Ejele Nọn Da Ha Ribhọ Rẹ Sẹbhi Ighegheghe

Bhi asọn ọkpa, Nẹbukadnẹza nin Ojie da bhohiẹ ebhohiẹ nọn bha mun ọlẹn ẹlo kore. Ọne ebhohiẹ da ha kpokpo ọle bhi ọkhọle rẹ sẹbhọ ghe, ọle bha yẹ sabọ wẹ. Ọle da tie ẹbho nesọle ne lu ilọnmhọn idunan yẹ taman ẹle yọle: ‘Bha taman mẹn ebi ebhohiẹ nin mẹn bhohiẹ mundia nan.’ Ele da yọle: ‘Ọnojie, taman mhan ebi uwẹ bhohiẹ.’ Ọkpakinọn, Nẹbukadnẹza da taman ele yọle: ‘Eye! Bha taman mẹn ebi mẹn bhohiẹ. Ibha bha da sabọ taman mẹn ebi mẹn bhohiẹ, mẹn ki gbono bha a.’ Ele da gbo kie yọle: ‘Taman mhan ebi uwẹ bhohiẹ, mhan ki taman uwẹ ebi ọne ebhohiẹ mundia nan.’ Ọne ojie da ki yọle: ‘Bha ho nin bha hiẹ mẹn. Bha taman mẹn ebi mẹn bhohiẹ!’ Ele ki da taman ọne ojie yọle: ‘Ọria soso i ribhi ọne agbọn nan nọn ha sabọ taman uwẹ ebi uwẹ bhohiẹ. Emhin nan i da sabọ lu nọn.’

Ẹkẹ da wo manman khọ Nẹbukadnẹza, rẹ sẹbhọ ghe, ọle da yọle nan gbono ene ikpea ne wanlan rebhe a ne ribhi ọne agbaẹbho. Ọnan rẹman ghe a dẹ yẹ gbe Daniẹl, Shẹdrak, Mẹshak, bi Abẹdnigo a. Daniẹl ki da taman ọne ojie nin ọle re obhi ẹghe khere nanlẹn. Daniẹl bi imọẹ ọle da nan erọnmhọn ji Jehova. Ele da bhii ọle nin ọle rẹkpa ele. Be Jehova ki lu yẹ?

Jehova da re ọne ebhohiẹ man Daniẹl bhi imianlo, yẹ taman ọlẹn ebi ọ mundia nan. Bhi ukpẹdẹ nọn rẹkhan ọlẹn, Daniẹl da bu ọguọmhandia ọsi ọne ojie dọ taman ọlẹn yọle: ‘Hẹi gbe ene ikpea ne wanlan an. Mẹn dẹ taman ọne ojie ebi ọle bhohiẹ bi ebi ọ mundia nan.’ Ọne ọguọmhandia da ki re Daniẹl bu Nẹbukadnẹza. Ele ki sẹbhi enin, Daniẹl da taman ọne ojie yọle: ‘Ebe ha sunu bhi ẹghe odalo, ele Osẹnobulua rẹman uwẹ. Ọnan hi ebi uwẹ bhohiẹ: Uwẹ da daghe udede amanzẹ nan re igolu lu uhọnmhọn nọnsọle, a da re isiliva rẹ lu udu bi obọ nesọle, a da re oze rẹ lu ẹkẹ bi itagha nesọle, a da re ẹlọnmhọn rẹ lu eran-oẹ nesọle. Sẹyẹ, a da re ẹlọnmhọn bi ekẹn rẹ lu atata-oẹ nesọle. Ọkpakinọn, udo nan na bhi oke hian da degbe oẹ ọsi ọne amanzẹ. Ọne amanzẹ da de guọghọ a, yẹ lẹnkhẹn an bii ẹbubu. Ahoho da hoho ọle kua. Ọne udo nọn degbe ọne amanzẹ da ki kiẹn udede oke, yẹ gba ọne otọ nan rebhe.’

Daniẹl da ki taman ọlẹn yọle: ‘Ọnan hi ebi ebhohiẹ nin uwẹ bhohiẹ mundia nan: Ejele nọnsẹ, ọle hi uhọnmhọn ọsi ọne amanzẹ nan re igolu lu. Eji a re isiliva lu bhi ọne amanzẹ mundia nin ugbẹloghe nọn ha vae sade ejele nọnsẹ siegbe kie. Eji a re oze lu bhi ọne amanzẹ mundia nin ugbẹloghe ọbhebhe nọn ha gbẹloghe ọne otọ nan rebhe. Ugbẹloghe nọn ha rẹkhan ọlẹn dẹ ziẹn bii ẹlọnmhọn. Atata-oẹ ọsi ọne amanzẹ mundia nin ejele nọn i mhọn okugbe. Ọ ki ha mhọn obọ ọkpa nọn ziẹn bii ẹlọnmhọn, bi obọ ọbhebhe nọn wẹghẹ a bii ekẹn. Ọne udo nọn dọ kiẹn udede oke, ọle hi Ejele nọnsi Osẹnobulua. Ọ dẹ guọguọ ejele rebhe a ne ribhi ọne otọ nan, ọle ọkpa ki ha ribhọ rẹ sẹbhi ighegheghe.’

Nẹbukadnẹza da de diguẹ bhi odalo Daniẹl yẹ debhẹre nanlẹn. Ọle da yọle: ‘Osẹnobulua nọnsẹ hi ọnọn re ọne ebhohiẹ nan man uwẹ. Osẹ nọn diabe ọle i ribhọ.’ Nẹbukadnẹza bha yẹ gbe Daniẹl a. Ọle bhọ da zẹ ọle nin ọle ha yi ọwanlẹn ọsi ene ikpea rebhe ne wanlan, sẹyẹ, nin ọle ha gbẹloghe agbaẹbho kẹkẹ ne ribhi otọ Babilọn. Uwẹ be daghe ebi Jehova rẹ wanniẹn erọnmhọn nọnsi Daniẹl yẹ?