Itue Elẹnlẹn Miuhọnmhọn Rẹ Nabhi Agbọn Ọsọgbọn

Nọa, azagba-uwa nọnsọle, bi ene elanmhẹn da nabhi ẹkẹ ọne okọ. Jehova ki khue odẹ ọsi ọne okọ fo, amẹn da munhẹn ha rọlọ. Ọne amẹn da rọ sẹbhọ ghe, ọne okọ da ha nẹ bhi okhun amẹn. Akizẹbue, ọne amẹn da vuọn ọne otọ nan rebhe. Ene eria ne i mhẹn rebhe da yuno. Sokpan, emhin soso bha sunu ji Noa bi azagba-uwa nọnsọle bhi ẹkẹ ọne okọ. Re ọkhọle ria ẹmhọn ebi ele ha rẹ ha ghọnghọn yẹ nin ele rẹ hẹnmhọn nin Jehova.

Ọne amẹn ki rọ na bhi ikpẹdẹ 40 bi asọn 40 fo, ọ da bhiẹ. Khere-khere, ọne amẹn da fẹkẹ ha ka. Akizẹbue, ọne okọ da mundia bhi uke oke. Ọrẹyiriọ, amẹn da yẹ wo vuọn ijerebhe bhi otọ, bhiriọ, Noa bi azagba-uwa nọnsọle bha sabọ sibhi ẹkẹ ọne okọ re.

Khere-khere, ọne amẹn da ka sẹsẹsẹ. Ọ gbera ukpe ọkpa nin Noa bi azagba-uwa nọnsọle gbe bhi ẹkẹ ọne okọ. Beji ọne amẹn ki ka, Jehova da taman ele ghe, ẹghe sẹle nin ele rẹ dagbare bhi ọne okọ. Ele ki dagbare, ọ da diabe ghe, agbọn ọsọgbọn ele ki ye. Ele da wo ha ghọnghọn yẹ khuẹnmhẹn Jehova nin ọle rẹ miẹn ele fan. Ranmhude ọnan, ele da zọese ji Jehova rẹ taman ọlẹn obulu.

Jehova da wo miẹn ọne izọese ọbhi egbe. Ọle da ve ghe, ọle i da yẹ kie re amẹn rẹ fuẹn emhin rebhe ne ribhi ọne otọ an. Nan rẹ ha ye ọne ive nan re, Jehova da lu ọle nin ele zegbere bhi okhun. Ọnan hi ẹghe ọhẹnhẹn nin ele rẹ dagbare bhi okhun. Uwẹ sẹ ka miẹn ele khẹ?

Jehova ki da taman Noa bi azagba-uwa nọnsọle nin ele biẹ vuọn ọne otọ nan.