Ha Noo Baibo Nọnsẹn Beji Uwẹ Rẹ Noo Ughegbe

Jemis nin odibo da re ughegbe rẹ khọkhọ Baibo nọn rẹkpa mhan rẹ daghe unan ọria nin mhan gene khin. (Jem. 1:​22-25) Be mhan ha rẹ sabọ noo Baibo nọnsẹn yẹ bọsi ughegbe?

Re ẹghe ọbhi otọ rẹ ha tie Baibo nọnsẹn. Ahamiẹn mhan re ẹjẹje ghe ughegbe yẹ re ẹlo kie, asabọmiẹn mhan i da daghe ebe khẹke nin mhan re sibhi egbe nọnsẹmhan re. Iriọ yẹ nọn, ahamiẹn mhan re otua-otua tie Baibo, mhan i da sabọ daghe eje khẹke nin mhan da fi emhin denọ bhi iẹnlẹn. Nin mhan rẹ sabọ daghe ọle, ọkhẹke nin mhan ha re ẹghe ọbhi otọ rẹ ha tie Baibo nọnsẹn.

Denọ ẹlo ọbhi eji ọ da khẹke nin uwẹ fidenọ, ọ i yi eji ọ da khẹke nin ọria ọbhebhe fidenọ. Ahamiẹn mhan ghe ughegbe ẹgheso, mhan sabọ yẹ rẹ daghe eria ne sikẹ mhan bhi ẹkẹ ọne ughegbe. Ọnan ha sunu, uwedẹ nin ele rẹ muegbe nọn bha de ọbhọ mhan wo daghe. Iriọ yẹ nọn, ahamiẹn mhan bha gbẹlokotọ, mhan sabọ rẹ tie Baibo fo dọ ha ria ẹmhọn ebi ọria ọbhebhe ha rẹ re obọ rẹkhan ọlẹn yẹ. Mhan ha lu iriọ, ọ i da rẹkpa mhan rẹ daghe eje khẹke nin mhan ha da fi emhin denọ bhi iẹnlẹn.

Hẹi lu gbera eji uwẹ ha sabọ lu sẹ. Ahamiẹn emhin nin mhan bha hoẹmhọnlẹn ọkpa mhan daghe bhi egbe mhan sade mhan ghe ughegbe, ọ sabọ rẹ gbe mhan ahu sotọ. Iriọ yẹ nọn, ahamiẹn mhan tie Baibo, ọkhẹke nin mhan mhọn ẹwanlẹn nin mhan hẹi dọ ha guanọ nin mhan lu gbera eka nin ahu mhan gbe. Jehova i guanọ nin mhan lu iriọ.—Jem. 3:17.