Iwẹnna Ọkanẹfan

Mhan noo ahu nọnsẹmhan nọnsẹn sade mhan mhọn emhanmhan ọsi ilọnmhọn oga nin mhan ha sabọ khu ọi. (1Co 9:26) Emhanmhan dẹ rẹkpa mhan rẹ lẹn ebi mhan ha rẹ sabọ ha noo ẹghe nọn kẹre nọnsẹn yẹ bhi ọne agbọn Esu nan. (Eph 5:​15, 16) Bha dẹ be sabọ zilo nyan emhanmhan nin bha ha sabọ munsẹ bhi ukpe iwẹnna oga nọn vade sade bha lu oga azagba-uwa nọnsẹbha? Ọne ebe ikolo nan mhọn uhọnmhọn-ọta kẹkẹ ne zilo nyan emhanmhan nin bha ha sabọ bhii Jehova le nọn rẹkpa bha munsẹ.​—Jas 1:5.

Bhi ọsi ijiẹmhin, ọrebhe bhi azagba-uwa nọnsẹ dẹ be sabọ mhanmhan ọlẹn ghe nin otuọnkpa bhi ẹwẹ kiẹn ọkanẹfan? Ahamiẹn ghe uwẹ riale ghe uwẹ ida sabọ ha gbẹghe nọn khẹke nin ọkanẹfan ha miẹn uki-uki, uwẹ sabọ ne ọkanẹfan nọn ribhi idia bii uwẹ talọ. (Pr 15:22) Uwẹ dẹ sabọ tie ọkanẹfan vae bhi oga azagba-uwa nọnsẹbha, uwẹ ha yẹ nọọn ọlẹn ọta. Gbẹn emhanmhan nin uwẹ ha rẹ sabọ lu ọle ọbhi otọ. Ahamiẹn ghe uwẹ ka lu iwẹnna ọkanẹfan bhi ẹghe nọn gbera, fẹghe si uwẹ dẹ yẹ sabọ kie lu ọle.

Eria eso bhi azagba-uwa nọnsẹ dẹ be sabọ lu ọkanẹfan ọsi ẹgheso bhi uki ọkpa la uki eso? Ahamiẹn ghe uwẹ imanman sasa, uwẹ dẹ sabọ ha gbe obhi ẹghe khere bhi iwẹnna itẹmhọn Osẹnobulua ẹdẹ-ẹdẹ. Ahamiẹn ghe uwẹ imanman miẹn ẹghe bhi ẹkẹ uzana rẹ ha lu iwẹnna itẹmhọn Osẹnobulua ranmhude isiku la iwẹnna nin uwẹ lu, uwẹ dẹ sabọ re ẹghe nin bha irẹ yo isiku la iwẹnna, la uki nọn mhọn uzana nọn nẹ isẹn rẹ lu ọle. Gbẹn ẹghe nin uwẹ ha rẹ sabọ lu iwẹnna ọkanẹfan ọsi ẹgheso ọbhi kalẹnda nọnsẹ, uwẹ ha yẹ mhanmhan ebi uwẹ ha rẹ mun ọlẹn sẹ yẹ.​—Pr 21:5.

GHE ỌNE IVIDIO NATIỌLE HA YI ỌRIA IZEBHUDU . . . ỌKANẸFAN. BHA HA KI GHE ỌLE FO, WANNIẸN ỌNE INỌNTA NAN:

• Be imhan miẹn luẹ bhi okha ọsi Aamand rẹji ebi Jehova rẹ re oyẹẹ gbẹloghe ẹbho yẹ ne zegbere lu iwẹnna ọkanẹfan?