ESILA

1 Mwakanĩ wa mbee wa Mũsumbĩ Kolesi wa Velisia, nĩ kana ndeto ĩla Yeova waneenete kwĩsĩla Yelemia ĩanĩe, Yeova nĩwaamũkisye veva wa Mũsumbĩ Kolesi wa Velisia nĩ kana atangaase ũsumbĩnĩ wake wʼonthe ũndũ ũũ, ũla wasyokie aũandĩka, ayasya:

2 “Ũũ nĩwʼo Mũsumbĩ Kolesi wa Velisia ũkwasya, ‘Yeova Ngai wa ĩtunĩ nũnengete mosumbĩ onthe ma nthĩ, na nũmbĩaĩe nĩmwakĩe nyũmba Yelusalemu kũu Yuta. 3 Mũndũ o na wĩva katĩ wenyu inywʼĩ andũ make onthe, Ngai wake nĩethĩwe vamwe nake, na nĩambate Yelusalemu kũu Yuta, nĩ kana akake ĩngĩ nyũmba ya Yeova Ngai wa Isilaeli, ũla nyũmba yake yaĩ Yelusalemu;* ũsu nĩwe Ngai ũla wa wʼo. 4 Mũndũ o na wĩva ũla wĩkalaa ta mũeni, o na ethĩwa e va, atũi make* nĩmamũtetheesye kwa kũmũnenga vetha na thaavu, malĩ na indo, o vamwe na nthembo ya ngenda kwondũ wa nyũmba ya Ngai ũla wa wʼo, ĩla yaĩ Yelusalemu.’”

5 Na ĩndĩ aũngamĩi ma nyũmba sya aa-ĩthe ma Yuta na Mbenyamini na athembi na Alivai, andũ onthe ala Ngai ũla wa wʼo waamũkisye veva woo, meeyũmbanyʼa nĩ kana mambate makake ĩngĩ nyũmba ya Yeova, ĩla yaĩ Yelusalemu. 6 Onthe ala mamathyũlũlũkĩte nĩmamatetheeisye kwa kũmanenga* mĩio ya vetha na ya thaavu, malĩ, indo, na syĩndũ sya vata, o vamwe na nthembo sya ngenda.

7 O na ĩngĩ, Mũsumbĩ Kolesi nĩwaumaalilye mĩio ya nyũmba ya Yeova ĩla Nevukatinesa woosete kuma Yelusalemu na akamĩia nyũmbanĩ ya ngai yake. 8 Mũsumbĩ Kolesi wa Velisia nĩwamyumaalilye yĩ mokonĩ ma Mithiletathi mũsũvĩi wa mbesa, ũla wamĩtalile kwondũ wa Sesivasali* mũnene wa Yuta.

9 Ũũ nĩwʼo waĩ ũtalo wa mĩio ĩsu: ikavũ 30 iseũvĩtwʼe na thaavu, ikavũ 1,000 iseũvĩtwʼe na vetha, ikavũ ingĩ 29, 10 tũvakũli 30 tũseũvĩtwʼe na thaavu, tũvakũli 410 tũseũvĩtwʼe na vetha, na mĩio ĩngĩ 1,000. 11 Mĩio yonthe ya thaavu na ya vetha yaĩ 5,400. Sesivasali nĩwakuie mĩio ĩsu yonthe yĩla andũ ala matavĩtwe maumie Mbavilonĩ mathi Yelusalemu.

2 Na aa nĩmo andũ ma kĩsio kya nthĩ* ala mambatie kuma katĩ wa andũ ala matavĩtwe, ala Mũsumbĩ Nevukatinesa wa Mbavilonĩ woosete na akamatwaa Mbavilonĩ ta mũtavo na ala ĩtina masyokie Yelusalemu na Yuta, kĩla ũmwe ndũanĩ yake, 2 ala masyokanisye na Nzeluvaveli, Yesua, Neemia, Selaia, Leelaia, Molitekai, Mbilisani, Misivali, Mbikivai, Leumu, na Mbaana.

Ũtalo wa aũme Aisilaeli wailye ta ũũ: 3 ana ma Valosi, 2,172; 4 ana ma Sevatia, 372; 5 ana ma Alaa, 775; 6 ana ma Vaathi-moavi, nzyawanĩ sya Yesua na Yoavu, 2,812; 7 ana ma Elamu, 1,254; 8 ana ma Nzatu, 945; 9 ana ma Nzakai, 760; 10 ana ma Mbani, 642; 11 ana ma Mbevai, 623; 12 ana ma Asikati, 1,222; 13 ana ma Atonikamu, 666; 14 ana ma Mbikivai, 2,056; 15 ana ma Atini, 454; 16 ana ma Ateli, nzyawanĩ sya Esekia, 98; 17 ana ma Mbenzai, 323; 18 ana ma Yola, 112; 19 ana ma Asumu, 223; 20 ana ma Ngivali, 95; 21 ana ma Mbethileemu, 123; 22 aũme ma Netova, 56; 23 aũme ma Anathothi, 128; 24 ana ma Asimavethi, 42; 25 ana ma Kiliathi-yealimu, Kevila, na Mbeelothi, 743; 26 ana ma Lama na Ngeva, 621; 27 aũme ma Mikimasu, 122; 28 aũme ma Mbetheli na Ai, 223; 29 ana ma Nevo, 52; 30 ana ma Makivisi, 156; 31 ana ma Elamu ũla ũngĩ, 1,254; 32 ana ma Alimu, 320; 33 ana ma Lotu, Atiti, na Ono, 725; 34 ana ma Yeliko, 345; 35 ana ma Senaa, 3,630.

36 Ũtalo wa athembi wailye ta ũũ: ana ma Yetaia kuma nyũmbanĩ ya Yesua, 973; 37 ana ma Imeli, 1,052; 38 ana ma Vasuli, 1,247; 39 ana ma Alimu, 1,017.

40 Ũtalo wa Alivai wailye ta ũũ: ana ma Yesua na Katimieli, kuma mũsyĩnĩ wa Otavia, 74. 41 Ũtalo wa aini wailye ta ũũ: ana ma Asavu, 128. 42 Ũtalo wa ana ma asũvĩi ma mĩvĩa wailye ta ũũ: ana ma Salumu, ana ma Ateli, ana ma Talimoni, ana ma Akuvu, ana ma Atita, ana ma Sovai, onthe me vamwe, 139.

43 Athũkũmi ma ĩkalũnĩ* ala masyokie maĩ aa: ana ma Nziia, ana ma Asuva, ana ma Tavaothi, 44 ana ma Kelosi, ana ma Siaa, ana ma Vatoni, 45 ana ma Levana, ana ma Akava, ana ma Akuvu, 46 ana ma Akavu, ana ma Salimai, ana ma Anani, 47 ana ma Ngiteli, ana ma Kaali, ana ma Leaia, 48 ana ma Lesini, ana ma Nekota, ana ma Ngasamu, 49 ana ma Usa, ana ma Vasea, ana ma Mbesai, 50 ana ma Asina, ana ma Ameuni,* ana ma Nevusimu,* 51 ana ma Mbakivuki, ana ma Akuva, ana ma Aliuli, 52 ana ma Mbasiluthi, ana ma Meita, ana ma Alisa, 53 ana ma Mbalikosi, ana ma Sisela, ana ma Tema, 54 ana ma Nesia, ana ma Ativa.

55 Ana ma athũkũmi ma Solomoni ala masyokie maĩ aa: ana ma Sotai, ana ma Sovelethi, ana ma Veluta, 56 ana ma Yaala, ana ma Ndalikoni, ana ma Ngiteli, 57 ana ma Sevatia, ana ma Atili, ana ma Vokelethi-asevaimu, ana ma Ami.

58 Athũkũmi onthe ma ĩkalũnĩ* vamwe na ana ma athũkũmi ma Solomoni maĩ 392.

59 Aa nĩmo mambatie kuma Teli-mela, Teli-alisa, Keluvi, Atoni, na Imeli, ĩndĩ mayaĩ matonya kũĩkĩĩthya kana nyũmba sya aa-ĩthe moo syaĩ sya Isilaeli na kana mo ene maĩ Aisilaeli: 60 ana ma Ndelaia, ana ma Tovia, ana ma Nekota, 652. 61 Na kuma kwa ana ma athembi vaĩ ana ma Avaia, ana ma Akosi, na ana ma Mbalisilai, ũla waumisye kĩveti eĩtunĩ ma Mbalisilai, ũla waĩ Mũngileati, na eetanĩwʼa na ĩsyĩtwa ya mũsyĩ woo. 62 Asu nĩmo mamanthie masyĩtwa ma mĩsyĩ yoo lekotinĩ sya masyĩtwa ma mĩsyĩ yonthe, ĩndĩ mayaamona, na kwoou mayaaĩtĩkĩlwʼa ũthũkũminĩ wa ũthembi.* 63 Ngavana* nĩwamatavisye kana mayaĩ matonya kũya syĩndũ ila ntheu vyũ nginya yĩla vakakwatĩkana mũthembi ũtonya kũkũlya ũtao atũmĩĩte Ulimu na Thumimu.

64 Ũtalo wa ũmbano wʼonthe waĩ 42,360, 65 tũteũtala aũme moo ngombo na aka ngombo, ala maĩ 7,337; o na maĩ na aini aũme na aini aka 200. 66 maĩ na mbalasi 736, nyũmbũ 245, 67 ngamĩle 435, mangʼoi 6,720.

68 Yĩla mavikie nyũmbanĩ ya Yeova kũu Yelusalemu, aũngamĩi amwe ma nyũmba sya aa-ĩthe moo nĩmanenganie nthembo sya ngenda kwondũ wa nyũmba ya Ngai ũla wa wʼo, nĩ kana ĩkakwe ĩngĩ* vala yaĩ. 69 Nĩmanenganie kĩnandũnĩ kya wĩa ũsu kwosana na kĩla maĩ nakyo, ndulakima 61,000* sya thaavu, mina 5,000* sya vetha, na kanzũ 100 kwondũ wa athembi. 70 Na ĩndĩ athembi, Alivai, aini, asũvĩi ma mĩvĩa, athũkũmi ma ĩkalũnĩ,* na andũ ala angĩ matũa ndũanĩ syoo, na kwoou Aisilaeli onthe matũa ndũanĩ syoo.

3 Yĩla mwei wa mũonza wavikie ĩtina wa Aisilaeli* kũtũa ndũanĩ syoo, nĩmoombanĩie Yelusalemu me na kĩeleelo kĩmwe. 2 Yesua mwana wa Yeosataki vamwe na athembi ala angĩ na Nzeluvaveli mwana wa Sealitieli vamwe na ana-a-ĩthe nĩmookĩlile na maaka kĩthembeo kya Ngai wa Isilaeli, nĩ kana mathembe nthembo sya kũvĩvwʼa ĩũlũ wakyo, o tondũ vaandĩkĩtwe Mĩaonĩ ya Mose, mũndũ wa Ngai ũla wa wʼo.

3 Na kwoou maaka kĩthembeo kĩu vala kyaakĩtwe mbeenĩ, o na kau nĩmakĩaa andũ ma nthĩ ila syamathyũlũlũkĩte, na mambĩĩa kũthembea Yeova nthembo sya kũvĩvwʼa ĩũlũ wakyo, nthembo ya kwakya ya kũvĩvwʼa na nthembo ya ĩ ya wĩoo ya kũvĩvwʼa. 4 Na ĩndĩ matanĩa Mboka ya Ivanda* o tondũ vaandĩkĩtwe, na kĩla mũthenya nĩmathembaa nthembo sya kũvĩvwʼa kwosana na ũtalo ũla watwʼĩtwe. 5 Ĩtina wa ũu, nĩmathembaa ĩla nthembo ya kũvĩvwʼa yaĩlĩte kumwʼa kĩla ĩvinda na nthembo sya kũtisa kwa mwei na nthembo sya mavinda onthe ala matheetwʼe ma mboka ila itwʼĩtwe mwakanĩ sya Yeova, o vamwe na nthembo sya ngenda ila kĩla ũmwe wamũeteae Yeova. 6 Kuma mũthenya wa mbee wa mwei wa mũonza nĩmambĩĩie kũthembea Yeova nthembo sya kũvĩvwʼa, o na kau mũsingi wa ĩkalũ ya Yeova ndwaĩ ũnaakwa.

7 Nĩmanengie andũ ma kwasa mavia na mavundi mbesa, na manenga andũ ma Sitoni na ma Tile kyaũya na kyaũnywʼa na mauta kwondũ wa kũtwaa mbwaũ sya mĩtalakwe* masyĩsĩlĩtye ũkanganĩ kuma Levanoni nginya Yova, o tondũ Mũsumbĩ Kolesi wa Velisia wameaĩe.

8 Mwakanĩ wa kelĩ ĩtina wa kũvika nyũmbanĩ ya Ngai ũla wa wʼo kũu Yelusalemu, mweinĩ wa kelĩ, Nzeluvaveli mwana wa Sealitieli, Yesua mwana wa Yeosataki na ana-a-asa ala angĩ moo, athembi na Alivai, na onthe ala masyokete Yelusalemu kuma kũla mekalaa me atave nĩmambĩĩie wĩa; nĩmanyuvie Alivai ala maĩ na myaka 20 kwambata nĩ kana maũngamĩe wĩa wa nyũmba ya Yeova. 9 Na kwoou Yesua, ana make na ana-a-ĩthe, na Katimieli na ana make, ala maĩ ana ma Yuta, makwatana maũngamĩe ala mathũkũmaa nyũmbanĩ ya Ngai ũla wa wʼo, me vamwe na ana ma Enatati, ana moo na ana-a-ĩthe moo, ala maĩ Alivai.

10 Na yĩla aki meekĩie mũsingi wa ĩkalũ ya Yeova, nĩvo ĩndĩ athembi mekĩĩte ngũa syoo sya ũthembi na makakwata masoo, na Alivai, ana ma Asavu, makwete masaya, maũngamie mamũtaĩe Yeova o tondũ Mũsumbĩ Ndaviti wa Isilaeli weeaĩte. 11 Na mambĩĩa kwina mayĩtĩkĩanĩsya maimũtaĩa Yeova na kũmũtũngĩa mũvea, “nũndũ nĩ mũseo; wendo wake ũtathelaa kwondũ wa Isilaeli wĩkalaa tene na tene.” Na ĩndĩ andũ onthe mookĩlya mawasya moo maimũtaĩa Yeova nũndũ mũsingi wa nyũmba ya Yeova waĩ ũnaakwa. 12 Na aingĩ katĩ wa athembi, Alivai, na aũngamĩi ma nyũmba sya aa-ĩthe moo, aũme ala akũũ moonete nyũmba ĩla ya tene, maĩa na wasya mũnene yĩla moonie mũsingi wa nyũmba ĩsu weekĩwa, na ĩvindanĩ o yĩu angĩ aingĩ mookĩlya wasya woo wʼonthe maisĩlĩla na ũtanu. 13 Na kwoou andũ mayaĩ matonya kũvathũkanyʼa wasya wa ala masĩlĩlaa nĩ ũtanu na wasya wa ala maĩaa, nĩkwĩthĩwa andũ mookĩlĩtye wasya mũnene nginya ũkethĩa wĩĩwʼĩka kũasa vyũ.

4 Yĩla amaitha ma Yuta na Mbenyamini meewie kana ala masyokete kuma kũla mekalaa me atave maendeee kwaka ĩkalũ kwondũ wa Yeova Ngai wa Isilaeli, 2 vau kwa vau nĩmaendie kũneena na Nzeluvaveli na aũngamĩi ma nyũmba sya aa-ĩthe moo na mamea atĩĩ: “Twĩtĩkĩlyei twake vamwe nenyu; nũndũ o naitũ tũthaithaa* Ngai wenyu o tondũ mwĩkaa, na nĩtwĩthĩĩtwe tũimũthembea nthembo kuma mĩthenyanĩ ya Mũsumbĩ Esali-atoni wa Asuli, ũla watũetie kũũ.” 3 Ĩndĩ Nzeluvaveli na Yesua na aũngamĩi ala angĩ ma nyũmba sya aa-ĩthe ma Isilaeli mamasũngĩa ũũ: “Mũi na kĩanda vamwe naitũ wĩanĩ wa kũmwakĩa Ngai witũ nyũmba, nũndũ nithyĩ twĩ ithyoka tũũmwakĩa Yeova Ngai wa Isilaeli nyũmba ĩno, o tondũ Mũsumbĩ Kolesi wa Velisia ũtwĩaĩe.”

4 Na ĩndĩ andũ ma nthĩ ĩsu matata ĩngĩ na ĩngĩ kũtuma andũ ma Yuta maleelya moko wĩanĩ,* na maendeea kũmatũla ngoo nĩ kana maeke kwaka. 5 Nĩmaĩvaa atai nĩ kana mavĩngĩĩse mĩvango yoo mĩthenyanĩ yonthe ya Mũsumbĩ Kolesi wa Velisia nginya ĩvindanĩ ya ũsumbĩ wa Mũsumbĩ Ndalio wa Velisia. 6 Mwambĩĩonĩ wa ũsumbĩ wa Aasuelo, nĩmaandĩkie valũa masikatĩte ekali ma Yuta na Yelusalemu. 7 Na mĩthenyanĩ ya Mũsumbĩ Alitasasita wa Velisia, Mbisilamu, vamwe na Mithiletathi, Taveeli, na anyanyae ala angĩ maandĩkĩa Mũsumbĩ Alitasasita valũa; nĩmaalyũlile valũa ũsu kwa kĩthyomo kya Kĩalamu, na maũandĩkie matũmĩĩte nthoo sya Kĩalamu.*

8 * Leumu, ũla waĩ na ũkũmũ mũnene silikalĩnĩ, na Simisai, ũla waĩ mũandĩki, nĩmaandĩkĩie Mũsumbĩ Alitasasita valũa masikatĩte Yelusalemu, na valũa ũsu waĩtye: 9 (Valũa ũsu waumĩte kwa Leumu, ũla waĩ na ũkũmũ mũnene silikalĩnĩ, na Simisai, ũla waĩ mũandĩki, na anyanya ala angĩ moo, asili na anini ma ngavana, aandĩki, andũ ma Eleki, Ambavilonĩ, ekali ma Susa, namo nĩ Aelamu, 10 na mbaĩ ingĩ ila Asenavali, ũla waĩ mũnene na wa ndaĩa, woosete ta mũtavo na akaitwaa itũe ndũanĩ sya Samalia, na andũ ala angĩ maĩ kĩsionĩ kĩla kyaĩ Mũingo wa Ũla Ũsĩ,* na 11 ũũ nĩwʼo valũa ũla mamũtũmĩie.)

“Kwaku we Mũsumbĩ Alitasasita kuma kwa athũkũmi maku, aũme ala me kĩsionĩ kĩla kĩ Mũingo wa Ũla Ũsĩ: Yu 12 mũsumbĩ namanye kana Ayuti ala mookie kũũ kwitũ maumĩte kũla ũĩ nĩmavikie Yelusalemu. Na yu makwetye kwaka ĩngĩ ndũa ĩno ngʼendu na nthũku, na maendeee kwaka ĩngĩ ngũta syayo na kũtũngĩĩa mĩsingi yayo. 13 Mũsumbĩ namanye kana ethĩwa ndũa ĩno nĩkũtũngĩĩwa na ngũta syayo iyakwa ithele, maikaĩvaa koti, ndĩvi, kana maelo, na kĩu kĩtuma mbesa ila ikolanawʼa kwondũ wa kĩnandũ kya asumbĩ ioleka. 14 Ithyĩ tũĩsaa mũnyũ* kuma nyũmbanĩ ya mũsumbĩ na tũyĩsa kwĩtĩkĩla kwona mũsumbĩ ayĩkwa naĩ, na nũndũ wa ũu, nĩtwatũma valũa nĩ kana mũsumbĩ amanye ũndũ ũũ, 15 nĩ kana ũkunĩkĩli wĩkwe ĩvukunĩ ya lekoti sya asumbĩ ala maĩ mbee waku.* Na nũkwĩthĩa ĩvukunĩ yĩu ya lekoti kana ĩno nĩ ndũa ngʼendu na ĩeteae asumbĩ na isio sya nthĩ* mũisyo, na nĩyĩthĩĩtwe na andũ mokĩlasya ũlei kuma ĩvindanĩ ya tene. Kĩu nĩkyo kyatumie ndũa ĩno yanangwa. 16 Twĩenda kũmanyĩthya mũsumbĩ kana ethĩwa ndũa ĩno nĩkũtũngĩĩwa na ngũta syayo iyakwa ithele, ndwĩĩthĩwa ũtonya kũsumbĩka* kĩsio kĩla kĩ Mũingo wa Ũla Ũsĩ.”

17 Na mũsumbĩ atũmana kwa Leumu, ũla waĩ na ũkũmũ mũnene silikalĩnĩ, na Simisai, ũla waĩ mũandĩki, na anyanya ala angĩ moo ala mekalaa Samalia na isionĩ ila ingĩ syaĩ Mũingo wa Ũla Ũsĩ, ayasya:

“Nĩnamũkethya! 18 Valũa ũla mwatũtũmĩie nũnasomiwe nesa* mbee wakwa. 19 Na nĩnĩnaumisye mwĩao ũkunĩkĩli wĩkwe, na vamanyĩka kana kuma ĩvindanĩ ya tene ndũa ĩsu nĩyĩthĩĩtwe ĩingʼendea asumbĩ, na nĩkwĩthĩĩtwe na ũlei na ũngʼendu ndũanĩ ĩsu. 20 Na Yelusalemu nĩyĩthĩĩtwe na asumbĩ me vinya ala masumbĩkie kĩsio kyonthe kĩla kĩ Mũingo wa Ũla Ũsĩ, na nĩmanengawe koti, ndĩvi, na maelo. 21 Yu ĩndĩ, umyai mwĩao andũ asu maũngamye wĩa, nĩ kana ndũa ĩsu ndĩkakwe ĩngĩ nginya yĩla ngaumya mwĩao. 22 Ĩsũvĩei mũikalekeleelye ũndũ ũsu, nĩ kana mũsumbĩ ndakaendeee kwĩkwa naĩ.”

23 Yĩla valũa wa Mũsumbĩ Alitasasita wasomiwe mbee wa Leumu na Simisai, ũla waĩ mũandĩki, na anyanya moo, nĩmaendie na mĩtũkĩ Yelusalemu vala ve Ayuti na maũngamya wĩa woo na vinya. 24 Ĩvinda yĩu nĩwʼo wĩa wa kwaka nyũmba ya Ngai, ĩla yaĩ Yelusalemu, waũngamie; na nyũmba ĩsu yekala ĩte kwakwa nginya mwakanĩ wa kelĩ wa kũsumbĩka kwa Mũsumbĩ Ndalio wa Velisia.

5 Nĩvo ĩndĩ mwathani Akai na mwathani Nzekalia ũla waĩ mwĩsũkũũe wa Ito mathanie matũnĩ ma Ayuti ala maĩ Yuta na Yelusalemu ĩsyĩtwanĩ ya Ngai wa Isilaeli ũla waĩ ĩũlũ woo. 2 Ĩvindanĩ yĩu nĩwʼo Nzeluvaveli mwana wa Sealitieli na Yesua mwana wa Yeosataki mambĩĩie kwaka ĩngĩ nyũmba ya Ngai, ĩla yaĩ Yelusalemu; na athani ma Ngai maĩ vamwe namo na nĩmamatwʼĩĩkie. 3 Nĩvo ĩndĩ Tatenai, ũla waĩ ngavana wa kĩsio kĩla kyaĩ Mũingo wa Ũla Ũsĩ,* na Sethali-mbosenai vamwe na anyanya moo mookie vala maĩ na mamakũlya: “Nũũ ũmwĩtĩkĩlĩtye kwaka nyũmba ĩno na kũminũkĩlya mwako ũũ?”* 4 Na ĩndĩ mamea: “Tũnengei masyĩtwa ma aũme ala maũngamĩe wĩa wa mwako ũũ.” 5 Ĩndĩ Ngai nĩwasyaĩĩsye* atumĩa ma Ayuti, na mayaamaũngamya nginya Ndalio ambe kũtũmĩwa livoti na aitũnga valũa wĩ na ũsũngĩo ĩũlũ wa ũndũ ũsu.

6 Ũũ nĩwʼo valũa ũla Mũsumbĩ Ndalio watũmĩiwe nĩ Tatenai ũla waĩ ngavana wa kĩsio kĩla kyaĩ Mũingo wa Ũla Ũsĩ na Sethali-mbosenai vamwe na anyanyae, ala maĩ anini ma ngavana kĩsionĩ kĩla kyaĩ Mũingo wa Ũla Ũsĩ; 7 waĩ valũa wĩ na livoti na ii nĩsyo ndeto syawʼo:

“Kwaku we Mũsumbĩ Ndalio:

“Nĩkwĩthĩwe mũuo! 8 Mũsumbĩ namanye kana nĩtũnaendie kĩsionĩ* kya Yuta nyũmbanĩ ya Ngai ũla mũnene, na nyũmba ĩsu ĩendeee kwakwa na mavia manene, na mbwaũ iendeee kwĩkĩwa ngũtanĩ. Andũ metethya wĩa ũsu me athangaau mũno na kĩthito kyoo nĩkĩtumĩte wĩa ũsu ũendeea nesa. 9 Nĩvo ĩndĩ tũnakũlilye atumĩa moo atĩĩ: ‘Nũũ ũmwĩtĩkĩlĩtye kwaka nyũmba ĩno na kũminũkĩlya mwako ũũ?’* 10 O na nĩtũnamakũlilye masyĩtwa moo, nĩ kana tũandĩke masyĩtwa ma aũme ala mamatongoesye nĩ kana ũmamanye.

11 “Ũũ nĩwʼo ũsũngĩo ũla manatũnengie: ‘Ithyĩ twĩ athũkũmi ma Ngai wa ĩtu na nthĩ, na tũendeee kwaka ĩngĩ nyũmba yaakiwe myaka mingĩ mĩvĩtu, ĩla mũsumbĩ ũmwe mũnene wa Isilaeli waakie na amĩmina. 12 Ĩndĩ nũndũ aa-ĩthe maitũ nĩmamũthatisye Ngai wa ĩtunĩ, nĩwamanenganie kwʼokonĩ kwa Mũsumbĩ Nevukatinesa wa Mbavilonĩ, ũla Mũkalitei, na mũsumbĩ ũsu aananga nyũmba ĩsu na oosa andũ amatwaa Mbavilonĩ ta mũtavo. 13 Ĩndĩ mwakanĩ wa mbee wa Mũsumbĩ Kolesi wa Mbavilonĩ, Mũsumbĩ Kolesi nĩwaumisye mwĩao nyũmba ĩno ya Ngai yakwe ĩngĩ. 14 O na ĩngĩ, Mũsumbĩ Kolesi nĩwoosie ĩkalũnĩ ya Mbavilonĩ mĩio ya thaavu na vetha ya nyũmba ya Ngai, ĩla Nevukatinesa woosie ĩkalũnĩ yĩla yaĩ Yelusalemu na amĩtwaa ĩkalũnĩ ya Mbavilonĩ. Mĩio ĩsu yanengiwe mũndũũme wĩtawa Sesivasali,* ũla watwʼĩkĩthiwʼe ngavana nĩ Kolesi. 15 Kolesi amwĩie: “Osa mĩio ĩno. Na ũithi ũmĩie ĩkalũnĩ yĩla yĩ Yelusalemu, na nyũmba ya Ngai nĩyakwe ĩngĩ vala yaĩ tene.” 16 Nĩvo ĩndĩ Sesivasali ũsu wookie, na eekĩa mĩsingi ya nyũmba ya Ngai, ĩla yĩ Yelusalemu; na kuma ĩvinda yĩu nginya ũmũnthĩ no yĩendeee kwakwa, ĩndĩ ndyaaĩsa kũthela.’

17 “Yu ĩndĩ, ethĩwa nĩ ũseo methonĩ ma mũsumbĩ, ũkunĩkĩli nĩwĩkwe vala vaiawa mavalũa na ũthwii wa mũsumbĩ kũu Mbavilonĩ, nĩ kana vamanyĩke ethĩwa kwa wʼo Mũsumbĩ Kolesi nĩwaumisye mwĩao nyũmba ya Ngai ĩla yĩ Yelusalemu yakwe ĩngĩ, na ĩndĩ tũitavwʼa ũtwi wa mũsumbĩ ĩũlũ wa ũndũ ũsu.”

6 Nĩvo ĩndĩ Mũsumbĩ Ndalio waumisye mwĩao, na ũkunĩkĩli weekwa nyũmbanĩ ya kwia mavuku ma lekoti ĩla yaĩ Mbavilonĩ vala vaiawa syĩndũ sya vata. 2 Na ĩvuku ya kũkũnzwa yooneka ngomenĩ ĩla yaĩ Ekivatana, kĩsionĩ* kya Metia, na yaandĩkĩtwe ũtwi ũũ:

3 “Mwakanĩ wa mbee wa Mũsumbĩ Kolesi, Mũsumbĩ Kolesi nĩwaumisye mwĩao ũkonetye nyũmba ya Ngai, ĩla yĩ Yelusalemu, ayasya: ‘Nyũmba ĩsu nĩyakwe ĩngĩ yĩthĩwe vandũ voo va kumĩasya nthembo na mĩsingi yayo nĩyakwe ĩngĩ na ĩilũlũmĩĩlwʼa; ũtũlu wayo ũkeethĩwa mĩkono 60,* na ũthanthau wayo ũkeethĩwa mĩkono 60, 4 na yĩakwa na lainĩ itatũ sya mavia manene na lainĩ ũmwe wa mbwaũ; na ngalama ya wĩa ũsu yĩũngamĩwa nĩ nyũmba ya mũsumbĩ. 5 O na ĩngĩ, mĩio ya thaavu na vetha ya nyũmba ya Ngai ĩla Nevukatinesa woosie ĩkalũnĩ yĩla yaĩ Yelusalemu na amĩete Mbavilonĩ nĩtũngwe, nĩ kana ĩtwawe vala yaĩlĩte ĩkalũnĩ yĩla yĩ Yelusalemu na ĩyĩiwa vau nyũmbanĩ ya Ngai.’

6 “Yu ĩndĩ, we Tatenai ngavana wa kĩsio kĩla kĩ Mũingo wa Ũla Ũsĩ,* Sethali-mbosenai, na anyanya menyu, anini ma ngavana kĩsionĩ kĩla kĩ Mũingo wa Ũla Ũsĩ, ĩvetangei vau vyũ. 7 Mũikavĩngĩĩse wĩa wa kwaka nyũmba ĩsu ya Ngai. Ngavana wa Ayuti na atumĩa ma Ayuti nĩmekwaka ĩngĩ nyũmba ya Ngai vala yaĩ tene. 8 O na ĩngĩ, nĩngũmwĩaĩa mwĩke ũndũ ũũ kwondũ wa atumĩa ma Ayuti nĩ kana make ĩngĩ nyũmba ĩsu ya Ngai: Osai mbesa kuma kĩnandũnĩ kya mũsumbĩ, kuma kotinĩ ũla ũkolanawʼa kĩsionĩ kĩla kĩ Mũingo wa Ũla Ũsĩ, na mũinenga aũme asu na mĩtũkĩ nĩ kana maendeee na wĩa ũsu mateũvĩngĩĩswa. 9 Maĩlĩte kũnengwa kyonthe kĩla kĩkwendeka; tũsalũ, ndũũme, na tũlondu, nĩ kana syĩthĩwe nthembo sya kũvĩvwʼa kwondũ wa Ngai wa ĩtunĩ, o vamwe na nganũ, mũnyũ, mbinyu, na mauta, kwosana na kĩla athembi ala me Yelusalemu mekwasya. Maĩlĩte kũnengwa syĩndũ isu kĩla mũthenya vate kũtĩĩa, 10 nĩ kana maendeee kũthemba nthembo iũmwendeesya Ngai wa ĩtunĩ na maiendeea kũvoyea mũsumbĩ na ana make mekale thayũ ĩvinda yĩasa. 11 O na ĩngĩ, nĩnaumya mwĩao kana mũndũ o na wĩva ũla ũkũvĩtũũkana na ũtwʼĩo ũũ, ũvwaũ ũkakũwa kuma nyũmbanĩ yake na ayũkĩlwʼa athĩĩwe* vo, na nyũmba yake yĩitwʼĩkĩthwʼa kyoo kya andũ onthe* nũndũ wa ĩvĩtyo yake. 12 Na Ngai ũla ũtumĩte ĩsyĩtwa yake yĩkala vandũ vau navetange mũsumbĩ o na wĩva kana andũ o na meva ala mekũkĩlya kwʼoko kwoo nĩ kana maleane na ũtwʼĩo ũũ na mayananga nyũmba ya Ngai, ĩla yĩ Yelusalemu. Nyie, Ndalio, nĩnaumya mwĩao ũũ. Na nũatĩĩwe na mĩtũkĩ.”

13 Na ĩndĩ Tatenai ũla waĩ ngavana wa kĩsio kĩla kyaĩ Mũingo wa Ũla Ũsĩ, na Sethali-mbosenai, vamwe na anyanya moo meeka na mĩtũkĩ kyonthe kĩla Mũsumbĩ Ndalio weeaĩte. 14 Na atumĩa ma Ayuti maendeea kwaka, na mwako ũsu waendeea nesa, mekĩĩtwe vinya nĩ mawathani ma Mwathani Akai na Nzekalia mwĩsũkũũe wa Ito; na mamina kwaka nyũmba ĩsu kwosana na mwĩao wa Ngai wa Isilaeli na kwosana na mwĩao wa Kolesi na Ndalio na Mũsumbĩ Alitasasita wa Velisia. 15 Maminie kwaka nyũmba ĩsu mũthenyanĩ wa katatũ wa mwei wa Atali,* mwakanĩ wa thanthatũ wa kũsumbĩka kwa Mũsumbĩ Ndalio.

16 Na ĩndĩ Aisilaeli, athembi, Alivai, na andũ ala angĩ masyokete kuma kũla mekalaa me atave mavatha nyũmba ĩsu ya Ngai kwondũ wa kũtũmĩwa me atanu. 17 Na mathemba kwondũ wa kũvathwa kwa nyũmba ya Ngai nzaũ 100, ndũũme 200, tũlondu 400, na nthenge 12 syĩthĩwe nthembo ya naĩ kwondũ wa Isilaeli yonthe kwosana na ũtalo wa mbaĩ sya Isilaeli. 18 Na manyuva athembi kwosana na ikundi syoo na Alivai kwosana na ikundi syoo nĩ kana mamũthũkũme Ngai kũu Yelusalemu, o tondũ vaandĩkĩtwe ĩvukunĩ ya Mose.

19 Na andũ ala maumĩte kũla mekalaa me atave matanĩa Vasaka mũthenyanĩ wa 14 wa mwei wa mbee. 20 Na athembi na Alivai, vate ũmwe ũkũtiala, nĩmeetheetye, na kwoou onthe maĩ atheu; nĩmathĩnzie nthembo ya Vasaka kwondũ wa andũ onthe ala maumĩte kũla mekalaa me atave, kwondũ wa athembi ala angĩ, na kwondũ woo ene. 21 Na ĩndĩ Aisilaeli ala masyokete kuma kũla mekalaa me atave maya nyama sya nthembo isu, me vamwe na onthe ala maĩ namo ala meevathanĩte na ũvuku wa mbaĩ sya nthĩ ĩsu nĩ kana mamũthaithe* Yeova Ngai wa Isilaeli. 22 O na ĩngĩ, nĩmatanĩie mboka ya mũkate ũte ĩlawa kwa mĩthenya mũonza, nũndũ Yeova nĩwatumie matana na atuma ngoo ya mũsumbĩ wa Asuli yenda kũmeka nesa, na nũndũ wa ũu, amatetheesya* wĩanĩ wa kwaka ĩngĩ nyũmba ya Ngai ũla wa wʼo, Ngai wa Isilaeli.

7 Ĩtina wa maũndũ asu, ĩvindanĩ ya ũsumbĩ wa Mũsumbĩ Alitasasita wa Velisia, Esila* nĩwasyokie. Aĩ mwana wa Selaia, mwana wa Asalia, mwana wa Ilikia, 2 mwana wa Salumu, mwana wa Nzatoki, mwana wa Aituvu, 3 mwana wa Amalia, mwana wa Asalia, mwana wa Melaiothi, 4 mwana wa Nzelaia, mwana wa Usisi, mwana wa Mbuki, 5 mwana wa Avisua, mwana wa Vineasi, mwana wa Eleasali, mwana wa Alũni mũnene wa athembi. 6 Esila ũũ ambatie kuma Mbavilonĩ. Aĩ mũandĩki* weesĩ nesa* Mĩao ya Mose, ĩla Yeova Ngai wa Isilaeli wanenganĩte. Mũsumbĩ nĩwamũnengie kyonthe kĩla weetisye, nĩkwĩthĩwa kwʼoko kwa Yeova Ngai wake kwaĩ ĩũlũ wake.

7 Amwe katĩ wa Aisilaeli, athembi, Alivai, aini, asũvĩi ma mĩomo, na athũkũmi ma ĩkalũnĩ,* nĩmambatie Yelusalemu mwakanĩ wa mũonza wa Mũsumbĩ Alitasasita. 8 Nake Esila avikie Yelusalemu mweinĩ wa katano, mwakanĩ wa mũonza wa mũsumbĩ. 9 Mũthenyanĩ wa mbee wa mwei wa mbee, nĩwʼo wambĩĩie kyalo kyake kuma Mbavilonĩ, na avikie Yelusalemu mũthenyanĩ wa mbee wa mwei wa katano, nĩkwĩthĩwa kwʼoko kũseo kwa Ngai wake kwaĩ ĩũlũ wake. 10 Esila nĩwoombanĩtye ngoo* yake nĩ kana eke ũkunĩkĩli Mĩaonĩ ya Yeova, amĩatĩĩe, na aimanyĩsya Isilaeli myolooto yayo na motwʼĩo mayo.

11 Ũũ nĩwʼo valũa ũla Mũsumbĩ Alitasasita wanengie Esila, ũla waĩ mũthembi na mũandĩki,* na waĩ na ũmanyi mwingĩ wa* mĩao na myolooto ĩla Yeova wanengie Aisilaeli:

12 * “Kuma kũla nĩĩ, nyie Alitasasita, mũsumbĩ wa asumbĩ, kwaku we mũthembi Esila, mũandĩki wa Mĩao ya Ngai wa ĩtunĩ: Ĩthĩwa na mũuo mwingĩ. Yu 13 nĩnaumya mwĩao kana kĩla ũmwe wa andũ ma Isilaeli wĩ ũsumbĩnĩ wakwa vamwe na athembi moo na Alivai moo wĩthĩwa ayenda kũsyokanyʼa naku Yelusalemu, no athi. 14 Nĩkwĩthĩwa mũsumbĩ na atai make mũonza nĩmaũtũma ũkasisye nesa ethĩwa andũ ala me Yuta na Yelusalemu nĩmaendeee kũatĩĩa Mĩao ya Ngai waku ĩla wĩ nayo.* 15 na ũikua vetha na thaavu ũla mũsumbĩ na atai make manenganĩte na ngenda kwondũ wa Ngai wa Isilaeli, ũla wĩkalaa Yelusalemu, 16 vamwe na vetha wʼonthe na thaavu wʼonthe ũla ũũnengwa kuma* kĩsionĩ kyonthe* kya Mbavilonĩ, vamwe na mĩthĩnzĩo ĩla andũ na athembi meũkũnenga na ngenda kwondũ wa nyũmba ya Ngai woo kũu Yelusalemu. 17 Waĩlĩte kũtũmĩa mbesa isu kũthooa na mĩtũkĩ nzaũ, ndũũme, tũlondu, vamwe na nthembo sya lĩu sya nyamũ isu na nthembo syasyo sya kũnyuwa, na ũithi ũithembee kĩthembeonĩ kya nyũmba ya Ngai wenyu kũu Yelusalemu.

18 “Na vetha na thaavu ũla ũkatiala, mũkeekana nawʼo ũndũ we na ana-a-asa maku mũkwona waĩle, kwosana na kwenda kwa Ngai wenyu. 19 Na mĩio yonthe ĩla ũnengetwe ĩtũmĩawe ũthũkũminĩ wa nyũmba ya Ngai waku, waĩlĩte kũmĩtwaa mbee wa Ngai kũu Yelusalemu. 20 Na syĩndũ ila ingĩ ikonetye nyũmba ya Ngai waku ũkendeka kũnengane, ũkainengane kuma kĩnandũnĩ kya mũsumbĩ.

21 “Nyie, Mũsumbĩ Alitasasita, nĩnumĩtye mwĩao kwondũ wa asũvĩi onthe ma mbesa ala me kĩsionĩ kĩla kĩ Mũingo wa Ũla Ũsĩ,* kana kyonthe kĩla mũthembi Esila, ũla mũandĩki* wa Mĩao ya Ngai wa ĩtunĩ, ũkũmwĩtya anengwe na mĩtũkĩ, 22 ĩndĩ kĩla mũũmũnenga kĩikavĩtũke talendi 100* sya vetha, koli 100* sya nganũ, mbathi 100* sya mbinyu, na mbathi 100 sya mauta, ĩndĩ mũnyũ mwĩmũnenga mũteũmũthimĩa. 23 Na mwĩao o na wĩva ũla ũkumwʼa nĩ Ngai wa ĩtunĩ kwondũ wa nyũmba ya Ngai wa ĩtunĩ nũatĩĩwe na kĩthito, nĩ kana ũthatu ndũkakanĩe ana ma mũsumbĩ na ala me ungu wa mũsumbĩ. 24 O na ĩngĩ, nĩmũũmanyĩthwʼa kana mũyaĩlĩte kwosa koti, ndĩvi, kana ĩelo kuma kwa mũndũ o na wĩva wĩthĩawa e mũthembi na Mũlivai, mwini na mũkũni wa wathi, mũsũvĩi wa mũomo, mũthũkũmi wa ĩkalũnĩ,* kana mũthũkũmi wa nyũmba ĩno ya Ngai.

25 “Naku we Esila, kwosana na ũĩ ũla ũnengetwe nĩ Ngai waku,* nyuva andũ ma kũtwʼa maũndũ na asili nĩ kana masilanasye andũ onthe ala me kĩsionĩ kĩla kĩ Mũingo wa Ũla Ũsĩ, onthe ala mesĩ mĩao ya Ngai waku; na ethĩwa ve ũmwe ũtamĩsĩ, mũmanyĩsyei. 26 Na mũndũ o na wĩva ũla ũte kũatĩĩa Mĩao ya Ngai waku na mwĩao wa mũsumbĩ aĩlĩte kũtwʼĩĩwa sila na mĩtũkĩ, ethĩwe etwʼĩĩwa kũawa, kũlũngwʼa, kumwʼa vainĩ, kana kwĩkwʼa yela.”

27 Yeova Ngai wa aa-ũmae maitũ nataĩwe, ũla weekĩie ngoonĩ ya mũsumbĩ wendi wa kwanakavya nyũmba ya Yeova ĩla yĩ Yelusalemu! 28 Na nũmbonetye wendo ũtathelaa kwa kũtuma nona ũseo methonĩ ma mũsumbĩ na atai make na anene onthe me na ũkũmũ ala me mbee ũsumbĩnĩ wake. Na kwoou neethĩwa na ũkũmbaũ* nũndũ kwʼoko kwa Yeova Ngai wakwa kwaĩ ĩũlũ wakwa, na noombanyʼa aũme ala maĩ atongoi ma* Isilaeli nĩ kana mambate vamwe nakwa Yelusalemu.

8 Yu ĩndĩ, aa nĩmo aũngamĩi ma nyũmba sya aa-ĩthe ma ala mambatie nakwa kuma Mbavilonĩ ĩvindanĩ ya ũsumbĩ wa Mũsumbĩ Alitasasita kwosana na ũndũ maandĩkĩthĩtwʼe lekotinĩ sya mĩsyĩ yoo: 2 Kuma kwa ana ma Vineasi, Ngelisomu; kuma kwa ana ma Ithamali, Ndanieli; kuma kwa ana ma Ndaviti, Atusi; 3 kuma kwa ana ma Sekania, kuma kwa ana ma Valosi, Nzekalia, na aĩ vamwe na aũme 150 ala maandĩkĩthĩtwʼe; 4 kuma kwa ana ma Vaathi-moavi, Elio-enai mwana wa Nzelaia, na aĩ vamwe na aũme 200; 5 kuma kwa ana ma Nzatu, Sekania mwana wa Yaanzieli, na aĩ vamwe na aũme 300; 6 kuma kwa ana ma Atini, Eveti mwana wa Yonathani, na aĩ vamwe na aũme 50; 7 kuma kwa ana ma Elamu, Yesaia mwana wa Athalia, na aĩ vamwe na aũme 70; 8 kuma kwa ana ma Sevatia, Nzevatia mwana wa Mikaeli, na aĩ vamwe na aũme 80; 9 kuma kwa ana ma Yoavu, Ovatia mwana wa Yeielu, na aĩ vamwe na aũme 218; 10 kuma kwa ana ma Mbani, Selomithi mwana wa Yosiviia, na aĩ vamwe na aũme 160; 11 kuma kwa ana ma Mbevai, Nzekalia mwana wa Mbevai, na aĩ vamwe na aũme 28; 12 kuma kwa ana ma Asikati, Yoanani mwana wa Akatani, na aĩ vamwe na aũme 110; 13 kuma kwa ana ma Atonikamu, ala maĩ ma mũthya, masyĩtwa moo maĩ aa: Elivieleti, Yeieli, na Semaia, na maĩ vamwe na aũme 60; 14 na kuma kwa ana ma Mbikivai, Uthai na Nzavuti, na maĩ vamwe na aũme 70.

15 Nĩnamombanĩisye onthe ũsĩnĩ ũla ũlikĩte Aava, na twamba kambi vau mĩthenya ĩtatũ. Ĩndĩ yĩla nasyaisye nesa andũ ala maĩ vo vamwe na athembi, neethĩie kana vayaĩ Mũlivai o na ũmwe. 16 Na kwoou natũmana Elieseli, Alieli, Semaia, Elinathani, Yalivu, Elinathani, Nathani, Nzekalia, na Mesulamu, ala maĩ atongoi, o vamwe na Yoialivu na Elinathani, ala maĩ amanyĩsya. 17 Na ĩndĩ nameaĩa mathi vala ve Ito, ũla waĩ mũtongoi kĩsionĩ kyeetawa Kasivia. Nameie makatavye Ito na ana-a-asa make, ala maĩ athũkũmi ma ĩkalũnĩ* kũu Kasivia, matũetee athũkũmi kwondũ wa nyũmba ya Ngai witũ. 18 Na nũndũ kwʼoko kũseo kwa Ngai witũ kwaĩ ĩũlũ witũ, nĩmatũeteie mũndũũme mũĩ katĩ wa ana ma Mali mwĩsũkũũe wa Livai mwana wa Isilaeli, nake nĩ Selevia, na ana make na ana-a-ĩthe, aũme 18; 19 na Asavia, ũla waĩ vamwe na Yesaia kuma kwa Amelali, ana-a-ĩthe make na ana moo, aũme 20. 20 Na vaĩ athũkũmi ma ĩkalũnĩ* 220, ala manenganĩtwe nĩ Ndaviti e vamwe na anene me mbee ũsumbĩnĩ nĩ kana mathũkũmae Alivai, na onthe nĩmawetetwe na masyĩtwa.

21 Na ĩndĩ natangaasĩa andũ matĩĩe kũya twĩ kũu ũsĩnĩ wa Aava, nĩ kana twĩnyivye mbee wa Ngai witũ, na tũimũkũlya atũtongoesye kyalonĩ kitũ, na aitũsũvĩa twĩ vamwe na syana sitũ na malĩ yitũ yonthe. 22 Nĩneewie nthoni kũmũkũlya mũsumbĩ atũnenge asikalĩ na atwai ma mbalasi nĩ kana matũsũvĩe tũikavithũkĩwe nĩ amaitha twĩ nzĩanĩ, nũndũ twaĩ tũnatavya mũsumbĩ ũũ: “Kwʼoko kũseo kwa Ngai witũ kwĩ ĩũlũ wa onthe ala mamũmanthaa, ĩndĩ ũthatu wake wĩ ĩũlũ wa onthe ala mamũtiaa na nũtũmĩaa vinya wake kũmakanyʼa.” 23 Na kwoou twatĩĩa kũya na twavoya Ngai witũ ĩũlũ wa ũndũ ũsu, nake eethukĩĩsya wĩsũvano witũ.

24 Nĩvo ĩndĩ nanyuvie anene ma athembi 12, namo nĩ, Selevia na Asavia, vamwe na aũme ĩkũmi katĩ wa ana-a-asa moo. 25 Na namathimĩa vetha, thaavu na mĩio ĩsu, mũvothi ũla mũsumbĩ vamwe na atai make na anene me mbee ũsumbĩnĩ wake na Aisilaeli onthe ala maĩ kĩsionĩ manenganie kwondũ wa nyũmba ya Ngai witũ. 26 Na kwoou nathima na namanenga talendi 650* sya vetha, mĩio 100 ya vetha yĩ na ũito wa talendi 2, talendi 100 sya thaavu, 27 tũvakũli 20 twa thaavu twa thooa wa ndaliki 1,000,* na mĩio 2 ya vata o ta thaavu, ĩla yaseũvĩtwʼe na ũthuku mũseo na mũkũlũte nesa.

28 Na ĩndĩ namea: “Mwĩ atheu kwa Yeova, na mĩio ĩno nĩ mĩtheu, na vetha na thaavu ũũ nĩ nthembo ya ngenda ĩnengetwe Yeova Ngai wa aa-ũmae menyu. 29 Sũvĩai syĩndũ isu nesa nginya yĩla mũkaithima mbee wa anene ma athembi na Alivai na anene ma nyũmba sya aa-ĩthe ma Aisilaeli kũu Yelusalemu, tũlumunĩ* twa nyũmba ya Yeova.” 30 Na athembi na Alivai moosa vetha na thaavu na mĩio ĩsu maĩ manathimĩwa, nĩ kana mamĩtwae Yelusalemu nyũmbanĩ ya Ngai witũ.

31 Na ĩndĩ mũthya, nĩtwakũisye twauma ũsĩnĩ wa Aava mũthenyanĩ wa 12 wa mwei wa mbee nĩ kana tũthi Yelusalemu, na kwʼoko kwa Ngai witũ kwaĩ ĩũlũ witũ, na nĩwatũvonokisye kuma kwʼokonĩ kwa mũmaitha na kuma kwa ala moveeasya nzĩanĩ. 32 Na ĩndĩ twavika Yelusalemu na twekala vau mĩthenya ĩtatũ. 33 Na mũthenyanĩ wa kana, nĩtwathimie vetha na thaavu na mĩio ĩsu nyũmbanĩ ya Ngai witũ na twamĩnengane vala ve Melemothi mwana wa Mũthembi Uliya, ũla waĩ vamwe na Eleasali mwana wa Vineasi, namo maĩ vamwe na Yosavatu mwana wa Yesua na Noatia mwana wa Mbinui, ala maĩ Alivai. 34 Syĩndũ isu syonthe nĩsyatalilwe na syathimwa ũito wasyo, na ũito ũsu waandĩkwa. 35 Ala masyokie maumĩte kũla mekalaa me atave nĩmathembeie Ngai wa Isilaeli nthembo sya kũvĩvwʼa, nzaũ 12 kwondũ wa Isilaeli yonthe, ndũũme 96, tũtũlũme 77, na nthenge 12 syĩthĩwe nthembo ya naĩ; syonthe syaĩ nthembo ya kũvĩvwʼa kwondũ wa Yeova.

36 Na ĩndĩ mĩao ĩsu yavĩtũkĩthiwʼe nĩ mũsumbĩ twamĩnenga anene ma makavana ma isio sya nthĩ* ma mũsumbĩ na makavana ma kĩsio kĩla kyaĩ Mũingo wa Ũla Ũsĩ,* na manengane ũtethyo kwondũ wa andũ na nyũmba ya Ngai ũla wa wʼo.

9 Na maũndũ asu mamina kwĩkwa oou, anene mooka vala nĩĩ na masya: “Andũ ma Isilaeli na athembi na Alivai mayĩvathanĩte na andũ ma nthĩ ila itũthyũlũlũkĩte na imanyĩo syoo sya kũthatya, imanyĩo sya Akanaanĩ, Aititi, Avelisi, Ayevusi, Aamimoni, Amoavi, Amisili, na Aamoli. 2 Nĩmosete eĩtu amwe moo makatwʼĩka iveti syoo na iveti sya ana moo. Na yu andũ aa, ala nĩ ũsyao mũtheu,* nĩmevulanĩtye na andũ ma nthĩ ila itũthyũlũlũkĩte. Na anene na anini ma atongoi nĩmo methĩĩtwe ma mbee kwĩka naĩ ĩno.”

3 Yĩla neewie ndeto isu oou, nĩnatembũie ngũa yakwa na ĩkoti yakwa yĩte moko na nakũanga nzwʼĩĩ imwe sya mũtwe wakwa na kĩngʼee kyakwa, na nekala nthĩ nĩ mũtelemu mũno. 4 Na ĩndĩ andũ onthe ala maĩ na kĩkĩo kya* ndeto sya Ngai wa Isilaeli moombana manthyũlũlũkĩte nũndũ wa naĩ ya andũ ala mookĩte kuma kũla mekalaa me atave; nakwa naendeea kwĩkala nthĩ nĩ mũtelemu nginya ĩvinda ya nthembo ya lĩu ya ĩ ya wĩoo.

5 Na ĩvindanĩ ya nthembo ya lĩu ya ĩ ya wĩoo, nookĩla vala nekalĩte nthĩ nĩ na kyeva, ngũa yakwa na ĩkoti yakwa yĩte moko syĩ ndembũku, na natulya ndu na natambũũkĩsya Yeova Ngai wakwa moko makwa. 6 Na nasya: “Ame Ngai wakwa, nĩngwĩwʼa nthoni na nĩngũsonoka kũkũkĩlĩlya ũthyũ wakwa, ame Ngai wakwa, nĩkwĩthĩwa naĩ ila syĩ ĩũlũ wa mĩtwe yitũ nĩ mbingĩ mũno, na mavĩtyo maitũ nĩmambatĩte nginya matunĩ. 7 Kuma mĩthenyanĩ ya aa-ũmae maitũ nginya ũmũnthĩ, ĩvĩtyo yitũ nĩyĩthĩĩtwe yĩ ĩnene; na nũndũ wa naĩ sitũ, ithyĩ ene, asumbĩ maitũ, na athembi maitũ nĩtũnenganĩtwe mokonĩ ma asumbĩ ma i nthĩ, na nĩtũaĩtwe na ũvyũ, tũkoswa ta mũtavo, tũkavenwa syĩndũ sitũ, na tũkekĩĩthwʼa nthoni, o tondũ kũilye ũmũnthĩ. 8 Ĩndĩ yu o kwa kavinda kakuvĩ, we Yeova Ngai witũ, nũtwonetye ũseo kwa kũtuma ala matialĩte mavonoka na kũtuma twĩthĩwa twĩ asũvĩĩku* vandũnĩ vaku vatheu, na kwa kũtuma metho maitũ makena, ame Ngai witũ, na kwa kũtũvuũkya o vanini ũkombonĩ witũ. 9 Nĩkwĩthĩwa o na kau twĩ ngombo, we Ngai witũ, ndwaatũtia ũkombonĩ witũ; ĩndĩ nũtwonetye wendo ũtathelaa kwa kũtuma twona ũseo methonĩ ma asumbĩ ma Velisia, na nũtũvuũkĩtye nĩ kana tũkĩlye nyũmba ya Ngai witũ na tũitũngĩĩa kũla kũombokangu na ũituma twĩthĩwa na ũkũta wa ĩvia* Yuta na Yelusalemu.

10 “Ĩndĩ yu ĩtina wa maũndũ aa, ame Ngai witũ, twĩasya ata? Nĩkwĩthĩwa nĩtũtiĩte mĩao yaku, 11 ĩla watũnengie kwĩsĩla athũkũmi maku athani, ũyasya: ‘Nthĩ ĩla mũũlika mũmĩmesye nĩ nthĩ mbuku nũndũ wa ũvuku wa ngo sya andũ ma i nthĩ, ala mamyusũĩtye ũvuku woo kuma mũthya ũmwe nginya ũla ũngĩ nũndũ wa imanyĩo syoo sya kũthatya. 12 Nũndũ wa ũu, mũikanenge ana moo eĩtu menyu, na mũikose eĩtu moo kwondũ wa ana menyu; na mũyaĩlĩte o na vanini kwĩka ũndũ o na ũmwe ũũtuma methĩwa na mũuo na maĩla, nĩ kana mwĩthĩwe na vinya na mũiya ũseo wa nthĩ ĩsu na mũimĩtiĩa ana menyu yĩthĩwe ũtiĩwa woo tene na tene.’ 13 Na ĩtina wa maũndũ onthe ala matũkwatĩte nũndũ wa meko maitũ mathũku na ĩvĩtyo yitũ ĩnene, o na kau we, ame Ngai witũ, ndwaatwĩka kwĩanana na naĩ yitũ, na nũtũekete ala twĩ vaa tũkavonoka, 14 vatonyekete ata tũkatũla mĩao yaku ĩngĩ na tũkatwaana* na andũ aa mekaa maũndũ ma kũthatya? Wʼo ũndũ ũsu ndũtuma ũtũthatĩa mũno nginya ũkatũmina vyũ, vate ũmwe ũkũtiala kana kũvonoka? 15 Ame Yeova Ngai wa Isilaeli, we wĩ mũlũngalu, nĩkwĩthĩwa amwe maitũ nĩmavonokete kũvika ũmũnthĩ. Sisya, nithyĩ aa twĩ avĩtanyʼa methonĩ maku, nĩkwĩthĩwa nũndũ wa ũndũ ũũ tũitonya kũũngama mbee waku.”

10 Na ĩndĩ Esila aendeee kũvoya na kumbũla naĩ, aiĩa avalũkĩte mbee wa nyũmba ya Ngai ũla wa wʼo, ĩkomano ĩnene ya Isilaeli, aũme, aka, na syana, yamũthyũlũlũka, nĩkwĩthĩwa andũ makwetye kũĩa mũno. 2 Nĩvo ĩndĩ Sekania mwana wa Yeielu, ũmwe wa ana ma Elamu, weeie Esila atĩĩ: “Nĩtwĩthĩĩtwe tũte aĩkĩĩku kwa Ngai witũ nũndũ nĩtũtwaĩte* aka ma mbaĩ ingĩ kuma andũnĩ ma nthĩ ĩno. Ĩndĩ o na vailye ũu, ve o wĩkwatyo kwondũ wa Isilaeli. 3 Kwoou eka twĩke ũtianĩo na Ngai twathanĩte kana nĩtũũlũngya aka asu onthe vamwe na syana syoo, kwosana na mwolooto wa Yeova na wa ala methĩawa na kĩkĩo kya* mwĩao wa Ngai witũ. Nĩtwĩkei ũndũ Mĩao ĩwetete. 4 Ũkĩla, nĩkwĩthĩwa ũndũ ũũ wĩ mokonĩ maku, na twĩ vamwe naku. Ĩthĩwa na vinya na ũyosa ĩtambya.”

5 Nĩvo ĩndĩ Esila wookĩlile na eeaĩa anene ma athembi, Alivai, na Aisilaeli onthe mevĩte kana nĩmekwĩka ũndũ ũla waĩ ũnawetwa. Na kwoou meevĩta. 6 Na ĩndĩ Esila ookĩla vala waĩ mbee wa nyũmba ya Ngai ũla wa wʼo, na athi kalumunĩ* ka Yeoanani mwana wa Eliasivu. Ĩndĩ o na kau nĩwaendie vau, ndaaya lĩu kana kũnywʼa kĩwʼũ, nĩkwĩthĩwa akwetye kũmeta nũndũ andũ ala masyokete kuma kũla mekalaa me atave mayaĩ aĩkĩĩku.

7 Na ĩndĩ matangaasa kĩla vandũ kĩsionĩ kya Yuta na Yelusalemu kana onthe ala masyokete kuma kũla mekalaa me atave mombanĩe Yelusalemu; 8 na anene na atumĩa matwʼa kana mũndũ o na wĩva ũla ũtevika mĩthenya ĩtatũ ĩte mĩthelu akavenwa malĩ yake yonthe,* na akalũngwʼa evetange ũmbanonĩ wa ala masyokete kuma kũla mekalaa me atave. 9 Na kwoou aũme onthe ma Yuta na Mbenyamini moombanĩa vamwe Yelusalemu mĩthenya ĩtatũ ĩte mĩthelu; moombanie mweinĩ wa kenda, mũthenyanĩ wa 20 wa mwei ũsu. Andũ onthe mekalĩte nthĩ kĩwanzanĩ kya nyũmba ya Ngai ũla wa wʼo, maitetema nũndũ wa ũito wa kĩla kyaendeee na nũndũ wa mbua mbingĩ.

10 Na ĩndĩ mũthembi Esila ookĩla na amea atĩĩ: “Nĩmwĩthĩĩtwe mũte aĩkĩĩku nũndũ nĩmũtwaĩte aka ma mbaĩ ingĩ, na nũndũ wa ũu, nĩmwongeleele ĩvĩtyo ya Isilaeli. 11 Yu ĩndĩ, umbũlai naĩ syenyu mbee wa Yeova Ngai wa aa-ũmae menyu na mũyĩka kwenda kwake. Taanĩsyai na andũ ma nthĩ ĩno na mũitaanĩsya na aka aa ma mbaĩ ingĩ.” 12 Nĩvo ĩndĩ ũmbano wʼonthe wasũngĩie na wasya mũnene wasya: “Nĩ kĩanda kitũ kwĩka o ũndũ wasya. 13 Ĩndĩ vaa ve andũ aingĩ, na nĩ ĩvinda ya mbua. Vaitonyeka kũũngama nza, na ũndũ ũũ ndwĩkua o mũthenya ũmwe kana ĩlĩ, nĩkwĩthĩwa nĩtũvĩtĩtye mũno ũndũnĩ ũũ. 14 Kwoou yu, nĩtũũkwĩsũva, eka anene maitũ mekale vaa vandũ va ũmbano wʼonthe; na eka aũme onthe ala me ndũanĩ sitũ matwaĩte aka ma mbaĩ ingĩ moke ĩvindanĩ yĩla yĩtwʼĩtwe, vamwe na atumĩa na asili ma kĩla ndũa, nĩ kana tũvoovye ũthilĩku wa Ngai witũ ũla ũtwakanĩe nũndũ wa ũndũ ũũ.”

15 Ĩndĩ Yonathani mwana wa Asaeli na Yaseia mwana wa Tikiva maleana na ũndũ ũsu, na Mesulamu na Savethai, ala maĩ Alivai, mamakwata mbau. 16 Ĩndĩ ala masyokete kuma kũla mekalaa me atave meeka kwosana na ũtwi ũla waĩ ũneekwa; na mũthembi Esila na aũngamĩi ma mĩsyĩ ya nyũmba sya aa-ĩthe moo, onthe maandĩkĩtwe na masyĩtwa, moombana nzama me oka mũthenyanĩ wa mbee wa mwei wa ĩkũmi nĩ kana maneenee ũndũ ũsu; 17 na kũvikĩĩa mũthenyanĩ wa mbee wa mwei wa mbee nĩmaminanĩte na ngewa ya aũme onthe ala matwaĩte aka ma mbaĩ ingĩ. 18 Na ĩndĩ vamanyĩka kana ana amwe ma athembi nĩmatwaĩte aka ma mbaĩ ingĩ: kuma kwa ana ma Yesua mwana wa Yeosataki na ana-a-ĩthe, vaĩ Maaseia, Elieseli, Yalivu, na Ngetalia. 19 Ĩndĩ nĩmathanie* kana nĩmeũlũngya iveti syoo, na nũndũ maĩ na ĩvĩtyo, nĩmatwie kũthemba ndũũme ĩmwe kuma ndĩthyanĩ kwondũ wa ĩvĩtyo yoo.

20 Kuma kwa ana ma Imeli vaĩ Aanani na Nzevatia; 21 na kuma kwa ana ma Alimu vaĩ Maaseia, Eliya, Semaia, Yeielu, na Usia; 22 na kuma kwa ana ma Vasuli vaĩ Elioenai, Maaseia, Isimaeli, Nethaneli, Yosavatu, na Eleasa. 23 Na kuma kwa Alivai vaĩ Yosavatu, Simei, Kelaia (no we Kelita), Vethaia, Yuta, na Elieseli; 24 na kuma kwa aini vaĩ Eliasivu; na kuma kwa asũvĩi ma mĩomo vaĩ Salumu, Telemu, na Uli.

25 Na katĩ wa Aisilaeli, kuma kwa ana ma Valosi vaĩ Lamia, Isia, Malikiya, Miyamini, Eleasali, Malikiya, na Mbenaia; 26 na kuma kwa ana ma Elamu vaĩ Matania, Nzekalia, Yeielu, Aviti, Yelemothi, na Eliya; 27 na kuma kwa ana ma Nzatu vaĩ Elioenai, Eliasivu, Matania, Yelemothi, Nzavati, na Asisa; 28 na kuma kwa ana ma Mbevai vaĩ Yeoanani, Aanania, Nzavai, na Athilai; 29 na kuma kwa ana ma Mbani vaĩ Mesulamu, Maluku, Ataia, Yasuvu, Seali, na Yelemothi; 30 na kuma kwa ana ma Vaathi-moavi vaĩ Atina, Kelali, Mbenaia, Maaseia, Matania, Mbesaleli, Mbinui, na Manase; 31 na kuma kwa ana ma Alimu vaĩ Elieseli, Isiya, Malikiya, Semaia, Simeoni, 32 Mbenyamini, Maluku, na Semalia; 33 kuma kwa ana ma Asumu vaĩ Matenai, Matata, Nzavati, Elivieleti, Yelemai, Manase, na Simei; 34 kuma kwa ana ma Mbani vaĩ Maatai, Amilamu, Ueli, 35 Mbenaia, Mbeteia, Kelui, 36 Vania, Melemothi, Eliasivu, 37 Matania, Matenai, na Yaasu; 38 na kuma kwa ana ma Mbinui vaĩ Simei, 39 Selemia, Nathani, Ataia, 40 Makinatevai, Sasai, Sialai, 41 Asaleli, Selemia, Semalia, 42 Salumu, Amalia, na Yosevu; 43 na kuma kwa ana ma Nevo vaĩ Yeieli, Matithia, Nzavati, Nzevina, Yatai, Yoeli, na Mbenaia. 44 Asu onthe nĩmatwaĩte aka ma mbaĩ ingĩ, na nĩmalũngilye aka asu vamwe na ana moo.