Wewe ọne Ọta Nọn Mhẹn Ghe Agbọn Nọn Mhẹn Nẹ Ọnan Sotọ!

Bhi uki ọsi November, mhan dẹ manman dọnmhegbe nin mhan rẹ wewe ọta nọn mhẹn ghe, agbọn nọn mhẹn nẹ ọnan sotọ. (Ps 37:​10, 11; Re 21:​3-5) Bha mhanmhan ẹghe nọnsẹbha nọnsẹn, nin bha da sabọ deba ọne iwẹnna itẹmhọn Osẹnobulua kpataki nan. Ọrebhe ne ha lu iwẹnna ọkanẹfan ọsi ẹghe eso bhi uki ọsi November, sabọ rẹ zẹ nin ele rẹ noo uriagogo 30 la 50 rẹ lu ọne iwẹnna ọkanẹfan.

Dọnmhegbe re eje tẹmhọn agbọn ọsọgbọn bhi Baibo man ẹbho ne bunbun nin uwẹ ha miẹn. Ria ẹmhọn ebe yẹẹ ẹbho bhi idunmhun nin bha da tẹmhọn Osẹnobulua sade uwẹ ho nin uwẹ zẹ eji uwẹ ha tie man ọria bhi Baibo. Ahamiẹn ọria ka uwẹ ehọ bhi ọsi ọhẹnhẹn nin uwẹ rẹ nanlẹn talọ, re The Watchtower No. 2 2021 nin ọne ọria. Kẹ fikie bu ọne ọria, uwẹ ha yẹ re ibrokiọ natiọle Sọnyẹnmhẹn bhi Ighegheghe! nanlẹn yẹ re ọle munhẹn ha man ọle iBaibo. Ọ wo rẹ mhan ghọnghọn rẹ re egbe rebhe rẹ ha wewe ọta esili “nọn manman mhẹn”!​—Isa 52:7.

GHE ỌNE IVIDIO NATIỌLE, AGBỌN ỌSỌGBỌN NỌN VADE. BHA HA KI GHE ỌLE FO, WANNIẸN ENE INỌNTA NAN:

• Be hi iẹnlẹn nọn mhẹn nọn ribhi odalo nin ọne obhokhan-okhuo ria ẹmhọnlẹn?

• Be hi emhin eso nin uwẹ khuaẹloghe bhi agbọn ọsọgbọn nọn vade?

• Ahamiẹn uwẹ ria eria nyan ikhuaẹloghe nin uwẹ mhọnlẹn, be ọ ha rẹ rẹkpa uwẹ yẹ rẹ muegbe ọbhi otọ, yẹ deba iwẹnna itẹmhọn Osẹnobulua kpataki nan ha lu bhi November?​—Lu 6:45