Jehova Da Zẹ Joshua

Mozis sẹ wo sun ibhokhan Izrẹl bhi ikpe ne bunbun. Ọkpakinọn, ọ ki bu ẹghe nin ọle ha rẹ yu, Jehova da taman ọlẹn yọle: ‘Ọ i yi uwẹ ha sun ibhokhan Izrẹl nabhi ọne otọ nin mẹn ve nin ele. Ọkpakinọn mẹn dẹ ji uwẹ da daghe ọne otọ.’ Mozis da taman Jehova ghe, nin Ọle zẹ ọria ọbhebhe nọn ha sun ibhokhan Izrẹl. Jehova ki da taman ọlẹn yọle: ‘Ha bu Joshua, uwẹ ha taman ọlẹn ghe ọle hi ọne mẹn zẹ nọn ha sun ibhokhan Izrẹl.’

Mozis da taman ibhokhan Izrẹl ghe ọle dẹ kẹ yu, sẹyẹ, Jehova zẹ Joshua nọn sun ele nabhi otọ nin ọle ve nin ele. Mozis da ki taman Joshua yọle: ‘Hẹi ji ofẹn mun uwẹ. Jehova dẹ rẹkpa uwẹ.’ Mozis ki ne ele talọ fo, ọle da ha khian uke oke ọsi Nebo. Bhi enin Jehova da man ọlẹn otọ nin ọle ve nin Ebraham, Aizik, bi Jekọp. Ẹghe nin Mozis ki rẹ ha ribhi ikpe 120, ọle da yu.

Jehova da taman Joshua yọle: ‘Fan ẹdẹ Jọdan ra, uwẹ ha diọbhi otọ ọsi Kenan. Mẹn dẹ rẹkpa uwẹ beji mẹn rẹ rẹkpa Mozis. Ji a miẹn ghe ẹdẹ-ẹdẹ uwẹ rẹ tie uhi nesẹmhẹn. Hẹi ji ofẹn mun uwẹ. Ha mhọn izebhudu. Ha khian dọ lu emhin nin mẹn yọle nin uwẹ lu.’

Joshua da je ikpea eva nin ele dọ baba otọ ọsi Jẹriko fẹghe. Bhi okha nọn rẹkhan ọnan, mhan dẹ luẹ emhin ne sunu bhi enin. Ẹghe nin ene ikpea ki rẹ fikiere, ele da yọle ghe ọne ẹghe nan ọ rẹ khẹke nin ele rẹ nabhi otọ ọsi Kenan. Bhi ukpẹdẹ nọn rẹkhan ọlẹn, Joshua da taman ibhokhan Izrẹl nin ele koko ihẹ nọnsele yẹ muegbe rẹ sibhi eji ele da mun agọ re. Ọle da taman ene ohẹn ne mun ọne ẹkpẹti akovẹn ghe, nin ele kodalo dọ mundia khẹ ele bhi ẹdẹ Jodan. Ọne ẹdẹ wo manman ha naa. Ọkpakinọn, ẹghe nin ene ohẹn ki rẹ ji oẹ ọbhi ọne ẹdẹ, ọne ẹdẹ bha yẹ ha naa! Ene ohẹn ki khian sẹbhi adesẹ ọne ẹdẹ, ele da mundia bhi enin, rẹ dọ sẹbhi ẹghe nin ibhokhan Izrẹl rebhe rẹ fan ọne ẹdẹ ra diọbhi obọ nọnkẹle. Asabọmiẹn ọne emhin ọhan-ilo nan nọn sunu ye ibhokhan Izrẹl re ebi Jehova lu bhi Okpẹdẹ nọn Gian. Ọ be yi iriọ?

Arẹmiẹn ibhokhan Izrẹl gbe ikpe ne bunbun bhi odẹ, ele da sabọ nabhi otọ nan ve nin ele. Ele dẹ sabọ bọn uwa nian yẹ ha mhọn idunmhun kẹkẹ. Ele dẹ sabọ ha mun ugbo, ha kọ ikpẹ eran, yẹ kọ emhin nẹga uwa. Gene-gene, ọne otọ wo ha mhẹn.