Be Imhan Ha Miẹn Luẹ bhi Obọ Ibhio Mhan Ne Wanre?

Bhi ẹkẹ agbotu nọnsẹmhan, ibhio mhan eso ribhọ ne sẹ ga iJehova na bhi ikpe ne bunbun. Mhan dẹ wo miẹn emhin luẹ bhi urẹọbhọ nin ele mhọn da iJehova. Mhan sabọ rẹ taman ele nin ele gbokha ọsi agbotu nọnsẹmhan man mhan. Mhan sabọ yẹ nọọn ele ẹmhọn ebi Jehova rẹ rẹkpa ele yẹ bhi ẹghe ekpokpo. Mhan bhọ sabọ tie ọkpa bhi ene ibhio mhan nan vae bhi Oga Azagba-uwa nọnsẹmhan yẹ nọọn ele ọta.

Ahamiẹn uwẹ sẹ ga iJehova bhi ikpe ne bunbun, wo ha taman ene usẹn ebi Jehova sẹ rẹ rẹkpa uwẹ yẹ. Jacob bi Joseph wo ha taman ẹgbẹ-uwa nọnsele ebi Jehova rẹ rẹkpa ele yẹ. (Ge 48:​21, 22; 50:​24, 25) Jehova da yẹ taman ọdafẹn uwa ne ha taman imọn nesele iwẹnna ọhan-ilo nesọle. (De 4:​9, 10; Ps 78:​4-7) Bhi ẹghe nọnsẹmhan yẹ, enebiọmọn bi ene wanre dẹ sabọ taman ene ibhokhan emhin ọhan-ilo nin Jehova sẹ lu bhi agbotu nọnsọle.

GHE ỌNE IVIDIO NATIỌLE EBI MHAN RẸ SABỌ HA MHỌN OKUGBE YẸ BHI ẸGHE ỌNỌGHỌ. BHA HA KI GHE ỌLE FO, WANNIẸN ENE INỌNTA NAN:

• Be iBẹtẹ nọn ribhi Austria rẹ rẹkpa ibhio mhan yẹ, bhi agbaẹbho eso nin gọvmẹt da de idobolo bhi iwẹnna oga nọnsẹmhan?

• Be ene ibhio mhan bhi ene agbaẹbho nan rẹ ziẹn urẹọbhọ nọnsele yẹ?

• Bezẹle nin ibhio mhan ne bunbun bhi Romania da sibhi agbotu re? Be ele rẹ fikiere yẹ?

• Be ene okha nan rẹ ziẹn urẹọbhọ nọnsẹ yẹ?