Sẹyẹ Ha Noo Watchtower bi Awake!

Rẹ nabhi 2018 ha vade, uhọnmhọn-ọta ọkpa, ọle a ki ha zilo nyan bhi Watchtower bi Awake! kẹkẹ ne dagbare nin mhan ne nin ẹbho. Ene ebe nan deba Emhin Kpataki nin mhan rẹ lu iwẹnna itẹmhọn Osẹnobulua. Bhiriọ, mhan dẹ sabọ noo ele bhi iwẹnna itẹmhọn Osẹnobulua. Mhan dẹ sabọ yẹ ne eso rẹkhan egbe sade mhan khian ẹbho la sade mhan khian ẹki. Arẹmiẹn ene ebe nan bha deba ebe nin mhan noo rẹ deba ẹbho lu iluẹmhin iBaibo, ọ dẹ yẹ rẹkpa ẹbho rẹ ha mhọn oyẹẹ rẹ luẹ ẹmhọn Osẹnobulua.

Ahamiẹn uwẹ munhẹn ha ne ọria zilo, tie iBaibo man ọlẹn, uwẹ ha yẹ tẹmhọn uhọnmhọn-ọta nọn ribhi Watchtower la Awake! nọn ha yẹẹ ọne ọria. Bhi ọsi ijiẹmhin, ahamiẹn ghe ọne ọria mhọn imọn, la ọle mhọn ọnọghọ nọn kpokpo ọle, la ọria nin ọle hoẹmhọnlẹn yu, uwẹ sabọ rẹ taman ọlẹn yọle: “Emhin ribhọ nin mẹn tiele bhi ebe ọkpa bhi ẹghe nọn bha ree gbe, nọn zilo nyan ọne ẹmhọn nan. Ọ dẹ yẹẹ uwẹ nin mẹn rẹ re ọle man ẹn?” Ahamiẹn ọ yẹẹ ọne ọria, uwẹ dẹ sabọ re Watchtower la Awake! nan print nanlẹn la uwẹ ki je ọne ebe ji ọle bhi intanẹt aharẹmiẹn bhi ọsi ọhẹnhẹn uwẹ miẹn ọne ọria. Arẹmiẹn ọ iyi ebe mhan wo gheghe gha nin ẹbho, ene Watchtower bi Awake! nin mhan ne nin ẹbho dẹ sabọ rẹkpa mhan lẹn ẹbho ne guanọ ne luẹ ẹmhọn Osẹnobulua.​—Ac 13:48.

2018

2019

2020