Re Egbe Khọkhọ Jehova Bhi Uwedẹ Nin Ọle Rẹ Mhọn Idegbere

1. Bezẹle nin idegbere nọnsi Jehova da yi emhin kpataki?

AHAMIẸN uwẹ ria ẹmhọn ẹbho ne ribhi ihe ẹlẹnan, uwẹ dẹ be sabọ yọle ghe ele mhọn idegbere? Asabọmiẹn uwẹ i da ta iriọ. Jehova nin Osẹ nọn mhọn ahu nẹ manman wo mhọn idegbere. (Ps. 113:​5-8) Ọria i ribhọ nọn mhọn idegbere sẹ bii Jehova, ọle i mhọn okpẹhio. Bhi ọne uhọnmhọn-ọta nan, mhan dẹ zilo nyan uwedẹ enẹn nin Jehova rẹ ne mhan lu emhin bi ebi ene uwedẹ enẹn rẹ rẹman yẹ ghe ọle mhọn idegbere. Mhan dẹ yẹ zilo nyan ebi Jesu rẹ re egbe khọkhọ Aba ọle yẹ bhi uwedẹ nin ọle rẹ re idegbere man. Beji mhan ha rẹ ha zilo nyan ene uwedẹ nan, ọ dẹ rẹkpa mhan rẹ manman ha sikẹ Jehova, yẹ re egbe khọkhọ ọle bhi uwedẹ nin ọle rẹ re idegbere man

ỌRIA NAN SABỌ SIKẸ JEHOVA KHIN

2. Be ọta nọn ribhi Psalm 62:8 rẹman rẹji Jehova? (Yẹ fẹ ifoto nọn ribhi odalo ọle ghe.)

² Ọ manman nọghọ nan rẹ sike ẹria ne mhọn okpẹhio. Ẹbho ne mhọn okpẹhio manman lu emhin bhi uwedẹ nọn ha rẹ ẹbho ha nẹ nin ele. Jehova bha dia iriọ. Ranmhude ghe Jehova nin Aba mhan nọn ribhi okhun mhọn idegbere, ọle da si mhan kẹ egbe yẹ yọle nin mhan ha ta ebe kpokpo mhan bhi ọkhọle man ọlẹn. (Tie Psalm 62:8.) Beji ọ rẹ ghọn aba nọn hoẹmhọn imọn nesọle rẹ ha kaehọ ebi imọn nesọle taman ọlẹn, iriọ ọ yẹ rẹ ghọn Jehova rẹ ha kaehọ erọnmhọn ọsi eguọmhandia nesọle. Bhi ọsi emhọanta, ọle gbẹn eso bhi erọnmhọn ne sẹnian ọbhi Baibo. Ọnan wo rẹman ghe ọria nan ha sabọ gene sikẹ Jehova khin. (Josh. 10:​12-14; 1 Sam. 1:​10-18) Ọkpakinọn, ahamiẹn ọnọghọ mhan rẹ ta ebe ri mhan bhi ọkhọle man Jehova kii?

3. Bezẹle nin uwẹ ha da sabọ ha mhọnlẹn bhi ọkhọle ghe, Jehova guanọ nin uwẹ ha nan erọnmhọn ji ọle ẹghe rebhe?

³ Mhan dẹ sabọ nan erọnmhọn ji Jehova aharẹmiẹn mhan riale ghe ọle bha hoẹmhọn mhan. Bezẹle nin mhan da ta iriọ? Bhi okha ọsi ọmọn nọn fuẹn uku nin Jesu khale, ọle da re Jehova rẹ khọkhọ aba nan tẹmhọnlẹn bhi ọne okha, nọn re ẹkẹ-ẹjẹjẹ man ọmọn nọnsọle. Ọne ọmọn rẹ ha riale ghe, aba ọle i da yẹ miẹn ọlẹn bhi egbe ranmhude emhin ebe nin ọle lu. Be ọne aba ki rẹ lu emhin yẹ bhi ẹghe nin ọmọn nọnsọle rẹ fikiere uwa? Jesu yọle ghe, beji ọne aba ki daghe ọmọn nọnsọle vade, “ọle da runẹ bu ọle dọ mun ọlẹn dede, yẹ re unun fiofio ọle.” (Luk 15:​17-20) Iriọ Jehova diabe ọne aba nan. Ọle họn erọnmhọn ọsi ẹbho ne lu akhiẹ, ne yẹ kpokpo-egbe ranmhude emhin ebe ne ele lu bhi eghe nọn gbera. Ranmhude Jehova mhọn idegbere zẹle nin ọle da kaehọ erọnmhọn nọnsele. (Lam. 3:​19, 20) Ranmhude ẹkẹ-ẹjẹjẹ nin Jehova mhọnlẹn, ọle ko ele udu re, yẹ rẹman ele ghe ọle hoẹmhọn ele, bọsi ọne aba nọn runẹ bu ọmọn nọnsọle. (Isa. 57:15) Be Jehova rẹ runẹ bu mhan re yẹ ẹlẹnan? Uwedẹ nọn ọle rẹ lu ọnan hi, ọle ki noo ene ewanlẹn ne ribhi agbotu, ebho ne ribhi azagba-uwa nọnsẹmhan ne yi Esali Jehova, bi ibhio mhan ne ribhi agbotu rẹ re ikoudure nin mhan. (Jem. 5:​14, 15) Ebezẹlẹ nin Jehova da re iriọ rẹkpa mhan hi, ranmhude ọle guanọ nin mhan sikẹ ọle.

4. Be Jesu rẹ rẹman yẹ ghe ọria nan sabọ sikẹ ọle khin?

⁴ Jesu wo re egbe khọkhọ Aba ọle. Jesu wo mhọn idegbere bii Aba ọle. Ọnan bhọ zẹle nin ẹbho da sabọ ha sikẹ ọle beji ọle ribhi ọne otọ nan. Ele bha ha mun ofẹn rẹ ha nọọn Jesu ọta. (Mak 4:​10, 11) Bhiriọ, Jesu ha nọọn ele ọta rẹji ẹmhọn eso, ele ki sabọ tan ọkhọle a man ọlẹn. (Mat. 16:​13-16) Sẹyẹ, ele ha dobọ, ele i mun ofẹn ghe Jesu i da yẹ miẹn ele ọbhi egbe, ranmhude ele lẹnmhin ghe, ọria nọn mhọn ẹkẹ-ẹjẹjẹ, itohan, bi iziengbe Jesu khin. (Mat. 17:​24-27) Ranmhude uwedẹ nin Jesu rẹ manman re egbe khọkhọ Aba ọle, edibo nesi Jesu da manman dọ lẹn Jehova nọnsẹn. (Jọni 14:9) Ele da dọ luẹ kere ghe, Jehova bha diabe ene mun ọkalo bhi oga bhi ẹghe nọnsele ne wo ha mhọn okpẹhio, yẹ to mun ẹbho. Ọkpakinọn, ọria nọn mhọn idegbere, nan yẹ sabọ sikẹ Jehova khin.

5. Be idegbere ha rẹ rẹkpa uwẹ yẹ rẹ ha yi ọria nan sabọ sikẹ?

⁵ Be mhan ha rẹ sabọ re egbe khọkhọ Jehova yẹ? Ahamiẹn mhan mhọn idegbere, mhan ki ha yi ọria nan sabọ sikẹ. Ahamiẹn mhan i mhọn idegbere, mhan ki ha ghe egbe mhan bii ọria nọn mhẹn gbera ẹbho nekẹle, mhan ki yẹ ha mhọn ẹlobhọ, sẹyẹ, mhan i da ha rẹhunmhan ẹbho ne lu mhan emhin ebe. Ọnan dẹ sabọ re ẹbho ha nẹ nin mhan. Bhi obọ nọnkẹle, idegbere dẹ rẹkpa mhan rẹ ha mhọn ẹkẹ-ẹjẹjẹ bi iziẹngbe. Ọ dẹ yẹ rẹkpa mhan rẹ ha rẹhunmhan. Ikpẹ esili ne sẹnian dẹ re ẹbho ha sikẹ mhan. (Kol. 3:​12-14) Ọkhẹke nin ene ewanlẹn dọnmhegbe ha yi eria nan sabọ sikẹ. Ọkpakinọn, nin ele rẹ sabọ lu ọnan, ọkhẹke nin ele dọnmhegbe ha sikẹ ibhio ele. Ọnan rẹman ghe, ele dẹ ha yi ikolo oga ghe-mẹn-ghe-uwẹ gbera nin ele rẹ ha noo itanẹnti rẹ deba bhi ikolo. Sẹyẹ, ọkhẹke nin ele ha deba ibhio ele bhi agbotu lu iwẹnna itẹmhọn Osẹnobulua nan lu rẹ na bhi uwa rẹ sẹbhi uwa sade idia nin ele ye re otọ nin ele rẹ lu iriọ. Ele ha lu iriọ, ibhio ele ki manman dọ lẹn ele nọnsẹn, sẹyẹ, ọ ki lẹkhẹ nin ene ibhio ele rẹ bu ele re bhi ẹghe nọn hi ki rẹ khin nin ele rẹ guanọ urẹkpa.

JEHOVA RE ẸWANLẸN RẸ LU EMHIN

6-7. Re ijiẹmhin man nọn rẹman ebi Jehova rẹ fi ọkhọle denọ yẹ, yẹ kaehọ ebi eguọmhandia nesọle taman ọlẹn.

⁶ Ẹbho ne mhọn okpẹhiọ manman wo riale ghe, ele lẹn emhin nẹ, ranmhude ọnan, ele i ka fi ọkhọle denọ sade ele zẹ ebi ele ha lu fo. Ọkpakinọn, Jehova hi ọnọn khua okhun nẹ ọrebhe. Ọrẹyiriọ, ranmhude idegbere nin Jehova mhọnlẹn, ọle yẹ wo dọnmhegbe rẹ fi emhin nin ọle zẹle rẹ lu denọ ẹgheso. Ji mhan fẹ ebi ọle rẹ ne Meriam nin obhio Mozis lu emhin yẹ. Meriam bi Erọn da ha zaka-zunyọn da Mozis, nin Osẹnobulua re mundia nọn ha dia ele. Ọne emhin nan nin Meriam lu da rẹman ghe, ọle bha mun ekpẹn nin Jehova. Ranmhude ọnan, ẹkẹ Meriam da ha khọ Jehova. Bhiriọ, Jehova da mun emianmhẹn egbekẹn gbe ọle. Bhi ọne ẹghe nan, Erọn da bhii Mozis nin ọle rẹkpa Meriam. Bhiriọ, Mozis ki da bhii Jehova nin ọle re egbe daan Meriam. Be Jehova ki rẹ lu emhin yẹ? Osẹnobulua bha yọle ghe ọle bhohiẹn Meriam fo, bhiriọ, iriọ ọ da ha ye. Ranmhude Jehova mhọn idegbere, ọle da fi ọkhọle denọ yẹ re egbe daan Meriam.—Num. 12:​1-15.

⁷ Jehova yẹ wo rẹman ghe, ọle mhọn idegbere bhi uwedẹ nin ọle rẹ ne Hẹzẹkaya nin Ojie lu emhin. Jehova da noo akhasẹ rẹ taman ọne ojie ghe ọle dẹ yu. Ọkpakinọn, Hẹzẹkaya da viẹ bu Jehova yẹ bhii ọle nin ọle re egbe daan ọlẹn. Ranmhude ẹkẹ-ẹjẹjẹ nin Jehova mhọnlẹn, ọle da wanniẹn erọnmhọn ọsi Hẹzẹkaya yẹ taman ọlẹn ghe, ọle dẹ hian ikpe 15 ba iẹnlẹn nọnsọle. (2 Ki. 20:​1, 5, 6) Bhi ọsi ẹmhọanta, idegbere nin Jehova mhọnlẹn re ọle mhọn ẹkẹ-ẹjẹjẹ da mhan, yẹ fi ọkhọle denọ bhi ebi ọle zẹle rẹ lu.

8. Ijiẹmhin nela rẹman ghe ọria nọn re ẹwanlẹn lu emhin Jesu khin? (Mak 3:​1-6)

⁸ Jesu wo re egbe khọkhọ Aba ọle. Beji Jesu ribhi ọne otọ nan, ọle wo ha lu emhin esili nin ẹbho bhi ẹghe nọn hi ki rẹ khin nọn rẹ khẹke. Bhi ọsi ijiẹmhin, ọle da re egbe daan ẹbho bhi ẹghe iluemhin ọsi Sabati, arẹmiẹn ene mun ọkalo bhi oga bha ka nin ọle lu iriọ. (Tie Mak 3:​1-6.) Ẹlẹnan nian, Jesu yẹ wo dọnmhegbe rẹ ha re ẹkẹ-ẹjẹjẹ man, yẹ rẹkpa ẹbho beji ọle rẹ dia agbotu. Bhi ọsi ijiẹmhin, ahamiẹn ọria bhi agbotu lu emhin ebe nọn manman kaka, ọle ki mhọn itohan da ọle, yẹ re isẹhoa nanlẹn rẹ fidenọ.—Arẹm. 2:​2-5.

9. Be mhan ha rẹ sabọ ha re ẹwanlẹn lu emhin yẹ? (Yẹ fẹ ene ifoto ghe.)

⁹ Be mhan ha rẹ sabọ re egbe khọkhọ Jehova yẹ? Ọkhẹke nin mhan wẹnna kaka rẹ re egbe khọkhọ Jehova bhi uwedẹ nin ọle rẹ ria eria, bi bhi uwedẹ nin ọle rẹ re ẹwanlẹn lu emhin. (Jem. 3:17) Bhi ọsi ijiẹmhin, ahamiẹn enebiọmọn re egbe khọkhọ Jehova, ele i da ha khẹ nin ọmọn nọnsele lu emhin nin ọne ọmọn i da sabọ lu. Jekọp wo re ijiẹmhin esili ọbhi otọ bhi ọne ẹmhọn nan bhi Genesis 33:​12-14. Enebiọmọn ne mhọn idegbere, ne yẹ re ẹwanlẹn lu emhin, i da ha re ọmọn ọkpa nọnsele rẹ khọkhọ ọbhebhe. Ọ yẹ khẹke nin ene ewanlẹn ne ribhi agbotu ha re ẹwanlẹn lu emhin. Uwedẹ ọkpa nin ọwanlẹn bhi agbotu ha rẹ lu ọnan hi, ọle ki re obọ ba ebi ene ewanlẹn nekẹle zẹle rẹ lu. Ọle i da ha yọle ghe ebi ọle tale ha sẹ. (1 Tim. 3:​2, 3) Ọkhẹke nin mhan rebhe dọnmhegbe ha lẹn otọ ebi ẹbho nekẹle ria ẹmhọnlẹn, aharẹmiẹn ọ i yi uwedẹ ọkpa mhan rẹ ria eria. Ọ yẹ khẹke nin mhan lẹn ebi emhin dia ele yẹ bhi egbe, aharẹmiẹn ọ i yi iriọ emhin dia mhan bhi egbe. (Rom 14:1) Ọkhẹke nin ọrebhe bhi agbotu ha rẹman ghe, “eria ne re ẹwanlẹn lu emhin [ele] khin.”—Fil. 4:5.

OSẸ NỌN MHỌN IZIẸNGBE JEHOVA KHIN

10. Uwedẹ nela Jehova sẹ rẹ re iziẹngbe man yẹ?

¹⁰ Asabọmiẹn uwẹ sẹ ka miẹn ọlẹn khẹ ghe, ọ i yẹẹ ẹbho ne mhọn okpẹhio rẹ mundia ha khẹ ọria. Ẹhio nin ele mhọnlẹn zẹle nin ele i da sabọ lu iriọ. Jehova bha diabe ene ẹbho nan. Ọria i ribhọ nọn mhọn iziẹngbe sẹ bii Jehova. Bhi ọsi ijiẹmhin, bhi ẹghe nọnsi Noa, Jehova da yọle ghe, ọle dẹ ziẹngbe sẹbhi ikpe 120 ọkuẹsẹ ọle dunmhun eria ọbe rebhe a. (Gen. 6:3) Ranmhude ọnan, Noa da miẹn isẹhoa rẹ sabọ bẹẹ imọn nesọle wanre nọnsẹn. Sẹyẹ, azagba-uwa nọnsọle da sabọ deba ọle bọn ọne okọ nin Jehova yọle nin ọle bọn. Bhi ẹghe ọbhebhe, Jehova da re iziẹngbe ha ka Ebraham ehọ, beji Ebraham ha nọọn inọnta ne bunbun rẹji ebi ọle ha rẹ dunmhun Sodọm bi Gomora yẹ. Sade ọria nọn mhọn okpẹhio Ebraham ha ne talọ nọn, ọle ha rẹ nọọn Ebraham yọle: ‘Uwẹ be riale imẹn bha lẹn ebi mẹn lu?’. Sokpan, ranmhude Jehova mhọn idegbere, ọle da re iziẹngbe ka Ebraham ehọ.—Gen. 18:​20-33.

11. Beji a gbẹn ọbhi 2 Pita 3:​9, bezẹle nin Jehova da re iziẹngbe man bhi ẹghe nọnsẹmhan nan?

¹¹ Jehova yẹ wo re iziẹngbe man ẹlẹnan. Ọle wo ziẹngbe khẹ ẹghe nin ọle rẹyi, nin ọle ha rẹ re ọkpẹnlẹn bhi ọne agbọn nan. Bezẹle nin ọle da ha ziẹngbe? “Ranmhude, ọle guanọ nin ẹbho rebhe fidenọ. Ọle bha guanọ nin ọria soso miẹn ugbekhuelo.” (Tie 2 Pita 3:9.) Ọ i yi ẹghe Jehova riia nin ọle rẹ ha ziẹngbe. Iziẹngbe nọnsọle wo re isẹhoa nin ẹbho ne bunbun rẹ vae dọ sikẹ ọle. Mhan rẹọbhọ ghe, ẹbho ne bunbun ne bha sẹ ha ga Jehova nian dẹ vae dọ ha ga ọle bhi ẹghe odalo. Ọkpakinọn, ọ mhọn eji Jehova ha ziẹngbe sẹ. Jehova hoẹmhọn ẹbho, ọrẹyiriọ, ọle i da wo re otọ nin ẹbho rẹ ha lu ebe ghọn ele khian. Ọle dẹ fuẹn eria ọbe a.—Hab. 2:3.

12. Be Jesu rẹ re egbe khọkhọ Jehova yẹ bhi uwedẹ nin ọle rẹ re iziẹngbe man?

¹² Jesu wo re egbe khọkhọ Aba ọle. Rẹ na bhi ikpe ne bunbun ha vade, Jesu da wo ha re egbe khọkhọ Jehova bhi uwedẹ nin ọle rẹ ziẹngbe. Ẹlo nọnsi Jesu wo sẹbhi ẹghe nin Esu rẹ bha Jehova bi eria ohoghe. (Gen. 3:​4, 5; Job 1:11; Arẹm. 12:10) Sẹyẹ, ọle wo daghe ebi eria rẹ ha loya yẹ beji ọle ribhi ọne otọ nan. Re ọkhọle ria ẹmhọn ebi ọ ha rẹ manman ha ghọn ọle yẹ rẹ dọ “riia iwẹnna nọnsi Ojuu a!” (1 Jọni 3:8) Be rẹkpa Jesu rẹ sabọ ha ziẹngbe khẹ ẹghe nin Jehova ha rẹ taman ọlẹn nin ọle dọ re ọkpẹnlẹn bhi iwẹnna nọnsi Esu rebhe? Emhin ọkpa nọn rẹkpa Jesu hi, idegbere. Ọle lẹnmhin ghe, Jehova hi ọnọn ha sabọ tare ẹghe nọn khẹke nin ọle ha rẹ re ọkpẹnlẹn ọbhi ọne agbọn nan.—Iwẹn. 1:7.

13. Be Jesu rẹ re iziẹngbe ne etuegbe nesọle lu emhin yẹ? Bezẹle nin ọle da lu iriọ?

¹³ Ẹghe nin Jesu rẹ ha ribhi ọne otọ nan, ọle da wo ha re iziẹngbe rẹ ne etuegbe nesọle lu emhin. Bhi ọsi ijiẹmhin, bhi ẹghe nin ele rẹ ha gbugan bhi igba ne bunbun, rẹji ọnọn lu okpọria nẹ bhi ẹwẹ ele, Jesu bha ha ghe ele bii eria ne i da fidenọ, sokpan, ọle da wo ha re iziẹngbe rẹ ne ele lu emhin. (Luk 9:46; 22:​24-27) Ọle da wo rẹọbhọ ghe ẹghe ha sẹ, ele dẹ fidenọ. Emhin nọn i mhẹn be ribhọ nin uwẹ dọnmhegbe rẹ rẹban, ọkpakinọn uwẹ bha sẹ sabọ khọnlẹn mioto? Ahamiẹn iriọ nọn, ha mhọnlẹn bhi ọkhọle ghe, Jesu Kristi nin ojiẹ nọnsẹmhan nọn mhọn iziẹngbe, lẹn ebi emhin dia uwẹ yẹ bhi egbe.

14. Be mhan ha rẹ sabọ guẹ ebi a rẹ re iziẹngbe man yẹ?

¹⁴ Be mhan ha rẹ sabọ re egbe khọkhọ Jehova yẹ? Ahamiẹn “mhan lẹn uwedẹ nin Kristi rẹ ria eria,” ọ ki rẹkpa mhan rẹ ha ria eria bhi uwedẹ nin Jehova rẹ ria eria, yẹ lu emhin bhi uwedẹ nin ọle rẹ lu emhin. (1 Kọr. 2:16) Be mhan ha rẹ sabọ ha ria eria bhi uwedẹ nin Kristi rẹ ria eria yẹ? Emhin ọkpa kpataki nọn ha sabọ rẹkpa mhan hi, nin mhan rẹ ha tie ebe ọsi Matiu rẹ sẹbhi ebe ọsi Jọni ẹghe rebhe, nan da gbe okha nọnsi Jesu. Mhan ha ki tie ọle fo, ọkhẹke nin mhan re ẹghe ọbhi otọ rẹ ria eria nyan ebi Jesu lu, bi ebezẹle nin ọle da lu iriọ. Ọ yẹ khẹke nin mhan bhii Jehova nin ọle rẹkpa mhan rẹ ha mhọn idegbere bọsi Jesu. Ahamiẹn mhan ria eria bhi uwedẹ nin Kristi rẹ ria eria, mhan ki sabọ ha re iziẹngbe rẹ ne egbe mhan bi ibhio mhan nin mhan ko ga lu emhin. Mhan ha lu iriọ, ọ ki rẹman ghe, imhan re egbe khọkhọ Osẹnobulua.—Mat. 18:​26-30, 35.

JEHOVA RE ẸLO ESILI GHE ẸBHO NE MHỌN IDEGBERE

15. Be Jehova sẹ rẹ re obọ rẹkhan ọta nan gbẹn ọbhi Psalm 138:6 yẹ?

¹⁵ Tie Psalm 138:6. Udede isẹhoa nọn ghe, Jehova nin Osẹnobulua nọn ke okhun nẹ lẹn ẹbho ne mhọn idegbere! Ji mhan fẹ ijiẹmhin eso ghe rẹji ẹbho ne sẹnian, ne nyẹnlẹn bhi ikpe ne bunbun ne gbera, nin Jehova re ẹlo esili ghe. Asabọmiẹn imhan i da lẹn eso bhi ẹwẹ ele, sokpan, a gbẹn elin nọnsele ọbhi Baibo. Bhi ọsi ijiẹmhin, Jehova da noo Mozis rẹ gbẹn elin ọsi okhuo ọkpa natiọle Dẹbora nin nọns ọbhi Baibo. Bhi ẹghe nọnsi Jekọp bi Aizik ọle rẹ nyẹnlẹn. Ọle wo manman ga azagba-uwa nọnsi Aizik bi Jekọp nọnsẹn rẹ na bhi ikpe 125! Ẹbho bha manman lẹn ọne okhuo nan. Ọrẹyiriọ, Jehova da ji a gbẹn elin nọnsọle ọbhi Baibo, nin ọle rẹman ọle hoẹmhọn ọlẹn. (Gen. 24:59; 35:​8, ftn.) Ikpe ne bunbun ki gbera, Jehova da zẹ Devid nin usẹn obhokhan nọn yi ọsun-ohuan, nọn ha yi ojie ọsi ibhokhan Izrẹl. (2 Sam. 22:​1, 36) Ẹghe nan rẹ la biẹ Jesu, Jehova da je ẹhi nesọle nin ele dọ taman esun-ohuan eso ghe, a biẹ Mesaya bhi agbaẹbho natiọle Bẹtlẹhẹm. Jehova wo mun ekpẹn ene esun-ohuan bhi egbe, nin ọle rẹ ji ele ha yi eria ọhẹnhẹn ne ka miẹn Jesu. (Luk 2:​8-11) Ẹghe nin Josẹf bi Meri rẹ mun Jesu vae bhi uwa oga, Jehova da re ọmọn nọnsọle man Simiọn bi Ana ne ki wanre rẹ mun ekpẹn ele bhi egbe. (Luk 2:​25-30, 36-38) Bhi ọsi ẹmhọanta, “arẹmiẹn Jehova manman kpọnọ, ọle daghe ene degbere”!

16. Be Jesu rẹ re egbe khọkhọ aba ọle yẹ bhi uwedẹ nin ọle rẹ ne ẹbho lu emhin?

¹⁶ Jesu wo re egbe khọkhọ Aba ọle. Jesu yẹ wo hoẹmhọn ẹbho ne mhọn idegbere bọsi Aba ọle. Ọle da man ‘eria khọnkhan ne bha yo isiku’ ẹmhọanta rẹji Agbejele nọnsi Osẹnobulua. (Iwẹn. 4:13; Mat. 11:25) Jesu da yẹ re egbe daan ene khọnmhọn. Ọle wo ha ne ẹbho lu emhin bhi uwedẹ nọn ha re ele ha mhọnlẹn bhi ọkhọle ghe, a hoẹmhọn ele yẹ mun ekpẹn ele bhi egbe. (Luk 5:13) Bhi ọne ukpasọn ọkuẹsẹ Jesu yu, ọle da kpe etuegbe nesọle oẹ, ẹsọn nọn rẹ khẹke igbọn. (Jọni 13:5) Ọkuẹsẹ ọle fikie ha khian okhun, ọle da mun ẹsọn kpataki nin edibo nesọle rebhe rẹ dọ sẹbhi edibo nesọle ẹlẹnan. Ọne ẹsọn hi, nin ele rẹ dọ tẹmhọn Osẹnobulua man ẹbho beji ele ha da miẹn isẹhoa rẹ nyẹnlẹn bhi ighegheghe.—Mat. 28:​19, 20.

17. Be mhan ha rẹ rẹman yẹ ghe mhan hoẹmhọn ẹbho yẹ mun ekpẹn nin ele? (Yẹ fẹ ifoto ghe.)

¹⁷ Be mhan ha rẹ sabọ re egbe khọkhọ Jehova yẹ? Mhan dẹ rẹman ghe mhan hoẹmhọn ẹbho yẹ mun ekpẹn nin ele sade mhan dọnmhegbe rẹ tẹmhọn Osẹnobulua man ele, bhi eji ọ hi ki rẹ khin nin ele na vae, ebi ele hi ki rẹ dia yẹ bhi egbe, la ebi ele hi ki rẹ yo isiku sẹ yẹ. Sẹyẹ, ọkhẹke nin mhan ha ghe ibhio mhan nin ko ga bii eria ne khua okhun nẹ mhan, aharẹmiẹn mhan ribhi ihe kpataki bhi agbotu nin ele i ye, la emhin eso ribhọ nin mhan guẹ rẹ lu, nin ele i guẹ rẹ lu. Mhan ha lu iriọ, ọ ki rẹman ghe, mhan hoẹmhọn ibhio mhan yẹ mun ekpẹn nin ele. (Fil. 2:3) Ọ manman ti Jehova bhọ sade mhan “mun ọkalo” rẹ ha mun ekpẹn nin ẹbho bhi ene uwedẹ nan, nan tẹmhọnlẹn bi uwedẹ ebhebhe ne dia nian.—Rom 12:10; Zeph. 3:12.

18. Bezẹle nin uwẹ da guanọ nin uwẹ re egbe khọkhọ Jehova bhi uwedẹ nin ọle rẹ re idegbere man?

¹⁸ Ahamiẹn mhan dọnmhegbe rẹ ha re egbe khọkhọ Jehova bhi uwedẹ nin ọle rẹ re idegbere man, ẹbho ki sabọ ha sikẹ mhan gbera ọnikhẹ. Sẹyẹ, mhan ki manman ha mhọn iziẹngbe yẹ yi ọria nọn re ẹwanlẹn lu emhin. Rẹ deba ọnin, mhan ki sabọ ha hoẹmhọn ẹbho yẹ mun ekpẹn nin ele beji Jehova lu. Mhan bhii ghe, nin uwedẹ nin mhan rẹ dọnmhegbe rẹ ha ga Jehova nin Osẹ nọn mhọn iziẹngbe, rẹ mhan ha yi eria ne manman ghan bhi ẹlo nọnsọle!—Isa. 43:4.