Bha Ha Re Izebhudu Nin Egbe

Izebhudu nin ibhio mhan nin ikpea bi ikhuo bhi agbotu re nin mhan manman wo tii mhan bhọ. Nin mhan rẹ manman miẹn elele bhi ikoudure nin ele re nin mhan, ọkhẹke nin mhan lu gbera nin mhan rẹ gheghe deba ele ha gbe ẹghe. Baibo yọle nin mhan ha ziẹn egbe udu, beji mhan ha da sabọ ha ziẹn urẹọbhọ nọnsẹmhan. (Rom 1:​11, 12) Be mhan ha rẹ gene sabọ lu ọnan yẹ nọnsẹn?

Re ọta nin uwẹ ta rẹ ha re ikoudure nin ẹbho. Ahamiẹn uwẹ re ewanniẹn ọbhi inọnta bhi ikolo oga, hẹi wo ha talọ gbe rẹji egbe ẹ la ebi uwẹ lẹn. Ọkpakinọn, ha tẹmhọn ebi uwẹ luẹ bhi obọ Jehova, Baibo bi eguọmhandia nesọle. Ẹghe nọn hi ki rẹ khin nin mhan rẹ ne ibhio mhan nin mhan ko ga talọ, ọkhẹke nin mhan ha ta ọta nọn ha ziẹn urẹọbhọ nọnsele.

Re emhin nin uwẹ zẹ rẹ lu rẹ re ikoudure nin ibhio ẹ. Bhi ọsi ijiẹmhin, ibhio mhan eso wo zẹ rẹ sẹyẹ ha lu iwẹnna oga ọsi ẹghe rebhe arẹmiẹn ghe ele kuẹlo da ọkakale. Ibhio mhan eso ebhebhe wo dọnmhegbe rẹ ha vae bhi ikolo nan do bhi ẹkẹ uzana, arẹmiẹn ghe ele mhọn iwẹnna bhi obọ nọn gbe ele ẹghe la ele mhọn emianmhẹn nọn manman kaka nin ele khọnmhọn.

Uwẹ be re emhin nin uwẹ lu bi emhin nin uwẹ ta rẹ re ikoudure nin ibhio ẹ? Sẹyẹ, uwẹ be gbẹlokotọ rẹ dagbe emhin nin ibhio uwẹ lu la emhin nin ele taman uwẹ nin ele rẹ re ikoudure nin uwẹ?