LUẸ ỌNAN
Ebi Mhan Ha Rẹ Sabọ Ha Ye Ulọnlẹn Bhi Baibo Re Yẹ
Ọ be nọghọ uwẹ rẹ ye ulọnlẹn nin uwẹ manman hoẹmhọnlẹn re bhi Baibo? Asabọmiẹn ulọnlẹn nọn ko uwẹ udu re nọn, nọn rẹkpa uwẹ rẹ rẹban iria-eria ne bha gba, la ulọnlẹn nin uwẹ ho nin uwẹ rẹman ọria nọn. (Ps. 119:11, 111) Fẹ emhin eso ghe ne ha sabọ rẹkpa uwẹ rẹ ha ye ulọnlẹn re nin uwẹ tie bhi Baibo.
Noo JW Library®. Ahamiẹn uwẹ tie Baibo bhi JW Library, dọnmhegbe ne ulọnlẹn nin uwẹ manman hoẹmhọnlẹn, nin uwẹ ho nin uwẹ yere ya bhi eji ọ ha da lẹkhẹ nin uwẹ rẹ kie miẹn ọlẹn.
Gbẹn ọne ulọnlẹn fi ọbhi eji uwẹ ha da sabọ ha daghe ọle. Gbẹn ọne ulọnlẹn nin uwẹ ho nin uwẹ yere ọbhi ebe, uwẹ ha yẹ re ọle ọbhi eji uwẹ ha da kẹ ha daghe ọle. Ẹbho eso re ọle toman ughegbe nọnsele la friji nọnsele. Eso yẹ mun ọne ulọnlẹn nin ele ho nin ele yere ifoto. Ele da yẹ re ọne ifoto rẹ kiẹn ifoto nọn da ha ribhi odalo ifoni la kọmputa nọnsele.
Gbẹn ọne ulọnlẹn ọbhi obhi kadi. Gbẹn ọne uhọnmhọnlẹn bi ulọnlẹn bhi Baibo nin uwẹ ho nin uwẹ yere ọbhi obọ ọkpa bhi ọne kadi, uwẹ ha yẹ gbẹn ebi a tẹmhọnlẹn bhi ọne ulọnlẹn ọbhi obọ nọnkẹle. Uwẹ ha lu iriọ fọ, dọnmhegbe lẹn ọne Baibo ọbhi uhọnmhọn. Bhirio, ahamiẹn eji ọne uhọnmhọn-ọta da dagbare bhi Baibo uwẹ ghe bhi ọne kadi, dọnmhegbe rẹ yere ebi a gbẹn ọbhi ọne uhọnmhọn-ọta. Bhi obọ nọnkẹle, ahamiẹn ebi a gbẹn ọbhi ọne uhọnmhọn-ọta uwẹ ghe, dọnmhegbe rẹ yere eji ọ da dagbare bhi Baibo.