wakwa, mũtwawa wakwa!
Mawonany’o maku ma wendo me kavaa mũno kwĩ mbinyu,
Na mũuke mũseo wa mauta maku manyungaa nesa nĩ mũseo mũno kwĩ kĩndũ o na kĩva kĩ mũuke mũseo!
11 Ilomo syaku, we mũtwawa wakwa, syĩlovotangya ũkĩ wa nzũkĩ wumĩte mawanĩ.
Ũkĩ wa nzũkĩ na ĩia syĩ ungu wa ũĩmĩ waku,
Na mũuke mũseo wa ngũa syaku ũilye ta mũuke mũseo wa Levanoni.
13 Nthongooo syaku iilye* ta mũũnda mũseo wa* makũngũmanga
Wĩ na matunda ala maseo vyũ, wĩ na ina o vamwe na mĩmea ya nando,
14 Nando na saviloni, mũangi ũnyungaa nesa na mũtalasinĩ,
Vamwe na mĩtĩ ya mĩthemba yonthe ya ũvani, manemane, na mĩtĩ ĩngĩ yĩ mũuke mũseo,
O vamwe na mauta onthe ala manyungaa nesa vyũ.
15 We wĩ mbuluti yĩ* mũũndanĩ, kĩthima kya kĩwʼũ kĩtheu,
Na tũlũsĩ tũtheeete kuma Levanoni.
16 Amũka, we kĩseve kya ngalĩko ya ĩũlũ;
Lika, we kĩseve kya ngalĩko ya ĩtheo.
Veveea mũũnda wakwa.*
Eka mũuke wawʼo mũseo ũnyaĩĩke.”
“Eka mwendwa wakwa alike mũũndanĩ wake
Na aiya matunda mawʼo ala maseo vyũ.”
5 “Nĩnalika mũũndanĩ wakwa,
We mwĩĩtu-a-ia, mũtwawa wakwa.
Nĩnatwʼa manemane yakwa na syĩndũ syakwa syĩ mũuke mũseo;
Nĩnaya ĩwa yakwa na ũkĩ wakwa wa nzũkĩ;
Nĩnanywʼa mbinyu yakwa na ĩia yakwa.”
“Yai, anyanyawa endwa!
Nywʼai mũmilwe nĩ mawonany’o ma wendo!”
2 “Nĩngomete, ĩndĩ ngoo yakwa nĩamũkĩte.
Mwendwa wakwa nũsu aikũnanga!
‘Mbingũĩe, we mwĩĩtu-a-ia, mwendwa wakwa,
Ĩvũĩ yakwa, mwendwa wakwa ũte ĩvĩtyo!*
Nĩkwĩthĩwa mũtwe wakwa wusũĩte ĩmwe,
Nzwʼĩĩ yakwa yusĩe ũthithu wa ũtukũ.ʼ
3 Nĩnumĩtye kanzũ yakwa.
No nginya nĩmĩkĩe ĩngĩ?
Nĩnthambĩtye maaũ makwa.
No nginya nĩmathokoanyʼe ĩngĩ?
4 Mwendwa wakwa nĩwavetangie kw’oko kalimanĩ ka mũomo,
Na nambĩĩa kwĩthĩwa na mea ma kũmwona.
5 Nĩnookĩlile nĩvingũĩe mwendwa wakwa;
Moko makwa malovotangasya manemane,
Na syaa syakwa mauta ma manemane,
Ikwatinĩ sya kĩvingi.
6 Nĩnavingũĩie mwendwa wakwa,
Ĩndĩ mwendwa wakwa aĩ anavĩndũka, aĩ anathi.
Nĩnatũlĩkile ngoo* yĩla waendie.*
Nĩnamũmanthie, ĩndĩ ndyaamwona.
Nĩnamwĩtie, ĩndĩ ndaaĩtĩka.
7 Asyaĩĩsya ala mathiũũkangaa ndũanĩ nĩmambonie.
Nĩmangũnie mambũmĩsya.
Asyaĩĩsya ma ngũta nĩmambenie suka wakwa.*
8 Nĩngũmũavĩthya, inywʼĩ eĩtu ma Yelusalemu:
Mwoona mwendwa wakwa,
Mũtavyei nĩnĩwaĩtwʼe nĩ wendo.”
9 “Nĩ kwa nzĩa yĩva mwendwa waku wĩ kavaa kwĩ mwendwa ũngĩ o na wĩva,
We mũndũ mũka ũla mwanake vyũ katĩ wa aka?
Nĩ kwa nzĩa yĩva mwendwa waku wĩ kavaa kwĩ mwendwa ũngĩ o na wĩva,
Nĩ kana ũtũavĩthye ũũ?”
10 “Mwendwa wakwa nĩ mũkenu na nĩ mũtune;
Nĩ wa kwendeesya vyũ katĩ wa aũme ngili ĩkũmi.
11 Mũtwe wake nĩ thaavu, thaavu ũla mũseo vyũ.
Nzwʼĩĩ yake ĩilye ta matũ ma mũtende meũthingithanga,*
Nĩ nziũ ta ngũngũũ.
12 Metho make mailye mavũĩ me ũtee wa tũlũsĩ twa kĩwʼũ,
Maithambĩa ĩianĩ,
Mailyĩ ũtee wa ndia yusĩe kĩwʼũ.*
13 Matau make mailye mũũnda wa syĩndũ syĩ mũuke mũseo,
Ivumbu sya mĩmea ĩnyungaa nesa.
Ilomo syake nĩ malaa ma lili, meũlovotangya mauta ma manemane.
14 Moko make mailye syĩndũ sya kĩlinge sya thaavu, syanakavĩtwʼe na savaliyati.
Ĩvu yake yĩilye maeo ma nzou makũlũtĩtwe vyũ na makavwʼĩkwa na savili.
15 Maaũ make nĩ ituĩ sya mavia manake mekĩĩtwe matinanĩ me na maima ma thaavu ũla mũseo vyũ.
Wũmbe wake ũilye Levanoni, nĩ mũasa ta mĩtalakwe.*
16 Kanywʼa* wake wĩ mũyo ki,
Na kĩla ũndũ ĩũlũ wake nĩ wa kwendeesya.
Ũũ nĩ mwendwa wakwa, ĩĩ, ũũ nĩ mwendwa wakwa, inywʼĩ eĩtu ma Yelusalemu.”
6 “Mwendwa waku athi va,
We mũndũ mũka ũla mwanake vyũ katĩ wa aka?
We mwendwa waku athi ata?
Eka tũmũmanthe twĩ ĩmwe.”
2 “Mwendwa wakwa atheea mũũndanĩ wake,
Athi mĩũndanĩ ya mĩmea yĩ mũuke mũseo,
Akaĩthye mĩũndanĩ
Na aitwʼa malaa ma lili.
3 Nyie nĩ wa mwendwa wakwa,
Na mwendwa wakwa nĩ wakwa.
Eĩthya malaanĩ ma lili.”
4 “Wĩ mwanake ta Tilisa,* we mwendwa wakwa,
Wanakavĩte ta Yelusalemu,
Wĩ wa kwendeesya mũno ta ita ithyũlũlũkĩte ivevelo syasyo.
5 Eka kũnzisya,
Nĩkwĩthĩwa metho maku nĩmeũngĩlya vinya.
Nzwʼĩĩ yaku ĩilye ta ndĩthya ya mbũi
Ĩtheeete ivaũũkonĩ sya Ngileati.
6 Maeo maku nĩ ta ndĩthya ya malondu
Ala mauma kũthambwʼa,
Kĩla yĩmwe na ĩvatha yayo,
Na vai o na yĩmwe yĩnaasya katena kayo.
7 O ta kĩlungu kya ĩkũngũmanga
Nowʼo matau maku mailye me* sukanĩ mũvũthũ ũla ũvwʼĩkĩte ũthyũ waku.
9 Ĩndĩ ũmwe no we ĩvũĩ yakwa, mwendwa wakwa ũte ĩvĩtyo.*
Nĩwe wa mwanya mũno vala ve inyia wake.
Nĩwe wendetwe mũno nĩ* ũla wamũsyaie.
Eĩtu mamwonaa makatangaasa kana nĩ mũtanu;
Iveti sya mũsumbĩ na iveti sya ndũsyo* syamwona nimũtaĩaa.
10 ‘Nũũ ũla mũkenũku* ta kũikya,
Mwanake ta mwei ũiluma,*
Mũtheu ta kyeni kya sua,
Wa kwendeesya mũno ta ita ithyũlũlũkĩte ivevelo syasyo?’”
11 “Nĩnatheeie mũũndanĩ wa mĩtĩ ya mbĩndĩ*
Ngone kĩla kyathongooete mwandanĩ,*
Ngone ethĩwa mũsavivũ nĩwathongooete,*
Ethĩwa mĩkũngũmanga nĩyalaũkĩte.
13 “Syoka, syoka, we Mũsulami!
Syoka, syoka,
Nĩ kana tũkwĩloele!”
“Nĩkĩ mũketeee Mũsulami?”
“Ailye ta nguthu ilĩ iũsũnga!”*
7 “Maaũ maku manakavĩte ta kĩ me iatũnĩ syaku,
We mwĩĩtu wa ndaĩa!
Ndambĩ syaku iilye ta syĩndũ sya kwĩyanakavya,
Wĩa wa moko ma vundi wĩ ũtũĩka.
2 Mũkautĩ waku nĩ mbakũli ya kĩlinge.
Ndĩkaaĩse kwaĩwa nĩ mbinyu mbulanyʼe.
Ĩvu yaku nĩ kĩvumbu kya nganũ,
Ĩthyũlũlũkĩtwe nĩ malaa ma lili.
3 Nondo syaku ilĩ iilye ta ilongʼa ilĩ sya mũika,
Mavatha ma kĩlongʼa.
4 Ngingo yaku ĩilye ta mwako mũtũlu wa maeo ma nzou.
Metho maku mailye ta ndia ila syĩ Esivoni,
Vakuvĩ na mũvĩa wa Mbathi-lavimi.
Ĩnyiũũ yaku yĩilye ta mwako mũtũlu wa Levanoni,
Ũla ũsyaĩtye Ndamasikũ.
5 Ũũngalalĩtye mũtwe waku ta Kalimeli,
Na nzw’ĩĩ yaku ĩilye* ta wʼĩa wa langi wa nzambalaũ.
Mũsumbĩ nũsengʼetwʼe mũno* nĩ nzwʼĩĩ yaku mbanake na ndaasa.
6 Wĩ mwanake ta kĩ, na wĩ wa kwendeesya ta kĩ,
We kelĩtu kakwa kendwa, mbee wa maũndũ onthe ala matanĩthasya mũndũ mũno!
7 Wĩ mũasa na wa kwendeesya ta mũtende,
Na nondo syaku iilye ta ikata sya ndende.
8 Naisye, ‘Nĩngũlĩsa mũtende
Nĩ kana ngwate mbonge syawʼo syĩ matunda.’
Nondo syaku nĩsyĩthĩwe iilye ta ikata sya nzavivũ,
Mĩvevo yaku ĩnyungae nesa ta maevo,
9 Na kanywʼa* waku ta mbinyu ĩla nzeo vyũ.”
“Nĩtheee nesa mũlũkũnĩ wa mwendwa wakwa,
Ĩtheelele o kavola ilomonĩ sya ala makomete.
10 Nyie nĩ wa mwendwa wakwa,
Nake ethĩawa na mea maingĩ ma kwĩthĩwa nakwa.
11 Ũka, we mwendwa wakwa,
Nĩtũthi kũya nza;
Eka tũkakomele mĩmeanĩ ya ina.
12 Eka tũamũke tene tũthi mĩũndanĩ ya mĩsavivũ
Tũkone ethĩwa mũsavivũ nũthongooete,*
Ethĩwa malaa nĩ mavalĩku,
Ethĩwa mĩkũngũmanga nĩ mĩlaũku.
Twĩ vau, ngakwonyʼa ũndũ ngwendete.
13 Matunda ma wendo nĩmaumasya* mũuke wamo mũseo;
Mĩomonĩ yitũ ve matunda maseo ma mĩthemba yonthe.
Ala meũ na ala makũũ,
We mwendwa wakwa, nĩngwiĩe mo.
8 “Keka ũilye ta mwana-a-ia,
Ũla woongie nondo sya inyia wakwa!
Nĩvo ĩndĩ nakwĩthĩa nza, ngũmumunya,
Na vai mũndũ ũmbũthya.
2 No ngũtongoesye;
Ngũlikya nyũmbanĩ ya inyia wakwa,
Ũla wamanyĩisye.
Ngũnenge mbinyu yĩkĩĩtwe syĩndũ syĩ mũuke mũseo ũnywʼe,
Kĩwʼũ kĩ mũyo na kĩte kĩkaatu kya makũngũmanga.
3 Kwʼoko kwake kwa aka kwĩthĩwa ungu wa mũtwe wakwa,
Na kwʼoko kwake kwa aũme kũingumbatĩa.
4 Nĩngũmũavĩthya, inywʼĩ eĩtu ma Yelusalemu:
Mũikatate kũamũkya kana kũkĩlya wendo nthĩnĩ wakwa nginya wĩyĩamũkye newʼo.”
5 “Ũũ nũũ wambatĩte aumĩte weũnĩ,
Eyaĩĩsye mwendwa wake?”
“Nĩnakũamũkisye wĩ ungu wa mũevo.
Vau nĩ vo inyia waku wakwatĩiwe nĩ woo wa kũsyaa nĩ kana akũsyae.
Vau nĩ vo ũla wakũsyaie waĩ e na woo wa kũsyaa.
6 Mbĩkĩe ta ũsiĩlo ngoonĩ yaku,
Ta ũsiĩlo kwʼokonĩ kwaku,
Nĩkwĩthĩwa wendo wĩ vinya ta kĩkwʼũ,
Na wendi wa mũndũ wa kwĩthĩwa alũmanĩtye na mwendwa wake vyũ wĩ vinya ta Mbũa.*
Ũmũĩ wawʼo nĩ mwaki ũlĩlĩmbanĩte, ũmũĩ wa Yeova.
7 Kĩwʼũ kĩ na vinya kĩyĩsa kũvosya wendo,
O na mbũsĩ iyĩsa kũũkua.
Ethĩwa mũndũ akatata kũnengane ũthwii wʼonthe wa nyũmba yake kwondũ wa wendo,
Ũthwii ũsu ũkavũthwʼa.”*
8 “Twĩ na mwĩĩtu-a-ia mũinae witũ,
Na nde nondo.
Yo tũkeeka mwĩĩtu-a-ia ata
Mũthenya ũla makoka kũmũkũlya atwʼĩke kĩveti kyeene?”
9 “Ethĩwa we nĩ ũkũta,
Tũkamũseũvĩsya wiio* wa vetha ĩũlũ wake,
Ĩndĩ ethĩwa we nĩ mũomo,
Tũkamũvinga na ũvwaũ mũthanthau wa mũtalakwe.”*
10 “Nyie nĩ ũkũta,
Na nondo syakwa iilye ta myako mĩtũlu.
Kwoou methonĩ make nĩthĩĩtwe
Ta mũndũ wĩ na mũuo.
11 Solomoni aĩ na mũũnda wa mĩsavivũ Mbaali-amoni.
Nĩwaiie mũũnda ũsu wa mĩsavivũ mokonĩ ma asũvĩi.
Kĩla ũmwe woo amũeteae ilungu ngili sya vetha kwondũ wa ũsyao wawʼo.
12 Nyie nĩ na mũũnda wakwa mwene wa mĩsavivũ.
Ilungu isu ngili sya vetha nĩ syaku,* we Solomoni,
Na ilungu maana elĩ nĩ sya ala masũvĩaa ũsyao wawʼo.”
13 “We ũla wĩkalaa mĩũndanĩ,
Anyanyau nĩmethukĩĩasya wasya waku.
Eka nĩwĩwʼe.”
14 “Ĩkalaate, mwendwa wakwa,
Na ũisemba vyũ ta kĩlongʼa
Kana ta ndaatai nũme ya mũika
Iĩmanĩ sya syĩndũ syĩ mũuke mũseo.”
Kana “wathi ũla mũseo vyũ.”
Ndeto kwa ndeto, “Ngusye ngũatĩĩe.”
Kana “Nĩtũelesye.”
Aka ma mũika nĩmo meũwetwa.
Ndeto kwa ndeto, “mwiũ.”
Kana “thayũ wakwa wendete.”
Kana “suka mũvũthũ wa kũmeta.”
Kana “mbalasi yakwa nga.”
Kana nĩvatonyeka, “nĩ manake me katĩ wa nzwĩĩ ivĩndĩtwe.”
Kana “sya thaavu sya kĩlinge.”
Kana “Nando yakwa yumasya.”
Kana “mũmbe nesa.”
Kana “nyũmba yitũ nene.”
Kana “mĩkũũ.”
Noyo yĩtawa crocus kwa Kĩsũngũ.
Ndeto kwa ndeto, “nyũmbanĩ ya mbinyu.”
Kana “Ĩvinda ya mbua.”
Ndeto kwa ndeto, “mũthenya ũveve.”
Kana nĩvatonyeka, “iĩma syĩ myatũka.” Kana “iĩma sya Mbethelu.”
Kana “thayũ wakwa wendete.”
Kana “thayũ wakwa wendete.”
Kana “thayũ wakwa wendete.”
Kana “thayũ wakwa wendete.”
Kĩĩ nĩ kĩvĩla kyavwʼĩkĩtwe kĩla kyatũmĩawa kũkua mũndũ wa vata.
Kana “ngovia ya malaa.”
Kana “nthĩa syaku iilye syĩ.”
Ndeto kwa ndeto, “mũthenya ũveve.”
Kana “iĩmanĩ ila isianĩtye na sya Levanoni.”
Kana “wĩkalonĩ wa.”
Kana “kĩtho kĩsiĩle.”
Kana nĩvatonyeka, “Kĩkonde kyaku kĩilye.”
Kana “valatiso ya.”
Kana “kĩtho kĩ.”
Kana “Vuva mũũnda wakwa o kavola.”
O na ĩngĩ, kĩu no kyonanyʼe wanake ũte na kathĩna o na kamwe.
Kana “Thayũ wakwa nĩwaendie.”
Kana nĩvatonyeka, “Thayũ wakwa nĩwandiie yĩla waneenie.”
Kana “suka wakwa mũvũthũ.”
Kana nĩvatonyeka, “ta ikata sya ndende.”
Kana nĩvatonyeka, “ndeenĩ sya mbuluti [kĩtho].”
Kana “mĩkũũ.”
Ndeto kwa ndeto, “Kaakaa.”
Kana “Ndũa ya Kwendeesya.”
Kana “nthĩa syaku iilye syĩ.”
O na ĩngĩ, kĩu no kyonanyʼe wanake ũte na kathĩna o na kamwe.
Ndeto kwa ndeto, “Nĩwe mũtheu vyũ kwa.”
Ndeto kwa ndeto, “ũsiasya nthĩ.”
Kana “mũima.”
Kĩsũngũ syĩtawa nuts.
Kana “kyandanĩ; kalũsĩnĩ.”
Kana “nĩwaumĩtye wenze.”
Kana “Thayũ.”
Kana “andũ makwa meyũmbanĩtye.”
Kana “mũsũngĩle wa Maanaimu.”
Ndeto kwa ndeto, “mũtwe waku ũilye.”
Kana “nũkwatĩtwʼe akalũma.”
Ndeto kwa ndeto, “kaakaa.”
Kana “nĩwumĩtye wenze.”
Kana “Matunda ala masũanĩawa kana no matetheesye iveti kũitava nĩmaumasya.” Ndeto kwa ndeto, “Ndutai nĩsyumasya.”
Kana “Seoli.” Ũu nĩ kwasya, mbũa ya andũ onthe. Sisya Maelesyo ma Ndeto, “Mbũa.”
Kana nĩvatonyeka, “Mũndũ ũsu akavũthwʼa.”
Kana “ũkũta mũkuvĩ.”
Kana “mũkũũ.”
Ndeto kwa ndeto, “Ngili ĩsu nĩ yaku.”