Re Aria-ji-egbe Man

Aria-ji-egbe hi, nan rẹ sabọ ha lẹn otọ ebi ẹbho nekẹle ria bhi ọkhọle, ebi emhin dia ele yẹ bhi egbe, ebe ghan bhi ẹlo nọnsele, bi ebi ele guanọ. Ẹbho dẹ sabọ lẹn si mhan mhọn aria-ji-egbe da ele. Ahamiẹn mhan guanọ nin mhan gene rẹkpa ẹbho, ọ ki lẹkhẹ nin mhan rẹ ha re aria-ji-egbe man ele. Ahamiẹn mhan re aria-ji-egbe man bhi inẹbho, ọ ki rẹman ghe mhan re egbe khọkhọ uwedẹ nin Jehova rẹ re oyẹẹ bi ẹjẹjẹ man. Ọnan dẹ sabọ re ẹbho vae dọ lẹn ẹmhọn iJehova.​—Php 2:4.

Ọ iwo gheghe yi nan rẹ re unun yọle ghe mhan mhọn aria-ji-egbe, sọkpan, mhan ki ha re ọle man bhi uwedẹ nin mhan rẹ kaehọ yẹ talọ, uwedẹ nin mhan rẹ lu emhin, uwedẹ nin mhan rẹ lueghe obọ sade mhan talọ, bi uwedẹ nin mhan rẹ lu ẹlo bhi uhọnmhọn. Mhan yẹ re aria-ji-egbe man bhi uwedẹ nin mhan rẹ ji ẹmhọn ọria rẹtẹ mhan. Mhan ki gbẹlokotọ bhi emhin ne rẹtẹ ọle, ebi ọle rẹọ ọi, bi idia nin ọle ye. Mhan dẹ sabọ taman ọlẹn ẹmhin eso ne ha sabọ rẹkpa ọle bhi iẹnlẹn yẹ rẹkpa ọle rẹ re obọ rẹkhan ele, sọkpan mhan ida sua ọle nin ọle fidenọ. Ọ re eghọnghọn nọnsẹmhan tuẹn okhun sade ẹbho nin mhan tẹmhọn Osẹnobulua man miẹn urẹpka nọnsẹmhan ọbhi egbe.

GHE ỌNE IVIDIO NATIỌLE, EGHỌNGHỌN NAN MIẸN SADE A RE ẸBHO KIẸN EDIBO NESI JESU​​—MANMAN GUẸ IWẸNNA ITẸMHỌN OSẸNOBULUA​—HA RE ARIA-JI-EGBE MAN. BHA HA KI GHE ỌLE FO, WANNIẸN ENE INỌNTA NAN:

• 

  Uwedẹ nela iNeeta rẹ re aria-ji-egbe man ẹghe nin Jane bha rẹ kẹ vae?

• 

  Uwedẹ nela iNeeta rẹ re aria-ji-egbe man ẹghe nin Jane rẹ taman ọlẹn ghe egbe lọ ọle rẹ luẹ iBaibo bhi ọne ukpẹdẹ nin?

• 

  Uwedẹ nela iNeeta rẹ re aria-ji-egbe man ẹghe nin Jane rẹ taman ọlẹn ghe ọle bha lẹn ebi a rẹ mhanmhan emhin yẹ?