Guẹ Ebi A Rẹ Lu Iwẹnna Itẹmhọn Osẹnobulua Yẹ—Hẹi Wo Ha Re Uwedẹ Ọkpa Tẹmhọn Osẹnobulua

EBEZẸLE NỌN DA YI EMHIN NỌN KHẸKE: Enanzẹle bi ene ihuan nekẹle wo tie ẹbho nin ele vae dọ ‘wọn amẹn iẹnlẹn nan ire igho de.’ (Re 22:17) Emhin rebhe nin Jehova lu nin ọle rẹ hinmhin mhan bhi obọ uu bi olukhọ, ọle hi ọne amẹn ọsi iẹnlẹn. Nin mhan rẹ sabọ tẹmhọn Osẹnobulua man ẹbho ne mhọn urẹọbhọ kẹkẹ bi uwedẹ kẹkẹ ne rẹ lu emhin, ọkhẹke nin mhan guẹ ebi a rẹ tẹmhọn Osẹnobulua yẹ bhi uwedẹ nọn ha yẹẹ ẹbho kẹkẹ.—Re 14:6.

EBI A RẸ LU ỌLE YẸ:

• Zẹ uhọnmhọn-ọta bi eji uwẹ ha tie bhi Baibo nọn ha rẹso ọkhọle ọsi ẹbho ne nyẹnlẹn bhi idunmhun nin uwẹ da tẹmhọn Osẹnobulua. Uwẹ sabọ zẹ uhọnmhọn-ọta ọkpa bhi obọ natiọle “Ebi Uwẹ Ha Sabọ Ta” bhi ebe ikolo nọnsẹmhan, la uwẹ zẹ uhọnmhọn-ọta ọbhebhe nin uwẹ sẹka noo khẹ nọn yẹẹ ẹbho. Nọọn egbe ẹ: Uhọnmhọn-ọta bi Baibo nela ti ẹbho bhọ? Emhin ribhọ nọn la sunu nin ẹbho ria ẹmhọn ọlẹn? Uhọnmhọn-ọta nela ha ti ikpea bhọ? Uhọnmhọn-ọta nela ha ti ikhuo bhọ?

• Lẹn uwedẹ nin ẹbho rẹ tuẹ bi uwedẹ nin ele rẹ lu emhin bhi idunmhun nin uwẹ da tẹmhọn Osẹnobulua. Noo ene emhin nan sade uwẹ ne ele zilo—2Co 6:3, 4

• Manman lẹn ene ebe bi vidio ne deba Emhin Kpataki Nin Mhan Rẹ Lu Iwẹnna Itẹmhọn Osẹnobulua, nin uwẹ sabọ lẹn ọne uwẹ ha rẹman ọria nọn ka uwẹ ehọ

• Danlodi ebe bi vidio bhi urolo ọsi ẹbho nin uwẹ ha sabọ miẹn sade uwẹ tẹmhọn Osẹnobulua

• Fi uhọnmhọn-ọta nin uwẹ rẹ mhanmhan ọbhi otọ denọ sade idia ikẹ uwẹ da ke ọne ọria re. (1Co 9:19-23) Bhi ọsi ijiẹmhin, be uwẹ ha taman ọria nin uwẹ tẹmhọn Osẹnobulua man, sade uwẹ luẹ kere ghe ọria nọnsọle wo la yu?

GHE ỌNE IVIDIO. BHA HA KI GHE ỌLE FO, WANNIẸN ENE INỌNTA NAN:

• Uhọnmhọn-ọta nela ọne obhio mhan rẹ munhẹn ha ne ọria nin ọle miẹn zilo?

• Be sunu bhi iẹnlẹn ọsi ọne ọria?

• Ọnela ọkhẹke nin ọne obhio mhan zẹ bhi Baibo nin ọle ria ẹmhọn ọlẹn? Bezẹle?

• Be uwẹ rẹ fi uhọnmhọn-ọta nọnsẹ denọ yẹ beji ọ ha da ha yẹẹ ẹbho nin uwẹ tẹmhọn Osẹnobulua man?