Ọta Nin Eria Ne Tie Ebe Nesẹmhan Nọọn

Ẹghe nin Esu rẹ taman Eve ghe ọle ida yu sade ọle le bhi ọne oran ọsi ilẹnmhin ọsi emhin nọn mhẹn bi emhin nọn imhẹn, urẹọbhọ nin ẹbho mhọn ẹlẹnan ghe ọria ha rẹ yu emhin re ọle bhi ẹkẹ egbe nọn isabọ yu, ọle Esu be ha tẹmhọnlẹn man Eve?

Esu bha taman Eve ghe, ọle ha le bhi ọne oran nin Osẹnobulua yọle nin ele hẹi le, ghe, emhin nan idaghe (nin ẹbho eso tiọle oriọn) ribhi ẹkẹ egbe nọnsọle nọn ha sibhọre ha nyẹnlẹn khian sade ọle yu. Ebi Esu noo ẹnyẹn rẹ taman Eve hi, ahamiẹn ọle le bhi ọne oran, ọle ida yu hiehie. Ebi ọle re ọnan ta hi, Eve dẹ wo ha nyẹnlẹn khian bhi ọne otọ nan, yẹ sọnyẹnmhẹn bhi iẹnlẹn aharẹmiẹn ọle fikeke gbe Osẹnobulua. Bhiriọ, mhan ida sabọ tale ghe, iman-emhin nin ẹbho mhọn ẹlẹnan, nọn yọle, ọria ha yu, emhin ribhi ẹkẹ egbe nọnsọle nọn ida sabọ yu, ọle Esu ha tẹmhọnlẹn man Eve.—Gen. 2:17; 3:3-5.

Ẹlẹnan nian, ẹbho manman wo rẹọbhi ọne iman-emhin ohoghe nan. Ahamiẹn ọ iyi ogba ọsi Eden ọne iman-emhin ohoghe da munhẹn, ẹghela ọ ki rẹ munhẹn? Mhan bha muegbe lẹn. Mhan lẹnmhin ghe oga ohoghe rebhe fuẹn an ẹghe nin Osẹnobulua rẹ re amẹn rẹ fuẹn ẹbho a bhi ẹghe ọsi Noah. Iman-emhin ohoghe soso bha kẹre, ranmhude Noah bi azagba-uwa nọnsọle ne ga oga ẹmhọanta, ele ọkpa miuhọnmhọn bhi ọne ẹghe nin.

Bhiriọ, mhan dẹ sabọ yọle ghe, ẹghe ọsi Noah gbera fo ọkuẹsẹ ọne iman-emhin ohoghe nan zegbere. Ẹghe nin Osẹnobulua rẹ lu ọle nin ẹbho da munhẹn ha zẹ urolo kẹkẹ bhi otọ iBabel, ọle ẹbho rẹ kpanọ diọbhi ije kẹkẹ bhi ọne otọ nan rebhe. Beji ẹbho rẹ kpanọ ha khian ije kẹkẹ, iriọ ele rẹ mun ọne iman-emhin ohoghe nan rẹkhan egbe. (Gen. 11:8, 9) Ẹghe nọn hi ki rẹ khin nin ọne iman-emhin ohoghe nan rẹ munhẹn, mhan lẹnmhin ghe, Esu nin aba ohoghe, ọle zẹ ọle egbe dagbare. Ọ ti ọle bhọ rẹ daghe ghe, ọne ohoghe wo gba ije rebhe ẹlẹnan.—John 8:44.