Okọ Nin Noa Kanọ

Beji ẹghe ki rẹ ha khian, ẹbho da dọ ha bun bhi ọne otọ nan. Ene bunbun bhi ẹwẹ ele da ha lu emhin ebe. Ẹhi eso ne ribhi okhun bhọ da yẹ ha lu emhin ebe. Ele da sibhi okhun nin ele ye re vae bhi ọne otọ nan. Uwẹ be lẹn ebezẹle nin ele da lu iriọ? Ramhude ele ho nin ele kiẹn eria yẹ re ikhuo bhi amhẹn zẹle nin ele da lu iriọ.

Ene ikhuo nin ene ẹhi re da biẹ imikpea nin ele. Ene imọn da wanre yẹ manman ziẹn. Ele da ha lu emhin ebe da ẹbho yẹ zuọzuọ ele. Ọne emhin nan nin ele ha lu bha ha yẹẹ Jehova. Bhiriọ, ọle da yọle ghe, ọle dẹ re okpamẹn fuẹn ẹbho a ne lu emhin ebe.

Sokpan, okpea ọkpa ribhọ nọn wo dikẹ. Ọle wo hoẹmhọn Jehova. Elin ọlẹn hi Noa. Ọle da ha mhọn okhuo okpa bi imikpea ea. Elin ọsi ene imọn hi Shẹm, Ham, bi Jafẹt. Ele da yẹ ha mhọn ikhuo. Jehova da taman Noa ghe nin ọle kanọ udede okọ, beji a ha da miẹn ghe ọle bi azagba-uwa nọnsọle bha yu bhi ọne okpamẹn nin ọle ha rẹ fuẹn ẹbho a. Ọne okọ nin Noa kanọ da diabe udede ẹkpẹti nọn ha sabọ ha nẹ bhi okhun amẹn. Jehova da taman Noa nin ọle ne elanmhẹn ne bunbun ọbhi ẹkẹ ọne okọ, nin ọne amẹn hẹi fuẹn ele a. 

Noa da re ẹjẹje munhẹn ha kanọ ọne okọ. Ọ re ebe sẹbhi ikpe 50, ọkuẹsẹ Noa bi azagba-uwa nọnsọle kanọ ọne okọ fo. Ele da kanọ ọne okọ beji Jehova rẹ yọle nin ele rẹ kanọ ọlẹn tee. Sẹyẹ, bhi ọne ẹghe nin, Noa da ha taman ẹbho ghe amẹn dẹ rọ. Sokpan, ọria soso bha ka ọle ehọ.

Ọne ẹghe da ki sẹ nin ele rẹ nabhi ọne okọ. Ji mhan fẹghe ebe ki sunu.