Ọta Nin Eria Ne Tie Ebe Nesẹmhan Nọọn

Ugbẹloghe ọsi eria Ecclesiastes 5:8 be ha tẹmhọnlẹn, la Jehova ọ ha tẹmhọnlẹn?

Ọne iBaibo nin tiele: “Uwẹ ha daghe ghe a denyẹnyẹn obhioguele la a bha lu emhin bhi uwedẹ nọn diale bi uwedẹ nọn khiale bhi agọ nọnsẹ, hẹi ji ọle han uwẹ ilo. Ọne ọria nin nọn ribhi ihe mhọn ọria ọbhebhe nọn khua okhun gbera ọle, nọn yẹ daghe ebi ọle lu. Sẹyẹ, ẹbho ebhebhe ribhọ ne khua okhun gbera ele.”​—Eccl. 5:8.

Bhi ẹlo nọnsẹmhan nin eria, mhan dẹ sabọ yọle ghe, eria ne gbẹloghe, ele ọne ulọnlẹn nin tẹmhọnlẹn. Ọkpakinọn, mhan ha ria ọle dinmhin nọnsẹn, mhan ki daghe ọle ghe, ọne ulọnlẹn yẹ ta emhin eso rẹji Jehova ne ha sabọ ko mhan udu re yẹ re izebhudu nin mhan.

Ecclesiastes 5:8 tẹmhọn ebi eria ne ribhi ugbẹloghe rẹ denyẹnyẹn ibhioguele yẹ. Ọ rẹ khẹke nin ene gbẹloghe yere ghe, ọria yẹ ribhọ nọn mhọn ahu nẹ ele, nọn ghe ele. Sẹyẹ, asabọ yẹ miẹn ghe, ọria yẹ ribhọ nọn mhọn ahu nẹ ọne ọria nọn ghe ele. Ọkpakinọn, ẹbho ne ribhi odotọ ugbẹloghe ọsi eria wo le oya ranmhude uwedẹ nọn bha gba nin ene ribhi ihe kẹkẹ rẹ gbẹloghe ele.

Arẹmiẹn eria bii mhan denyẹnyẹn mhan, ọ dẹ ko mhan udu re rẹ lẹn ghe, Jehova daghe eria rebhe ne ribhi ugbẹloghe. Mhan dẹ sabọ bhii Jehova nin ọle rẹkpa mhan. Ọ yẹ khẹke nin mhan mun udu tẹ ọle. (Ps. 55:22; Phil. 4:​6, 7) Mhan lẹnmhin ghe “Jehova gbẹlokotọ fẹ ijie rebhe bhi ọne otọ nan ghe, nin ọle da re ahu nọnsọle man bhi egbe ọsi ẹbho ne re ọkhọle rebhe ga ọle.”​—2 Chron. 16:9.

Ecclesiastes 5:8 gbotọle fanọn an man mhan emhin ne sunu bhi agbọn nin mhan da nyẹnlẹn ẹlẹnan. Ọ yẹ rẹkpa mhan lẹn ghe, ihe nọn hi ki rẹ khin nin ọria ye bhi ugbẹloghe, ọria yẹ ribhọ nọn mhọn ahu nẹ ọle. Ọnọn ki lu uhọnmhọn emhin nẹ nin mhan luẹ bhọ hi, Jehova hi ọnọn ribhi ugbẹloghe Nọn Ke Okhun Nẹ. Ugbẹloghe nọnsọle munhẹn fo. Jesu Kristi nin Ọmọn nọnsọle, ọle hi Ojie ọsi ọne Agbejele. Osẹnobulua Nọn Ke Okhun Nẹ, daghe ẹbho rebhe bi emhin rebhe. Ọle idenyẹnyẹn ọria soso. Iriọ Ọmọn nọnsọle yẹ dia.