Ọ Ki Gbera Ukpe Nian Nan Rẹ Ha Khọn Bhi Ukraine—Ikhuaẹloghe Nela Baibo Re Nin Mhan?

Ẹdẹ Fraide, Fẹbuare 24, 2023, ọle ọ gba bhi ukpe nan rẹ munhẹn ha khọnlẹn bhi Ukraine. Ẹbho eso yọle ghe, egbanegbe ọsi Ukraine bi Russia ne bun sẹbhi 300,000, ele sẹ yuno la kuan egbe bhi ọne okhọnlẹn nan. Sẹyẹ, ẹbho ne bun sẹbhi 30,000 ne bha deba bhi ọne okhọnlẹn, ele sẹ yuno bhọ. Sokpan, asabọmiẹn ghe ele bun gbera iriọ.

Ọkpakinọn, ọ bha diabe ghe ọne okhọn nan dẹ kẹ fo.

• “Ọ ki bu ukpe nian nin Russia mun okhọn bu Ukraine. Sokpan, mhan bha sẹ daghe emhin nọn rẹman ghe ọne okhọnlẹn dẹ kẹ fo. Obọ ọsoso bhi ẹwẹ ele bha sẹ ke okhun nẹ bhi ọne okhọnlẹn, sẹyẹ, mhan bha daghe ọle ghe, ene obọ veva dẹ ko sabọ re ọne ẹmhọn ọi.”—NPR (National Public Radio), Fẹbuare 19, 2023.

Iloya bi ọbalọ nin ọne okhọnlẹn nan bi okhọn nekẹle sẹ si ji ẹbho ne bha lẹn-ọkpa lẹn-eva wo ba ẹbho ne bunbun bhi egbe bhi otọ agbọn rebhe. Sokpan, ikhuaẹloghe nela Baibo re nin mhan? Okhọnlẹn dẹ be fo ghẹdẹ?

Okhọn nọn ha re ọkpẹnlẹn ọbhi okhọnlẹn nekẹle rebhe

Baibo tẹmhọn okhọnlẹn nọn ha hinmhin ẹbho, ọ iyi ọnọn ha fuẹn ele a. Ọne okhọnlẹn hi Amagẹdọn. Baibo tiọle “okhọn ọsi ukpẹdẹ nọn khua ọsi Osẹnobulua Nọn Ke Okhun Nẹ.” (Revelation 16:14, 16) Osẹnobulua dẹ noo ọne okhọnlẹn rẹ re ọkpẹnlẹn ọbhi ugbẹloghe ọsi eria nọn si okhọnlẹn ne riia emhin an ẹlẹnan. Nin uwẹ rẹ lẹn ebi okhọn Amagẹdọn ha rẹ re ọfure nọn ida fo ghẹdẹ re, tie ene uhọnmhọn-ọta nan:

• “Be Hi Okhọn ọsi Armageddon?”

• “Uhọnmhunje Nọn Mhẹn, Ọle Ẹmhọn Armageddon Khin”