Ele Bha Mun Ive Nin Ele Ve Sẹ

Jehova da taman Mozis yọle: ‘Bu mẹn re bhi uke oke. Mẹn dẹ gbẹn uhi nesẹmhẹn ọbhi udo ne dia para-para ne nin uwẹ.’ Bhiriọ, Mozis da hẹn ọne oke; ọle da debhi enin an bhi ikpẹdẹ 40 bi asọn 40. Bhi enin, Jehova da gbẹn ene uhi igbe ọbhi udo ne dia para para eva ne nanlẹn.

Akizẹbue, ibhokhan Izrẹl da ha riale ghe Mozis zẹ ele obọ. Ele da ki taman Erọn yọle: ‘Mhan guanọ ọria nọn ha sun mhan. Man osẹ nin mhan!’ Erọn da ki yọle: ‘Ibha ne igolu nesẹbha nin mẹn.’ Ọle da nian-nian ene igolu re man amanzẹ ọsi obhi ẹmena. Ene ẹbho da ki yọle: ‘Ọne obhi ẹmena nan hi Osẹnobulua nọnsẹmhan, nọn ne mhan sibhi otọ Ijipt re!’ Ele da munhẹn ha ga ọne amanzẹ yẹ dujie. Ọne emhin nan nin ele lu be gba? Eye! Ranmhude, ene ẹbho ki ka ve ghe Jehova ọkpa ele da ha ga. Bhi ejayenan nian, ele bha yẹ mun ọne ive sẹ.

Ranmhude Jehova daghe emhin nin ene ẹbho ha lu, ọle da taman Mozis yọle: ‘Huẹnre bu ene ẹbho nan. Ele lu emhin nin mẹn yọle nin ele hẹi lu, ele ga osẹ ohoghe.’ Bhiriọ, Mozis da huẹnre bhi ọne oke. Ọle da ne ene udo eva mhọn.

Mozis ki sikẹ ọne agọ, ọle da họn ghe ene ẹbho so illo. Ọle da daghe ọle ghe ele gbikhiẹn yẹ deuhọnmhọnre nin ọne obhi ẹmena. Ọnan da wo manman rẹ ẹkẹ khọ Mozis. Bhiriọ, ọle da mun ene udo gbe ọbhi otọ; ele da guọghọ a. Sẹyẹ, ọle da wo jẹje guọghọ ọne amanzẹ. Ọle da nọọn Erọn yọle: ‘Be ene ẹbho nan rẹ si uwẹ ọbhọ yẹ rẹ lu emhin nọn khọ sẹ inian?’ Erọn da yọle: ‘Hẹi van. Uwẹ lẹn ebi ene ẹbho nan diayẹ. Ele da yọle ghe ele guanọ osẹ, bhiriọ, mẹn da ne igolu nọnsele ọbhi eranlẹn, ene igolu da kiẹn ọne obhi ẹmena nan!’ Ọ bha khẹke nin Erọn lu ọne emhin nan nin ọle lu. Mozis da fikie ha khian okhun ọne oke yẹ bhii Jehova nin ọle rẹhunmhan ene ẹbho.

Jehova da rẹhunmhan ene muegbe rẹ hẹnmhọn nanlẹn. Uwẹ be daghe ebezẹle nọn da khẹke nin ibhokhan Izrẹl ha hẹnmhọn nin Mozis nin Jehova noo rẹ dia ele?