Ebi Mhan Ha Rẹ Sabọ Ha Lẹn Otọ Arẹkhọkhọ Nan Noolo Bhi Baibo Yẹ

Igba ne bunbun, Baibo kẹ wo noo arẹkhọkhọ rẹ gbotọ emhin eso fanọn an. Ọrẹyiriọ, ọ sẹyẹ nọghọ ẹbho eso rẹ lẹn otọ ene arẹkhọkhọ nan. (Mat. 13:13) Be ha sabọ rẹkpa mhan rẹ sabọ ha lẹn otọ ene arẹkhọkhọ nan noo bhi Baibo? Ji mhan fẹ ene emhin nan ghe:

• Dọnmhegbe lẹn ebi a tẹmhọnlẹn bi emhin nan re ọle khọkhọ. Arẹkhọkhọ rẹkpa ọria rẹ sabọ daghe ebi a gene tẹmhọnlẹn nọnsẹn. Bhi ọsi ijiẹmhin, Arẹman 3:3 yọle ghe Jesu dẹ vae bọsi oyi. Ebi a tẹmhọnlẹn hi, ebi Jesu ha rẹ vae yẹ. A da re uwedẹ nin Jesu ha rẹ vae rẹ khọkhọ oyi.

• Ria ẹmhọn ebi arẹkhọkhọ nan noo rẹ diẹn mun ebi a tẹmhọnlẹn yẹ. Ria ẹmhọn emhin kẹkẹ ne rẹman ghe arẹkhọkhọ nan noo bi ebi a tẹmhọnlẹn gene diẹn kugbe.

• Ji a miẹn ghe ebi uwẹ luẹle gene diẹn mun arẹkhọkhọ nan noo rẹ gbotọle fanọan. Ẹgheso, ebi ọria luẹle bhi arẹkhọkhọ nan noo dẹ sabọ dikẹ bhi ebi a gene tẹmhọnlẹn. Bhi arẹkhọkhọ nan tẹmhọnlẹn bhi okhun ọlẹn, ọ i yi ebi Jesu ha rẹ vae dọ ra yẹ a ha re ọne arẹkhọkhọ tẹmhọnlẹn. Ebi a gbẹn nẹga ọne ulọnlẹn nin rẹman ghe, Jesu dẹ vae beji oyi rẹ vae bhi iguaguako. Ọria soso i da lẹn ẹghe nin ọle ha rẹ vae.