Uwẹ bi Obhio Ẹ Ka Dọ Han Fo—Be Arẹ Lu Ọle Yẹ?

Riale ghe Galilee uwẹ da ha nyẹnlẹn bhi ẹghe nin Jesu rẹ ha ribhi otọ. Uwẹ da nanbhi Galilee khian vae bhi Jerusalem nin uwẹ dọ deba lu iluemhin nan da debhi ibọkpọ a. Ẹbho ne bunbun wo nanbhi eje kẹkẹ vẹ vae bhi Jerusalem ranmhude ọne iluemhin. Uwẹ guanọ nin uwẹ zọese ji Jehova. Bhiriọ, uwẹ da mun ẹbhe rẹkhan egbe nin uwẹ ha rẹ ze. Uwẹ da mun ọne ẹbhe rẹkhan egbe ha khian uwa oga nọn ribhi Jerusalem. Ọbha lẹkhẹ hiehie nin uwẹ rẹ keke egbe nanbhi ẹwẹ usun ẹbho rẹ sẹbhi enin. Uwẹ ki sẹbhi enin, uwẹ da kere ghe eje rebhe vuọn, ranmhude ẹbho vuọn enin nẹ yẹ vae dọ zọese. Ọ da sha sẹ uwẹ bhi egbe nin uwẹ rẹ mun ẹbhe nin uwẹ ho nin uwẹ re ze nin ene ohẹn. Bhi ọne ẹghe nin, uwẹ da yere ghe obhio ẹ ribhọ nin uwẹ bi ọle ko mhọn ẹmhọn. Uwẹ bhọ bha lẹn eji ọne obhio ẹ nin bhọ yẹ nian. Asabọ miẹn ghe ọle ribhi ẹwẹ usun ẹbho ne ribhi ẹkẹ uwa oga la ọle ribhi eje ebhebhe bhi ẹkẹ iJerusalem. Jesu tale ebi ọkhẹke nin uwẹ lu yẹ. (Tie Matthew 5:24.) Be uwẹ bi obhio ẹ ha rẹ khu ọbhi ọfure yẹ beji Jesu tale? Re iyaman bhi ewanniẹn nọn gbale bhi ẹwẹ ene emhin nan gbẹn ọbhi otọle nan.

BE ỌKHẸKE NIN UWẸ LU?

• Dọ nin obhio ẹ han sade uwẹ gene rẹọbhọ ghe uwẹ lu emhin nọn khọ ọle bhi ẹkẹ

• Taman obhio ẹ ghe emhin kẹ rẹso ọle gbe la ọle mhọn obọ bhi emhin nọn sunu

• Ziẹngbe ka obhio ẹ ehọ. Aharẹmiẹn emhin rebhe nin ọle ta bha mun uwẹ ẹlo kore fo, taman ọlẹn ghe emhin nọn sunu ba uwẹ bhi egbe. Yẹ taman ọlẹn ghe nọn mun ẹmhọn fia

BE ỌKHẸKE NIN OBHIO Ẹ LU?

• Guẹzọ man ẹbho ebhebhe bhi ẹkẹ agbotu, taman ele ebi uwẹ lu nọn khọ ọle bhi ẹkẹ

• Re unun gbe ẹ, ha nana ọne ẹmhọn, yẹ ha guanọ nin uwẹ rẹọbhọ ghe uwẹ gene muọhan bhi ọne ẹmhọn

• Nọn ria ẹmhọn idegbere bi izebhudu nin uwẹ rẹ sabọ dọ bu ọle re nin bha ko han yẹ mun ọne ẹmhọn fia. Ọle ha yẹ gene rẹhunmhan uwẹ

Arẹmiẹn mhan iyẹ re elanmhẹn ze ji Jehova ẹlẹnan, be bhọ iJesu ha man mhan le? Be bhọ ọfure nin mhan mhọn da ibhio mhan rẹ diẹn mun oga nin mhan ga iJehova yẹ?