Ji Iwẹnna Itẹmhọn Osẹnobulua Manman Ha Yẹẹ Uwẹ

Ọ sẹ ka nọghọ uwẹ khẹ nin uwẹ rẹ tẹmhọn Osẹnobulua? Ọ sabọ ha yiriọ rẹji mhan ne bunbun. Bezẹle? Ọ sabọ ha yi ranmhude ofẹn mun mhan rẹ nin eriọbhe talọ, la ẹbho ne ribhi eji mhan da tẹmhọn Osẹnobulua bha guanọ nin mhan nin ele talọ, la ẹkẹ mhan khọ ele. Bhi ọsi ẹmhọn-ata, ene emhin nan dẹ sabọ re ọtibhọ nin mhan mhọn da itẹmhọn Osẹnobulua fuọfuọ a. Ọkpakinọn, Osẹnobulua ọsi eghọnghọn mhan ga, ọle yẹ guanọ nin mhan re eghọnghọn ha ga ọle. (Ps 100:2; 1Ti 1:11) Be bhọ emhin ea nọn ha zẹ nin itẹmhọn Osẹnobulua a da ha ti mhan bhọ?

Ọhẹnhẹn, ranmhude, uhọnmhujie nọn re ikhuaẹloghe nin ẹbho mhan wewe khian. Arẹmiẹn ẹbho ne bunbun ẹlẹnan iyẹ mhọn ikhuaẹloghe, mhan dẹ sabọ re ‘ọta nọn mhẹn ọsi emhin ne mhẹn nẹ’ ko ẹbho udu re. (Isa 52:⁠7) Deba ọnin, ọne ọta nọn mhẹn dẹ yẹ sabọ re eghọnghọn vuọn mhan bhi udu. Ọkuẹsẹ mhan dagbare dọ ha tẹmhọn Osẹnobulua, ọkhẹke nin mhan ria eria nyan erọnmhọn nin Agbejele nọnsi Osẹnobulua da mun re bhi ọne otọ nan.

Ọzeva, ẹbho miẹn elele bhi iẹnlẹn bi oga nọnsẹle ranmhude ọta nọn mhẹn nin mhan wewe man ele. Ele ki fi ikeke gbe emhin ne si ikuan-egbe nin ele rẹ ha lu. Ele ki yẹ sabọ miẹn aribhọ ọsi ighegheghe. (Isa 48:​17, 18; Ro 1:16) Mhan re ọne iwẹnna nan guanọ ẹbho, nin mhan da rẹkpa ele rẹ miẹn uhọnmhọn. Aremiẹn ẹbho eso i guanọ nan rẹkpa ele, mhan dẹ sẹyẹ ha wewe ọle man ẹbho ne ho ne miẹn umiẹnfan.​—⁠Mt 10:​11-14.

Ọzea nọn ke okhun nẹ hi, iwẹnna itẹmhọn Osẹnobulua nin mhan lu re ogẹn ji Jehova. Ọne iwẹnna nin mhan lu manman ti ọle bhọ. (Isa 43:10; Heb 6:10) Deba ọnin, ọle yẹ re ahu ẹlinmhin nọn khiale nọnsọle nin mhan rẹ ha lu ọne iwẹnna. Bhiriọ ọkhẹke nin mhan ha bhii Jehova nọn re eghọnghọn mhan, ranmhude ghe, ọkpa bhi ikpẹ esili ọsi ahu ẹlinmhin nọn khiale, ọle eghọnghọn khin. (Ga 5:22) Jehova dẹ sabọ rẹkpa mhan rẹ khọn ọnọghọ nọn irẹ akhin nin mhan mhọnlẹn, nin mhan da sabọ re izebhudu tẹmhọn Osẹnobulua. (Ac 4:31) Bhiriọ, aha rẹmiẹn ẹbho ka mhan ehọ la ele bha kaehọ, mhan ki sẹyẹ ha re eghọnghọn lu ọne iwẹnna.​—⁠Eze 3:⁠3.

GHE ỌNE IVIDIO NỌN YỌLE HA RIA ERIA NYAN IBAIBO NIN UWẸ LUẸ NIN UWE DA KIE MIẸN EGHỌNGHỌN. BHA HA KI GHE ỌNE IVIDIO FO, RE EWANNIẸN ỌBHI ENE INỌNTA NAN:

• Bezẹle nọn da khẹke nin mhan ha re ẹghe ọbhi otọ rẹ luẹ iBaibo nọnsẹn, arẹmiẹn imhan noo ẹghe nọn bunbun bhi iwẹnna itẹmhọn Osẹnobulua?

• Uwedẹ nela imhan arẹ sabọ re egbe khọkhọ iMary?

• Ẹghe la uwẹ zẹ ọbhi otọ nin uwẹ rẹ ha ria eria nyan Ọta nọnsi Osẹnobulua?

• Be bhọ re eghọnghọn ji uwẹ bhi iwẹnna itẹmhọn Osẹnobulua?