Be uwẹ sẹ muegbe sẹ yẹ nin uwẹ rẹ mianmẹn?
UNYẸNMHIN NỌN KHẸKE ENE RẸKHAN IJESU
Tobuwẹ Zẹ Nin Uwẹ Rẹ Ga IJehova
Ahamiẹn ọlasẹre uwẹ khin nọn ribhi ẹkẹ agbotu la ọria nọn deba Esali Jehova luẹ iBaibo uwẹ khin, ọ be ri uwẹ bhi ọkhọle nin uwẹ rẹ mianmẹn? Bezẹle nọn da khẹke nin uwẹ mianmẹn? Ọria ha re egbe guẹ nin Jehova yẹ mianmẹn, ọle ki sabọ deba iJehova ha mhọn ikolu kpataki. (Ps 91:1) Ọ dẹ yẹ sabọ re ọria miẹn umiẹnfan. (1Pe 3:21) Be uwẹ ha lu nin uwẹ da sabọ re egbe guẹ nin Jehova yẹ mianmẹn?
Ha mhọn ọne urẹọbhọ ghe oga ẹmhọanta uwẹ ye. Ahamiẹn inọnta eso zegbere bhi ọkhọle nọnsẹ, gua otọ ele fẹghe bhi Baibo bi ebe nesẹmhan. (Ro 12:2) Gbẹlokotọ bhi emhin ne khẹke nin uwẹ fidenọ bhi iẹnlẹn nọnsẹ, uwẹ ha yẹ dọnmhegbe rẹ fidenọ ranmhude uwẹ guanọ nin uwẹ lu ebe ti Jehova bhọ. (Pr 27:11; Eph 4:23, 24) Ha nan erọnmhọn ẹghe rebhe nin Jehova rẹkpa uwẹ. Ha mhọn ọlẹn bhi ọkhọle ghe ọle dẹ re ẹlinmhin nọn khiale nọnsọle rẹ re ahu nin uwẹ yẹ rẹkpa uwẹ. (1Pe 5:10, 11) Uwẹ dẹ miẹn elele sade uwẹ dọnmhegbe rẹ lu ene emhin nan. Nin ọria rẹ ha ga iJehova, ọle hi emhin nọn mhẹn nẹ bhi iẹnlẹn!—Ps 16:11.
GHE ỌNE IVIDIO NATIỌLE, EBI UWẸ HA SABỌ LU UWẸ KUẸ MIANMẸN. BHA HA KI GHE ỌLE FO, WANNIẸN ENE INỌNTA NAN:
Ọnọghọ nela ibhio mhan eso sẹ khọn miotọ nin ele da sabọ mianmẹn?
Be uwẹ ha rẹ sabọ bọn urẹọbhọ nọnsẹ yẹ nin uwẹ da sabọ re egbe guẹ nin Jehova?
Be rẹkpa ibhio mhan eso rẹ ha mhọn ọne ọhubhudu rẹ mianmẹn?
Erọnmhọn nela Jehova nan nin ẹbho ne zẹ nin ele rẹ ga ọle?
Be bhọ iregbeguẹ bi imianmẹn mundia nan?