Uwẹ Be Miẹn Elele bhi Ebe Ukpẹdẹ Nan Tie Ẹdẹdẹ?

Uwẹ be mhọn ọlẹn bhi emhanmhan nọnsẹ nin uwẹ rẹ ha tie ebe ukpẹdẹ nọnsẹmhan natiọle Ha Luẹ IBaibo Ukpẹdẹ-ukpẹdẹ? Ahamiẹn uwẹ imhọnlẹn, dọnmhegbe nin uwẹ rẹ ha lu ọle. Ọsewewiẹ, ọle ibhio mhan ne bunbun rẹ tie ebe ukpẹdẹ. Bhiriọ, ele ki sabọ ha ria eria nyan emhin nin ele luẹle beji ele rẹ lu ilọnmhọn ukpẹdẹ-ukpẹdẹ khian. (Jos 1:8; Ps 119:97) Emhin ebhebhe sẹyẹ ribhọ nin uwẹ ha lu nin uwẹ rẹ manman ha miẹn elele gbera ọnikhẹ bhi ebe ukpẹdẹ nan tie. Tiẹ emhin nan gbẹn nẹga eji a da re ọne ebe ukpẹdẹ dagbare bhi Baibo. Yẹ dọnmhegbe nin uwẹ rẹ ria ẹmhọn okha bhi Baibo nọn diẹn mun ebi uwẹ tiẹle bhi ebe ukpẹdẹ. Uwẹ ha yẹ zilo nyan ebi uwẹ ha rẹ noo emhin nin uwẹ luẹle yẹ bhi iẹnlẹn nọnsẹ. Ahamiẹn uwẹ ji ọta nọnsi Osẹnobulua ha dia emhin nin uwẹ lu, uwẹ dẹ miẹn elele nọn bunbun.—Ps 119:105.

Bhi otọ agbọn nan rebhe, ọsewewiẹ ibhio mhan ne ribhi Bẹtẹ rẹ kugbe tie ebe ukpẹdẹ. Bhi ikpe eso ne gbera nian, agbotu da munhẹn ha ne ividio eso nan da zilo nyan ebe ukpẹdẹ bhi JW Broadcasting^® bhi obọ natiọle PROGRAMS AND EVENTS. Ẹdẹla uwẹ ghe ene ividio nan kike? Ibhude nọn ha rẹkpa uwẹ bhi idia nin uwẹ ye nian sabọ ha ribhi ẹkẹ eso. Bhi ọsi ijiẹmhin, be okha ọsi Lot ha rẹ rẹso emhanmhan nesẹ yẹ?

GHE ỌNE IVIDIO NATIỌLE HẸI HOẸMHỌN ỌNE AGBỌN NAN (1Jo 2:15). BHA HA KI GHE ỌLE FO, WANNIẸN ENE INỌNTA NAN:

• Adia nela bhi Baibo a zilo nyan bhi ebe ukpẹdẹ nan zilo nyan bhi ọne ividio nan?

• Be okha nọnsi Lot rẹ rẹman yẹ ghe okhẹnan ribhọ sade mhan hoẹmhọn ọne agbọn nan la emhin ne ribhọ?—Ge 13:12; 14:12; 19:3, 12, 13, 24-26

• Be imhan ha rẹ rẹman yẹ ghe iJehova mhan hoẹmhọn ọlẹn, ọ iyi ọne agbọn nan la emhin ne ribhọ?