Ọne ‘Otọ Da So Ọne Ẹdẹ Lọlọ’

Rẹ na otọ ha de, ẹghe kẹkẹ wo ribhọ nin ene gbẹloghe rẹ rẹkpa ẹbho nesi Jehova. (Ezr 6:1-12; Es 8:10-13) Bhi ẹghe nọnsẹmhan yẹ, mhan wo daghe ebi ene mhọn ọkhọle esili bhi ẹwẹ ene gbẹloghe rẹ rẹkpa ẹbho nesi Jehova yẹ bhi ẹghe ekpokpo. Ọnan hi emhin nin ebe nọnsi Revelation ha tẹmhọn ọlẹn ẹghe nọn rẹ yọle ghe ‘ọne otọ da so ọne ẹdẹ lọlọ.’ Ọne otọ hi ene mhọn ọkhọle esili bhi ẹwẹ ene gbẹloghe. Ọne ẹdẹ hi ekpokpo nin mhan miẹn ranmhude oga nọnsi Jehova. Esu re ọne ekpokpo nan khian. (Re 12:16) Ẹgheso, Jehova nin Osẹnobulua nọn miẹn mhan fan ki re ene gbẹloghe rẹ hinmhin mhan bhi ekpokpo.—Ps 68:20; Pr 21:1.

Ahakimiẹn ghe a mun uwẹ khue ranmhude urẹọbhọ nọnsẹ? Ha mhọn ọlẹn bhi ọkhọle ghe Jehova ida zẹ uwẹ obọ. (Ge 39:21-23; Ps 105:17-20) Lẹn sẹbhọ ghe ọle dẹ re ihaosa nin uwẹ bhi urẹọbhọ nin uwẹ rẹman. Yẹ ha yere ghe uwedẹ nin uwẹ rẹ mun urẹọbhọ nọnsẹ mhọn wo re izebhudu nin ibhio uwẹ bhi otọ agbọn rebhe.—Php 1:12-14; Re 2:10.

GHE ỌNE IVIDIO NATIỌLE IBHIO MHAN BHI KOREA NAN FAN FIA BHI IGHAN. BHA HA KI GHE ỌLE FO, WANNIẸN ENE INỌNTA NAN:

• Bezẹle nan da ha munọ ibhio mhan khue bhi South Korea bhi ikpe ne bunbun?

• Ẹzọ nela a gui bhi ikotu nọn zẹle nan da fia ibhio mhan eso fia bhi ighan arẹmiẹn ghe ẹghe nan hian nin ele bha sẹ gba?

• Be imhan ha lu nin mhan rẹ rẹkpa ibhio mhan nan mun khue bhi ighan ranmhude urẹọbhọ nọnsele?

• Ahamiẹn ghe mhan mhọn isẹhoa nian nin mhan rẹ tẹmhọn Osẹnobulua, be ọkhẹke nin mhan rẹ noo ọle yẹ?

• Ahamiẹn ghe a bhu nin mhan bhi ẹzọ nin mhan dọ gui bhi ikotu, họla ogẹn khẹke?