Iwẹnna Itẹmhọn Osẹnobulua Kpataki Nan Ha Rẹ Munhẹn Ha Man Ẹbho Baibo bhi September

Mhan dẹ wo dọnmhegbe rẹ re ọne ibrokiọ natiọle Sọnyẹnmhẹn bhi Ighegheghe! rẹ munhẹn ha man ẹbho Baibo bhi uki ọsi September. Uwẹ dẹ sabọ lu iwẹnna ọkanẹfan ọsi ẹgheso nan re uri-agogo 30 lu. Be imhan ha rẹ lu ọne iwẹnna itẹmhọn Osẹnobulua kpataki nan yẹ?

• A Ha Miẹn Ọria Ọsọhẹnhẹn: Re ẹmhọn nọn ribhi ikeke ọne ibrokiọ rẹ rẹkpa ọne ọria ha mhọn ọne ọhubhudu rẹ kaehọ, uwẹ ha yẹ rẹman ọlẹn ebi mhan rẹ noo ọle rẹ man ẹbho Baibo yẹ. Hẹi yele a ẹbho nin uwẹ ka ha ne zilo Baibo khẹ bi afikie yo nesẹ. Arẹmiẹn ele ka zobọ bhọ rẹ deba uwẹ ha luẹ Baibo, ọne ibrokiọ ọsọgbọn bi uwedẹ nin mhan ki rẹ man ẹbho Baibo nian dẹ sabọ ha yẹẹ ele. Ọ bha khẹke nin mhan ha re ọne ibrokiọ ọbhi otọ khẹ ọria nin mhan bha kere bhi uwa, la re ọle ba ilẹta je ọle ji ọria nin mhan bha lẹn si ẹmhọn Baibo yẹẹ ọle. Bhi ọne uki ọsi September, Otu Ewanlẹn Ne Mundia Nin Ewanlẹn Nekẹle bhi Agbotu nọnsẹbha dẹ sabọ mhanmhan ikolo ọbhebhe nan rẹ muegbe iwẹnna itẹmhọn Osẹnobulua ba ọne ibha ka lu khẹ.

• Ẹghe Nekẹle: Ahamiẹn ghe agbotu nọnsẹbha lu iwẹnna itẹmhọn Osẹnobulua nan da re ebe wa, re ọne ibrokiọ natiọle Sọnyẹnmhẹn bhi Ighegheghe! wa. Taman ẹbho nin ọne ibrokiọ yẹẹ ghe, mhan yẹ re ọle man ẹbho Baibo ọsọhẹ. Rẹman ele ebi mhan rẹ re ọle man ẹbho Baibo yẹ, la uwẹ ha mhanmhan ọlẹn nin uwẹ rẹ lu iriọ sade ọzẹbue. Ọwanlẹn nọn mhọn obọ bhi iwẹnna itẹmhọn Osẹnobulua dẹ sabọ zẹ ibhio mhan eso ne lu nọnsẹn bhi inẹbho, nin ele ha khian eji a da do ẹki bhi idunmhun nin bha da yo inẹbho, dọ re ọne ibrokiọ rẹ munhẹn ha man ẹbho Baibo. Uwẹ dẹ sabọ re ọne ibrokiọ nan ha man ene ibha ko wẹnna Baibo la ẹbho nin uwẹ miẹn beji uwẹ rẹ lu ilọnmhọn ukpẹdẹ-ukpẹdẹ.

Jesu yọle nin mhan “dọ re ẹbho kiẹn edibo” yẹ ha “man ele emhin.” (Mt 28:​19, 20) Mhan rẹọbhọ ghe, ọne iwẹnna itẹmhọn Osẹnobulua kpataki nan dẹ rẹkpa mhan rẹ lu iriọ, beji mhan ha rẹ ha noo ibrokiọ natiọle Sọnyẹnmhẹn bhi Ighegheghe!