Uwẹ Be Muegbe Nin Uwẹ Rẹ Yo Isiku ọsi Ene Tẹmhọn Agbejele?

Ọkanẹfan nọn ribhi ẹwẹ ikpe 23 rẹ sẹbhi 65 uwẹ be khin? Uwẹ be mhọn egbe nọn danlẹn? Uwẹ be guanọ nin uwẹ dọ ga bhi eji a da guanọ urẹkpa bhi iwẹnna itẹmhọn Osẹnobulua? Ahamiẹn ehe, ọle ewanniẹn nọnsẹ khin rẹji ene inọnta nan, uwẹ sẹ ka riale khẹ si uwẹ dẹ sabọ yo Isiku ọsi Ene Tẹmhọn Agbejele? Rẹ nabhi ẹghe nan rẹ mun ọne isiku nan hẹn, ibhio mhan ne bunbun sẹ wo yo​—okhuo bi ọdọ, ikpea ne bha sẹ re okhuo, bi ikhuo ne bha sẹ bọ ọdọ. Ọkpakinọn, mhan wo manman guanọ ibhio mhan nin ikpea ne bha sẹ re okhuo nin ele zegbere dọ yo ọne isiku nan. Bhii Jehova nin ọle re ọne ọkhọle nin uwẹ rẹ ha lu ebe ti ọle bhọ yẹ re egbe khọkhọ Ọmọn nọnsọle. (Ps 40:8; Mt 20:28; Heb 10:7) Uwẹ ha lu ọnin fo, ria ẹmhọn uwedẹ kẹkẹ nin uwẹ ha rẹ sabọ de obọ re bhi iẹnlẹn nin uwẹ da sabọ yo ọne isiku.

Iwẹnna oga kẹkẹ nela a je ene ibhio mhan nan dọ ha lu sade ele yo ọne isiku nan fo? A sẹ je ibhio mhan ne yo ọne isiku nan fo diọ bhi ije ebhebhe nan da zẹ urolo ọbhebhe la bhi eji a da lu iwẹnna itẹmhọn Osẹnobulua nan da re ebe wa nin Bẹtẹ mhanmhanlẹn. Eso da yẹ ha ga bhi ihe ọsi ene zẹ sikẹ ọfẹotughe, ihe ọsi ọfẹotughe, bi misiọnari. Beji uwẹ ha rẹ ha ria ẹmhọn emhin kẹkẹ nin uwẹ ha lu bhi oga nọnsi Jehova, ha mhọn ọkhọle bọsi Isaiah nin akhasẹ nọn yọle: “Ghe mẹn bhi enan, je mẹn!”​—Isa 6:8.

GHE ỌNE IVIDIO NATIỌLE IWẸNNA IMISIỌNARI DIABE IWẸNNA ỌSI ENE RỌ EMHIN UGBO. BHA HA KI GHE ỌLE FO, WANNIẸN ENE INỌNTA NAN:

• 

  Be a rẹ zẹ ibhio mhan ne ga bhi ihe ọsi misiọnari yẹ?

• 

  Be bhọ iwẹnna esili nin ibhio mhan nin misiọnari lu?

• 

  Erọnmhọn nela iwẹnna imisiọnari si re?