Bezẹle Nọn da Khẹke Nin Mhan ha Nan Erọnmhọn Bhi Elin Nọnsi Jesu?

JESU wo manman tẹmhọn erọnmhọn. Bhi ẹghe nin ọle rẹ ha ribhi ọne otọ nan, ene mun ọkalo bhi oga ọsi ene iJew da ha nan erọnmhọn bhi ughe, ranmhude ele guanọ nin ẹbho daghe ele yẹ ha gẹn ele. Ene bunbun bhi ẹwẹ ele da ha nan erọnmhọn nọn tan. Ele da yẹ ha ta emhin nin ele ka ta. Bhi ọkhọle nọnsele, iriọ ọkhẹke nin ele rẹ ha nan erọnmhọn. (Matthew 6:​5-8) Jesu da rẹman ghe Osẹnobulua ihọn erọnmhọn ne sẹ iriọ. Ọle da re iriọ rẹkpa mhan rẹ lẹn emhin nin mhan ha rẹban sade mhan nan erọnmhọn. Rẹ gbera ọnin, Jesu da yẹ man mhan ebi mhan ha rẹ ha nan erọnmhọn yẹ.

Ọle da yọle ghe ahamiẹn mhan nan erọnmhọn, nin mhan taman Osẹnobulua ghe, mhan guanọ nan kpe elin nọnsọle khia, nin Agbejele nọnsọle vae, sẹyẹ, nin iho nọnsọle munsẹ. Jesu da yẹ yọle ghe mhan dẹ sabọ bhii Osẹnobulua nin ọle rẹkpa mhan bhi emhin ne rẹtẹ iẹnlẹn nọnsẹmhan. (Matthew 6:​9-​13; Luke 11:​2-4) Jesu da re arẹkhọkhọ kẹkẹ rẹ rẹman ghe ahamiẹn mhan guanọ nin Jehova họn erọnmhọn nọnsẹmhan, ọkhẹke nin mhan situa ha nan erọnmhọn. Ọ yẹ ọkhẹke nin mhan ha mhọn urẹọbhọ bi idegbere. (Luke 11:​5-​13; 18:​1-​14) Jesu da yẹ re ijiẹmhin esili man mhan bhi ẹmhọn erọnmhọn.​​—Matthew 14:23; Mark 1:​35.

Ene emhin nan nin Jesu man edibo nesọle le da rẹkpa ele rẹ manman ha nan erọnmhọn nọnsẹn. Sokpan, bhi ọne asọn ọkuẹsẹ ọle yu, Jesu da man edibo nesọle uhọnmhọn-emhin kpataki nọn khẹke nin ele ha lu sade ele nan erọnmhọn.

Emhin Nọn Fidenọ bhi Uwedẹ Nin Mhan Rẹ Nan Erọnmhọn

Bhi ọne asọn ọkuẹsẹ ọle yu, Jesu da wo noo ẹghe nọn tanlẹn rẹ ha re izebhudu nin edibo nesọle. Ọle da re ọne ẹghe nan rẹ ta emhin ọsọgbọn man ele. Ọle da taman ele yọle: “Mẹn hi ọne uwedẹ, ọne ẹmhọanta, bi ọne iẹnlẹn. Ọria soso ida sabọ bu ọne Aba re sade ọle bha na bhi obọ mẹn.” Akizẹbue, ọle da taman ele yọle: “Emhin nọn hi ki rẹ khin nin bha re elin nọnsẹmhẹn rẹ bhii, mẹn dẹ lu ọle, beji a da mẹn ghe ọne Aba ki miẹn uyi ranmhude Ọmọn nọnsọle. Ibha ha nọọn emhin nọn hi ki rẹ khin bhi elin nọnsẹmhẹn, imẹn dẹ lu ọle.” Jesu ki khian kpẹn ọta nọnsọle, ọle da yọle: “Rẹ sẹbhi ọne ẹghe nan, bha bha sẹ nọọn emhin soso bhi elin nọnsẹmhẹn. Bha nọọn, a ki re nin bha, beji eghọnghọn nọnsẹbha ha da gba.”​​—John 14:​6, 13, 14; 16:24.

Ikpọta kpataki ene ọta nan khin. Ebe ọkpa da yọle ghe ọne ẹghe nan uwedẹ nan rẹ nan erọnmhọn rẹ fidenọ. Jesu bha yọle nin mhan ha nan erọnmhọn ji ọle. Uwedẹ ọsọgbọn nin mhan ha rẹ ha nan erọnmhọn ji Jehova, ọle iJesu man mhan le.

Rẹ na bhi otọ ha vade, Jehova ka wo ha họn erọnmhọn ọsi ẹbho ne ga ọle nọnsẹn. (1 Samuel 1:​9-​19; Psalm 65:2) Sokpan, rẹ na bhi ẹghe nin ọle rẹ zẹ ibhokhan Izrẹl ne ha yi ẹbho nesọle, ọ da khẹke nin ẹbho ne guanọ nin Osẹnobulua họn erọnmhọn nọnsele ka lẹn sẹbho ghe, agbaẹbho ọsi Izrẹl hi agbaẹbho nin Osẹnobulua zẹle. Sẹyẹ, rẹ na bhi ẹghe nin Solomon rẹ bọn uwa oga fo, ọ da khẹke nin ẹbho lẹn sẹbhọ ghe izọese nan lu bhi ọne uwa oga, ọle ọkpa iJehova miẹn ọbhi egbe. (Deuteronomy 9:​29; 2 Chronicles 6:​32, 33) Ọkpakinọn, ọ iyi inian emhin da wo dia rẹ ha khian. Beji Paul nin odibo tale, “arẹkhọkhọ ọsi emhin esili ne vade,” ọle uhi nin Osẹnobulua na obọ Moses gbe nin ibhokhan Izrẹl bi izọese nin ele ha lu bhi uwa oga khin. (Hebrews 10:​1, 2) Akizẹbue, ebi ene emhin mundia nan da zegbere. (Colossians 2:​17) Rẹ na bhi ukpe 33 C.E. ha vade, oga ọsi ẹbho ne hẹnmhọn nin Jesu Kristi, ọle Osẹnobulua ki miẹn ọbhi egbe, ọ iyi ọsi ẹbho ne re obọ rẹkhan Uhi nin ọle na obọ Moses gbe nin ibhokhan Izrẹl.​​—John 15:​14-​16; Galatians 3:​24, 25.

“Elin Nọn Khua Okhun Gbera Elin Nekẹle Rebhe”

Jesu da rẹkpa mhan rẹ daghe uwedẹ nọn mhẹn nẹ nin mhan ha rẹ ha nan erọnmhọn ji Jehova. Ejayenan nian, ọkhẹke nin mhan ha re elin nọnsi Jesu rẹ nan erọnmhọn, beji Osẹnobulua ha da sabọ họn erọnmhọn nọnsẹmhan. Be elin nọnsi Jesu rẹ tuje uwedẹ a nin mhan yẹ?

Ranmhude eria olukhọ mhan khin, mhan ida sabọ tobọmhan lu emhin nọn ha re iJehova miẹn mhan ọbhi egbe. (Romans 3:​20, 24; Hebrews 1:​3, 4) Ọkpakinọn, Jesu da dọ miẹn mhan fan. Ọle da re iẹnlẹn nọn gbale nọnsọle rẹ zọese ọbhi olukhọ nesẹmhan. (Romans 5:​12, 18, 19) Ejayenan nian, ọrebhe ne guanọ nin Jehova họn erọnmhọn nọnsele yẹ miẹn oga nọnsele ọbhi egbe dẹ ha mhọn urẹọbhọ da iJesu, yẹ ha nan erọnmhọn bhi elin nọnsọle.​​—Ephesians 3:​11, 12.

Ahamiẹn mhan nan erọnmhọn bhi elin nọnsi Jesu, ọ rẹman ghe mhan rẹọ bhi emhin ea rẹji ọle: (1) Mhan rẹọbhọ ghe ọle hi “ọne Ohuan nọnsi Osẹnobulua.” Ranmhude izọese nọnsọle Osẹnobulua dẹ rẹhunmhan olukhọ nesẹmhan. (2) Ọle hi “ojohẹn” nọn wẹnna ọbhọ beji a da miẹn ghe elele nọn na bhi izọese nọnsọle vae ki sabọ sẹ mhan bhi egbe. (3) Ọlẹ hi “ọne uwedẹ.” Ọle hi ọnọn tuje uwedẹ a nin mhan rẹ sabọ ha nan erọnmhọn ji Jehova.​​—John 1:​29; 14:6; Hebrews 4:​14, 15.

Ahamiẹn mhan nan erọnmhọn bhi elin nọnsi Jesu, mhan re ọle mun ekpẹn nanlẹn. Ọne ekpẹn nan wo khẹke ọle, ranmhude, iho nọnsi Jehova nọn ‘nin ọrebhe rẹ diguẹ bhi elin nọnsi Jesu, yẹ wewe ọle bhi ogbakha ghe Jesu Kristi hi Ebeanlẹn mhan. Ọnan ki re uyi ji Osẹnobulua nin Aba.’ (Philippians 2:​10, 11) Mhan ha nan erọnmhọn bhi elin nọnsi Jesu, mhan rẹ ọle gẹn Jehova, ranmhude, ọle hi ọnọn je iJesu re nọn dọ yu nin mhan.​​—John 3:​16.

Beji mhan ha da sabọ lẹn ghe ihe kpataki, ọle Osẹnobulua re iJesu ọi, Baibo da tie iJesu elin ovan kẹkẹ. Ene elin ovan nan rẹkpa mhan rẹ lẹn ẹsele ne bunbun nin mhan ha miẹn bhi emhin nin Jesu sẹ lu nin mhan, emhin nin ọle lu nin mhan nian, bi emhin nin ọle ha lu nin mhan bhi ẹghe odalo. (Fẹ ẹkpẹti nọn ribhi , nọn yọle “Ihe Kpataki Nin Jesu Ye”) Gene-gene, Osẹnobulua re “elin nọn khua okhun gbera elin nekẹle rebhe” nin Jesu.a A re ahu rebhe bhi otọ bi okhun nanlẹn.​​—Philippians 2:9; Matthew 28:18.

Ọ Iyi Ẹmhọn Nin Mhan Ha Gheghe Ha Ta

Ahamiẹn mhan guanọ nin Jehova ha họn erọnmhọn nọnsẹmhan, ọ wo khẹke nin mhan ha re elin nọnsi Jesu rẹ kpẹn erọnmhọn nọnsẹmhan. (John 14:​13, 14) Ọkpakinọn, mhan ida wo gheghe ha re ikpunun rẹ tale. Ọkhẹke nọn na bhi ọkhọle mhan vae. Bezẹle?

Ria eria nyan ọne ijiẹmhin nan: Ọwanlẹn bhi isi iwẹnna ha gbẹn ilẹta ji ọria, ọle sabọ rẹ gbẹn otuẹ rẹ kpẹn ọne ilẹta. Otuẹ nin ọle gbẹn ọbhi ọne ilẹta bha rẹman ghe ẹmhọn ọria nin ọle gbẹn ọlẹn je gene rẹtẹ ọle. Ọ gheghe gbẹn ọlẹn ọbhọ, ranmhude, iriọ a rẹ kpẹn ilẹta. Ọ bha khẹke nin mhan gheghe ha noo elin nọnsi Jesu rẹ kpẹn erọnmhọn nọnsẹmhan beji ẹbho eso rẹ gheghe gbẹn otuẹ rẹkhan ilẹta. Ẹmhọanta nọn ghe ọkhẹke nin mhan “ha nan erọnmhọn ẹghe rebhe.” Ọrẹyiriọ, ọkhẹke nin mhan re ọkhọle rebhe ha nanlẹn. Ọ ida ha yi emhin nin mhan gheghe lu.​​—1 Thessalonians 5:​17; Psalm 119:145.

Be ha rẹkpa uwẹ rẹ sabọ ha re ọkhọle rebhe nan erọnmhọn bhi elin nọnsi Jesu? Ha ria eria nyan ikpẹ esili nesi Jesu. Ria ẹmhọn emhin nin ọle sẹ lu nin uwẹ, emhin nin ọle lu nin uwẹ nian, bi emhin nin ọle guanọ nin ọle lu nin uwẹ bhi ẹghe odalo. Ahamiẹn uwẹ nan erọnmhọn, khuẹnmhẹn iJehova bhi uwedẹ nin ọle rẹ noo Ọmọn nọnsọle. Uwẹ ha lu ene emhin nan, uwẹ ki manman ha mhọn urẹọbhọ da ive nin Jesu vele ẹghe nin ọle rẹ yọle: “Ahamiẹn ibha nọọn emhin nọn ki rẹ khin bhi obọ Aba mẹn, ọle dẹ re nin bha bhi elin nọnsẹmhẹn.”​​—John 16:23.