Guẹ Ebi A Rẹ Lu Iwẹnna Itẹmhọn Osẹnobulua Yẹ—Ha Ne Ẹbho Gha Iẹnlẹn Nọn Ha Rẹkpa Uwẹ Tẹmhọn Osẹnobulua

Jesu da sabọ tẹmhọn Osẹnobulua man okhuo ọkpa nin obhi Samaria. Be bhọ rẹkpa ọle rẹ lu ọnan? Ọle da ka munhẹn ha ne ọne okhuo gha iẹnlẹn. Be imhan ha rẹ sabọ dinian ha ne eriọbhe gha iẹnlẹn yẹ?

• Uwẹ ha miẹn ọria, ne ọle talọ bọsi ọmọẹ. Be iJesu rẹ munhẹn ha ne ọne okhuo nin talọ yẹ? Ọle da taman ọne okhuo nọn sa amẹn nanlẹn wọn. Uwẹ ha yẹ miẹn ọria, tuẹ ọle nọnsẹn. Uwẹ ha ki tuẹ ọle fo, uwẹ sabọ tẹmhọn ebi ọne ukpẹdẹ diayẹ, la uwẹ tẹmhọn emhin nọn la sunu bhi eji bha da nyẹnlẹn. Uwẹ sabọ ta emhin nọn ki rẹ khin nin uwẹ lẹn ghe ọ dẹ ti ọne ọria bhọ, ranmhude, uwẹ guanọ nin ọne ọria talọ ọbhi ẹmhọn nin uwẹ ta. Ahamiẹn ọne ọria bha talọ uwẹ bhọ, hẹi ji egbe lọ uwẹ. Dọnmhẹn ọria ọbhebhe fẹghe. Bhii Jehova nọn rẹkpa uwẹ rẹ ha mhọn izebhudu.—Ne 2:4; Ac 4:29.

• Uwẹ ha miẹn otọ nin uwẹ rẹ dia ọne ẹmhọn diọ bhi ẹmhọn Osẹnobulua, noo ọle. Ọkpakinọn, hẹi wo ha tua nin uwẹ rẹ tẹmhọn Osẹnobulua man ọne ọria. Ji a miẹn ghe ọta ibha ta sẹbhọ. Uwẹ ha tua gbe, ọne ọria sabọ nyangbe uwẹ, la ọle ki kpanọ. Ahamiẹn uwẹ bha miẹn otọ rẹ tẹmhọn Osẹnobulua ọkuẹsẹ ọne ọria kpanọ, hẹi ji ọle ba uwẹ bhi egbe gbe. Ahamiẹn ọ nọghọ uwẹ rẹ tẹmhọn Osẹnobulua sade uwẹ lu ilọnmhọn ukpẹdẹ-ukpẹdẹ, ka luẹ ebi a re ne ẹbho gha iẹnlẹn bhi emhin ebhebhe yẹ. [Re ividio 1 man, bha ha yẹ zilo nyan ọlẹn.]

• Ẹghe nin uwẹ ha rẹ ha ne ọne ọria gha iẹnlẹn, guanọ uwedẹ nin uwẹ ha rẹ tẹmhọn Osẹnobulua. Uwẹ sabọ tẹmhọn emhin nin uwẹ rẹọ. Ọnan sabọ re ọne ọria nọọn uwẹ ọta. Ẹghe nin Jesu rẹ ha nin ọne obhi Samaria talọ, ọle da ta ọta eso ne re ọria ria eria. Ene ọta nan re ọne okhuo ha nọọn ọlẹn ọta. Ọle da ki sabọ tẹmhọn nọnsi Osẹnobulua man ọne okhuo. [Re ividio 2 man, bha ha zilo nyan ọlẹn. Yẹ re ividio 3 man, bha ha yẹ zilọ nyan ọlẹn.]