Guanọ Eje Lọre Da Luẹ Emhin

Ọ dẹ be yẹẹ uwẹ rẹ miẹn elele bhi iluẹmhin Baibo nọnsẹ? Ọ ha yi iriọ, ene emhin nan dẹ rẹkpa uwẹ rẹ mun ọkhọle ọbhi ebi uwẹ luẹ.

• Guanọ eje ha mhẹn uwẹ bhi egbe. Dọnmhegbe rẹ guanọ eji itọn i ye, bi eji ukpa ye beji uwẹ ha da daghe ebi uwẹ tie. Uwẹ dẹ sabọ noo aga bi itebu, la dọ guanọ eje lọre bhi olele.

• Guanọ eje fi ahiẹ a. Jesu da zẹ nin ọle rẹ ha nan erọnmhọn “bhi ọsewewiẹ” bhi “eje fi ahiẹ a.” (Mak 1:35) Ahamiẹn uwẹ i da sabọ miẹn eje fi ahiẹ a dia, ji azagba-uwa nọnsẹ, la ẹbho nin ibha ko ribhi uwa lẹn ẹghe nin uwẹ rẹ lu iluẹmhin Baibo nọnsẹ, yẹ bhii ele nin ele hẹi de uwẹ idobolo bhi ọne ẹghe.

• Denọ ẹlo ọbhi ebi uwẹ luẹ. Ahamiẹn ifoni la kọmputa uwẹ noo, mun ọlẹn ọbhi idia nọn i da so dagbare, beji a ha da miẹn ọ bha de uwẹ idobolo. Ahamiẹn uwẹ ye emhin nọn khẹke nin uwẹ lu re, gbẹn ọlẹn ọbhi otọ beji uwẹ ha da yere sade a zẹbue. Ahamiẹn uwẹ bha yẹ sabọ denọ ẹlo ọbhi ebi uwẹ luẹ, uwẹ sabọ rẹ dọ hẹan khere, khian nẹga, la kpanọ niẹn egbe a.