Jesu Da Luẹ “Ebi Ọ Khin Nan Rẹ Ha Hẹnmhọn Nin Osẹnobulua”

Rẹ na bhi ẹghe umunhẹn Jesu rẹ wo ha hẹnmhọn nin Jehova vade. (Jọni 8:29) Bhiriọ, bezẹle nin Baibo da yọle ghe, ọle luẹ “ebi ọ khin nan rẹ ha hẹnmhọn nin Osẹnobulua”?—Hib. 5:8.

Beji Jesu ribhi ọne otọ nan, ọle da kuẹlo da ọkakale kẹkẹ, nin ọle bha kuẹlo da beji ọle ribhi okhun. Bhi ọsi ijiẹmhin, ene bẹẹ ọle wanre wo hoẹmhọn Jehova, ọkpakinọn, ọ bha gba nin ele fo. (Luk 2:51) Ene mun ọkalo bhi otuẹ bi ene gbẹloghe da yẹ wo ha kpokpo ọle, yẹ re oya nanlẹn. (Mat. 26:59; Mak 15:15) Sẹyẹ, ọle da yu uyumhin oya. Baibo yọle: “Ọle da degbere yẹ hẹnmhọn nin Osẹnobulua rẹ sẹbhi ukpẹdẹ uu.”—Fil. 2:8

Ene emhin kẹkẹ nin ọle kuẹlo da hi ebe wo rẹkpa ọle rẹ luẹ ebi a rẹ hẹnmhọn nin Jehova yẹ bhi uwedẹ ọbhebhe. Bhiriọ, ọle dẹ sabọ ha yi Ojie bi Ojohẹn nọn gbale, nọn ha sabọ mhọn ẹkẹ-ẹjẹjẹ da mhan. (Hib. 4:15; 5:9) Ẹghe nin Jesu rẹ luẹ ebi a re ọle ta nan rẹ ha hẹnmhọn nin Jehova bhi emhin nin ọle kuẹlo da fo, ọle da wo manman dọ ghan bhi ẹlo nọnsi Jehova gbera ọnikhẹ, sẹyẹ, Jehova da noo ọle rẹ lu iwẹnna ọhan-ilo kẹkẹ. Mhan dẹ yẹ sabọ ghan bhi ẹlo nọnsi Jehova gbera ọnikhẹ, sade mhan hẹnmhọn nanlẹn bhi ọkakale nọn hi ki rẹ khin nin mhan kuẹlo da. Mhan ha lu irio, ọle ki sabọ noo mhan rẹ miẹn ẹsọn nọn hi ki rẹ khin.—Jem. 1:4.