Inọnta Nin Eria Ne Tie Ebe Nesẹmhan Nọọn
Ikpẹ nan gbẹn ọbhi Galatians 5:22, 23, ele ọkpa be hi ikpẹ ọsi ẹlinmhin nọn khiale?
Ikpẹ isinlin, ele a sounun ọlẹn bhi ene ulọnlẹn nin. Enin yọle: “Ikpẹ ọsi ẹlinmhin nọn khiale hi, oyẹẹ, eghọnghọn, ọfure, iziẹngbe, ifuẹkẹ, umhẹnmhin, urẹọbhọ, ẹkẹ nọn fu, imun-egbe-ọbhi-ibẹẹ.” Sokpan, ọ bha khẹke nin mhan ha riale ghe, ene ikpẹ nan ọkpa ẹlinmhin nọn khiale nọnsi Osẹnobulua ha sabọ rẹkpa mhan ha mhọnlẹn.
Be imhan rẹ lẹn yẹ? Ghe ebi Paul gbẹn ọkuẹsẹ ọle tẹmhọn ene ikpẹ ọsi ẹlinmhin nọn khiale. Ọle da gbẹn yọle: “Iwẹnna efun . . . hi igboghẹ, iwẹnna itọn, unyẹnmhin okan, iga-ẹbọ, ikpẹbo, ihegbe, okhọn, ẹlobhọ, ohu, ozughu, iwa-egbea, izẹ-ibo, ikhu, idanyọngbegbe, idujie ọsi ẹbibi, bi emhin ne sẹ inian.” (Gal. 5:19-21) Ranmhude ikpẹ ebhebhe yẹ ribhọ nin Paul ha sabọ ka ba ikpẹ ọsi efun, bọsi ene ọle tẹmhọnlẹn bhi Colossians 3:5, ọle da yọle, “bi emhin ne sẹ inian.” Iriọ ọle yẹ ta ẹghe nin ọle rẹ ha tẹmhọn ikpẹ isinlin bhi ikpẹ ọsi ẹlinmhin nọn khiale, ọle da yọle: “Uhi iribhọ nọn bha re obọ ọbhi emhin ne sẹ inian.” Bhiriọ, ọ iyi ikpẹ esili rebhe nin ẹlinmhin nọn khiale nọnsi Osẹnobulua ha sabọ rẹkpa mhan ha mhọnlẹn Paul tẹmhọnlẹn.
Ikpẹ ọsi ẹfua nin Paul tẹmhọnlẹn ẹghe nin ọle rẹ gbẹn ebe ji agbotu nọn ribhi Ephesus rẹman ghe ẹmhọanta khọnan. Ọle da yọle: “Emhin rebhe ne mhẹn, ne khiale, ne yi ẹmhọanta deba ikpẹ ọsi ẹfua.” (Eph. 5: 8, 9) Beji enan rẹman, umhẹnmhin, ikhiale, bi ẹmhọanta deba ikpẹ ọsi ẹfua bi ikpẹ ọsi ẹlinmhin nọn khiale.
Sẹyẹ, Paul da taman iTimothy nin ọle khu ọbhọ rẹ ha mhọn ikpẹ esili ehan. Ele hi, ikhiakhiale, urẹọbhọ, oyẹẹ, iziẹngbe, ẹkẹ nọn fu, bi nan rẹ ha ga Osẹnobulua ọkpa. (1 Tim. 6:11) Bhi ẹwẹ ene ikpẹ nan, urẹọbhọ, oyẹẹ, bi ẹkẹ nọn fu, ele ọkpa a gbẹn ba ikpẹ ọsi ẹlinmhin nọn khiale. Ọrẹyiriọ, ọkhẹke nin Timothy ha ga Osẹnobulua ọkpa, nin ọle ha mhọn ikhiakhiale bi iziẹngbe. Ọle lẹnmhin ghe ẹlinmhin nọn khiale dẹ yẹ rẹkpa ọle ha mhọn ene ikpẹ nan.—Yẹ fẹ Colossians 3:12; 2 Peter 1:5-7 ghe.
Bhiriọ, ọ iyi ikpẹ rẹbhe nọn khẹke nin Kristiẹn ha mhọnlẹn Paul tẹmhọnlẹn bhi Galatians 5:22, 23. Ẹlinmhin nọn khiale nọnsi Osẹnobulua dẹ sabọ rẹkpa mhan ha mhọn ene ikpẹ isilin nin Paul tiọle ikpẹ ọsi ẹlinmhin nọn khiale. Sokpan, ikpẹ esili ne bunbun ebhebhe yẹ ribhọ nọn khẹke nin mhan ha mhọnlẹn nin mhan da sabọ deziẹn nọnsẹn bhi oga. Sẹyẹ, ene ikpẹ nan dẹ sabọ rẹkpa mhan “mun akpa ọsọgbọn yọ, nan man bhi iho nọnsi Osẹnobulua bhi ikhiale bi asun-rẹkhan ọsi ẹmhọanta.”—Eph. 4:24.