Ha Mhọn Izebhudu, Uwẹ Ha yẹ Ha Re Asun-Rẹkhan Man Beji Bẹnaya Lu

Ọyokholẹn nọn wo ha re izebhudu khọn rẹ gbega Devid Ojie bi Solomọn Bẹnaya wo ha khin. Arẹmiẹn ọmọn nọnsi ojohẹn Bẹnaya ha khin, sẹyẹ, ọ bha khẹke nin ọle ha noo emhin okhọnlẹn, sokpan, Bẹnaya da noo ele rẹ gbega Devid nin Ojie, ye ri izebhudu man. Bhi ọsi ijiẹmhin, ọle gbo oduma a bhi ẹkẹ uhio nọn manman dinmhin, yẹ khọn iguan miotọ. Devid da wo gbaẹkẹ Bẹnaya rẹ sẹbhọ ghe, ọle da re Bẹnaya kiẹn ọdiọn ene eyokhọnlẹn ne gbega ọle. 2 Sam. 23:​20-23.

Bẹnaya da wo sẹyẹ ha sun-rẹkhan Devid bhi ẹghe nin Absalọm bi Adonaija rẹ sọtẹ da Devid. (2 Sam. 8:18; 15:18; 1 Ki. 1:8) Arẹmiẹn Devid dọmanlẹn, Bẹnaya da sẹyẹ ha sun-rẹkhan ọlẹn beji ọle rẹ rẹkpa Solomọn rẹ sabọ kiẹn Ojie. (1 Ki. 1:​32-40) Bhi ọsi ẹmhọanta, Bẹnaya da wo ha sun-rẹkhan Jehova bi ene ijie nin Jehova zẹle ne ha gbẹloghe arẹmiẹn ẹbho nekẹle bha lu iriọ.

Ọ yẹ khẹke nin mhan ha mhọn izebhudu, nin mhan da sabọ khọn Esu nọn yi oghian mhan bi ẹbho nesọle miotọ. Ọ yẹ khẹke nin mhan ha nyẹnlẹn bhi uwẹdẹ nin Jehova guanọ nin mhan rẹ ha nyẹnlẹn. (Ẹfẹ. 6:11; 1 Pita 5:​8, 9) Aharẹmiẹn ẹbho nekẹle zẹ Jehova obọ, mhan dẹ sẹyẹ ha sun- rẹkhan ọlẹn, yẹ ha mhọn ọne izebhudu ghe, ọle dẹ nan erọnmhọn nin mhan.—2 Sam. 22:26.