Ene Gbẹn Ebe Nọn Tẹmhọn IJesu

Uwẹ daghe ikpea ne ri bhi ọnin foto nan?— Elin nesele hi Matiu, Maki, Luku, Jọni, Pita, Jemisi, Judu bi Pọlu. Ẹghe ọkpa enin ikpea nan bi Jesu rẹ nyẹn bhi ọnin otọ nan. Ele da yẹ gbẹn ebe rẹ tẹmhọn ebi Jesu rẹ nyẹn yẹ. Ji mhan luẹ ẹmhọn ele.

Itue ea bhi ẹwẹ ele da hayi etuegbe ne deba iJesu ha tẹmhọn Osẹnobulua. Uwẹ be lẹn ea nela bhọ?— Ele hi Matiu, Jọni bi Pita. Matiu bi Jọni manman lẹn Jesu, ọnan zẹle nele da sabọ gbẹn ebe nọn tẹmhọn unyẹnmhin nọnsi Jesu. Jọni yẹ gbẹn ebe ebhebhe natiọle Rẹvẹleshiọn, Jọni nọn hẹnhẹn, Jọni nọnzeva bi Jọni nọnzea. Pita yẹ gbẹn ebe eva bhi ẹkẹ Baibo. Ene ebe hi Pita nọn hẹnhẹn bi Pita nọnzeva. Bhi ọzeva nọn ribhọ, Pita da sunu bhi ẹghe nin Jehova rẹ nanbhi okhun talọ reda iJesu yọle: ‘Ọnan ọmọn nọn sẹmhẹn nin hoẹmhọnlẹn. Ọle ọmọn nin rẹ hio.’

Ikpea ne kẹle bhi ọnin foto nan yẹ man mhan ẹmhọn iJesu bhi ebe nele gbẹn. Ọkpa bhi ẹwẹ ele da ha yi Maki. Asabọ miẹn ẹlo ọle sẹbhi emhin rebhe nọn sunu ẹghe nin igbanegbe dọ rẹ mun iJesu. Ọbhebhe hi Luku. Ọbo ebo ọle ha khin. Asabọ miẹn Jesu yu fo ọle kuẹ kiẹn iKristiẹn.

Eva bhi ene gbẹn iBaibo ne ribhi ọnin foto nan da ha yi ibhio iJesu nọnle mẹnlẹn. Uwẹ lẹn eba tiẹle?— Elin ele hi Jemisi bi Judu. Ele bha ka rẹọbhi Jesu. Ele da riale ghe uhọnmhọn nọnsọle bha gba. Akizẹbue ele da rẹọbhi Jesu dọ kiẹn iKristiẹn.

Ọnọn kike bhi ọnin foto nan, hi Pọlu. Sọlu ha yi elin ọlẹn ọkuẹ kiẹn iKristiẹn. Ọle bha ka hoẹmhọn iKristiẹn hiehie. Ọle da re oya nele. Uwẹ ki lẹn ebezẹle nọnle da dọ kiẹn iKristiẹn?— Ẹdẹ ọkpa, ọle ki khian ẹbho, ọria da nanbhi okhun so tiọle bhi uwedẹ. IJesu so tiọle. Ọda nọọn lẹn: ‘Bezẹle nuwẹ da re oya nin ene rẹọ mhẹn bhọ?’ Ọnan ki sunu fo, Pọlu da fidenọ dọ kiẹn iKristiẹn. Pọlu gbẹn ebe ne sẹbhi 14 [igbe-enẹn] bhi Baibo, Romasi rẹ sẹ bhi Hibru.

Ọiyi mhan be tie iBaibo ẹdẹdẹ?— Mhan ha tie iBaibo, mhan ki luẹ emhin ne bunbun bhi ẹmhọn iJesu. Uwẹ ho nu manman luẹ ẹmhọn iJesu?—